Da lo'ueenec so Moisés
1Co'na'le, ca' so Moisés chaqai so Israel llaalqaipi ỹo'ueeno' da lo'ueenec, imaqachin ñi qara'gaxala':
So'ueenaxano', semaqachintac ñi qara'gaxala',
ma' 'ue da ne'laxa na' rauegaxan
na' iyinñi nqai'en caso huaaxai so shipiguiripi qoyintalec.
2Dajo ỹo'ueenec saantacot ñí'maq qara'gaxala',
ñi'maxare chi iquesaxanaxa chaqai ica'laxa.
Ñi'maxare chaqaiñi ñi qota'olec caỹim, ca' semaqachintac;
ñí'maq qota'olec quiyi ita'a, ca' ỹim sapacqajnauec.
3Ñi qara'gaxala' ỹaatqajam nalauataxai.
Ñi'maxare ¡chaqaida da leenaxat qara'gaxala'!
4Ñi qara'gaxala' iyinñi nqai'en caso huaaxai
so nahoglenaipi chaqai so nalliripi so Faraón;
¡chaqai só'maq no'uen nalliripi
homac nqai'en caso huaaxai leenaxat huaaxai toc!
5Ta'ñi da lauajñi, 'ec qaripi,
ca' so qoỹoqochi'ñigui huaaxai pojlec nqai'en.
6Qami' qara'gaxala', da qatoiqui' ỹaatqajam quesaxanaxaic,
dá'maq ỹopoxoỹaxachigui so qanpa'guenaxaua.
7Tepaxañi nqai'ñi' queda rquesaxanaxa'e' ná'maq reloqoguit aqami';
na' 'xañirec da ronogoxonaxaqui',
ca na'maxare nachipishiguim, 'ec na 'uaqapi.
8Queda lquesaxanaxa so racachi', ca' so huaxaỹaq lapoỹata';
ca' na lo'paxa nachajñi, 'ec na nquepaqataxanaxat;
¡ca' se reda na lavinñi aso huaaxai qoỹoqochi'ñigui!
9Ca' so npa'guenaxaua 'neetapiguio' lauel:
“Aỹim socanac so'maxare, vire'to' ma' soviralec,
ca' semeenec ma'le ca ỹouootaxanaxat,
ca ma'le, ca chi ỹovireta'a quiyim ỹaatqajam ya'maqachiguiñi.
Ñavicshiguim ma'le na llicat,
ca' na iqai'laxat nalauajñi ma'le sá'ogue.”
10Qam npi'chirec so racachi', ca' aso huaaxai ỹaqan so'maxare;
'ec na quiguiñi na' iyinñi queso huaxaỹaq chalego lquesaxanaxa.
11Qami' qara'gaxala',
¡ỹaatqajam qaica ca liỹa nalo'guit aqami'!
¡Qaica ca co'teeta chaqai lodegaxat 'nejem qami'!
¡Ma' 'viichi' na ỹo'uet ca ne'laxa chaqai 'xoic lichic!
¡Ca' ta'chiguit quiyim qaimaqachin qami'!
12¡'Xañirec da rquesaxanaxa'e',
ca' na 'laua sá'ogue ỹaqan so Faraón nalliripi!
13Shaxañi'sac queda re'xorenataxanaxa'e'
najo qomyipi ralamaxarichi', ca nca'laxachirec;
viise'e da rquesaxanaxa'e', ca viquisa'a ca co'teeta ra'aachi'.
14Ná'ogue na ỹoreta'oguit qomyipi ỹaatqajam i'loxol ma' 'ue ca la'xaỹaxac,
na filisteoipi namaqachigui ma'le quena nqui'ic,
15na nashillipi quiyi Edom tot qaica ma'le ca lacat,
na nashillipi quiyi Moab i'loxol ma'le quena lqolonaxa,
chaqai ná'ogue na Canaán laseripi qaica ma'le ca la'ñaxac lauel.
16Qami' qara'gaxala',
¡No'chi nqai'ñi'!, ca ¡'xoic da lqolonaxa!
chaqai ¡quecá'maq hueeta'ñi, ca 'ec qa'
queda lquesaxanaxa da rqai'laxachi',
chi ỹovireta'a pacta na ralamaxarichi' qomyipi
ná'maq rca'acshiqui'!
17Qami' qara'gaxala',
qare'xachi' quiyim senqalec yi Jerusalén,
yí'maq co'teeta 'laua qoỹoqoshi'megue ralamaxachi',
yí'maq rca'acshiqui' quiyim ñira'ñi,
yí'maq qouagaxainqa' chaqaqami' 'yiriñi.
18¡Ñi qara'gaxala' ñí'maq sqaica lqodoc quiyim ỹoiquentac ná'ogue najo!
Da lo'ueenec aso María
19Ca na' inoxonñi caso huaaxai so lahoglenaipi chaqai so shipiguiripi queso Faraón, ca' ñi qara'gaxala' ỹo'uet quiyim pilta' so huaxaỹaq caso huaaxai, ca ỹapolec sá'ogue. Qam so Israel llaalqaipi paca'ta aso huaaxai 'ec 'laua rashivijlec. 20Co'na'le, ca' aso qota'a letaxaỹaxaqui leenaxat María, lqaỹa so Aarón, icona aso nasaquinata. Ca' sá'ogue so liỹa 'aallipi coỹaretalec rasoteta chaqai ỹasaquintapigui aso nasaquinata. 21Ca na' ñaq ro'ueenaxantalec so liỹa 'aallipi:
'Ueenaxañii, maqachiñitac ñi qara'gaxala',
ma' ñi'maxare chalego lecaic da lauegaxanaxac
na' iyinñi nqai'en so shipiguiripi qoyintalec.
(15.22-27 'Ue so nanataxat huaxaỹaq, qam chim.)
