So Israel llaalqaipi ỹovita yi Sinaí
1So Israel llaalqaipi ỹovito' yi 'laua qaica qom, leenaxat Sinaí, co'na' ỹovite' tres shiriguiri quiyim queeta chicqota'ñi yi Egipto. 2Co'na' ime ca'e yi Refidim, ca ỹovito' yi 'laua qaica qom, leenaxat Sinaí. Ca na'ño' yi leseeque'ta aso qa' ladocai. 3Hua'ño'yi na'le, ca' so Moisés quishi'megue aso qa' ladocai, ca' neuañiguit ñi qota'olec. Ma' ñi qara'gaxala' noỹaxañi'ño' na'le cadá'maq qa' ladocai, ca 'naaco':
—'Xachitem dajo ỹa'qaatec na llaalqaipi so Jacob, da liỹa leenaxat Israel: 4“Qamiri huañichigui dá'maq shine'tegue na'le so Egipto laseripi, chaqai dá'maq shine'teguelo qamiri na' ñauegalo qamiri ná'maq senta'ñi, 'ec quiyim ñiitalgoto caua laua' ca o'ic. 5Ca no'm qamiri na'xaỹaxanchiua' quená'ogue, chaqai pacqajñichigui dá'maq qana'maqataxac, ca sapacqajnauec quiyim qamiri ỹalamaxarete' quená'ogue na liỹa qomyipi quena 'laua, ma' ná'ogue na 'laua ỹalamaxaret. 6Ca' qamiri 'ñiitari' ma'le ca qomyipi netaxaỹaxanqajanqaipi quiyim qaretaxaỹa'pegue' aỹim quena ỹoreta'oguit qomyipi. Chaqai 'ñiitari' ma'le ca qomyipi qaỹoỹoota'oga, ca qoỹaanot aỹim.” Ca' dá'ogue dajo 'xachi'o' ma'le quena Israel llaalqaipi.
7Ca' eec so Moisés, ca roỹaxana so qo'xoiquipi queso qomyipi, ca' ỹa'xatem dá'ogue dá'maq qohinapego' quiñi qara'gaxala'. 8Co'na'le, ca' sá'ogue so Israel llaalqaipi 'naaco':
—Cá'ogue cá'maq 'naac ñi qara'gaxala', ca so'ueetaq.
Ca' so Moisés ỹodou'a ñi qara'gaxala' dá'maq 'naaco' so qomyipi. 9Ca' ñi qara'gaxala' 'naaco' queso Moisés:
—Ỹim ñachaxan ma'le quiyim seloqota'guit aqami', seuetaugui so lapo naueguelec, qaiyi ỹauanchigui na qomyipi quiyim setaqata'pegue' qami', ca' qaiyi se neme quiyim huejlec qami'.
Ca' so Moisés lotqai liỹa ỹa'xato' dá'maq 'naac so qomyipi quiñi qara'gaxala'. 10Ca' ñi qara'gaxala' 'naaco' na'le queso'maxare:
—Mo'e', 'maxachiriñi yi qomyipi nagui chaqai nete'e quiyim imaqachin aỹim ma'le. Ca' quiỹo' naua loho, 11chaqai chaqa'ma' na'maxatetañi, ma' ỹim nete'e liỹa, ca' ñinojñi, yinotec cada qa' leenaxat Sinaí, ỹim na'gaxala', iuanchigui ma'le aỹim yá'ogue yi qomyipi. 12Ca qaỹa'ue na netanec quenaua lahil añi qa' ladocai, qaiyi na qomyipi se napacalec. Chaqai 'ñirapego' quiyim se napacqachin cañi qa' ladocai, chaqai sqai quishi'megue, chaqai se nqo'neu'alo naua lahil. Ma' cá'maq nqo'neuo cañi'maxare, ca' ileu nqohin. 13Qam qaica ca ỹashil-lec. Ta'ta'a quiyim qaỹalauat, qaỹodoota'a na qa', loqo'm qaỹahinta quena novic; 'eno'm ca qom, loqo'm ca isecỹac se qanca'laxatetauec. Na qomyipi ishit quiyim taashi'megue ma' ime quiyim 'xaỹaque ca lelamaxa aca npe'te qagreta loua' lasote.
14Ca' so Moisés renotec caso qa' ladocai, ca 'naapega so qomyipi quiyim na'maxajñi, ca imaqachin ñi qara'gaxala'. Ca' so qomyipi ỹaatqajam quiỹoote' naua loho. 15Ca 'naaco' so Moisés:
—Na'maxachitaño', qaiyi co'teete' qamiri ma' nete'e liỹa. Chaqai sqaico' ca nanoiquiñiguit aca loua.
16Ca na' richiguiñi na' ỹovirerec saua dos na'xata', ca' 'ue na nqai'legaxa chaqai ana soxonaxa, chaqai so naueguelec lapo hueetalec aso qa' ladocai. Chaqai ỹaatqajam chalego lelamaxa na npe'tellipi. Ca i'loxolqachit quena lqolonaxa sá'ogue só'maq neetaugui na lauo' na'daañoqui'. 17Co'na'le, ca' so Moisés ỹauegue'oguiyi so qomyipi quena lauo' na'daañoqui', qaiyi nauane'e' ñi qota'olec. Ca' so qomyipi nahiquinchiguiñi ada qa' ladocai. 18Ca' nichiitapeguec ada qa' ladocai leenaxat Sinaí, ma' ñi qara'gaxala' hueetalec aso'maxare, hueetaugui so lavinñi so norec. 'Ec nqatelaxanaxaqui, ca chicqotapougui so nesalaxaripi. Ca sá'ogue asó'maq qa' ladocai ỹaatqajam i'loxoltac. 19Chaqai nqo'neetauec na lelamaxa ana npe'te. Ca co'quena' retaqa so Moisés, ca' ñi qota'olec saat, qam na lauel 'ec soxonaxa.
20Ca' ñi qara'gaxala' nqo'ñi'ña na lo'lo ada qa' ladocai Sinaí. Ca 'naapega so Moisés quiyim nqo'ñishi'ma yi'maxare. Ca' so Moisés nqo'ñishiguim. 21Ca' ñi qara'gaxala' 'naaco' queso'maxare:
—Renochirec, ca' 'ñirapega na qomyipi se napacalec yí'maq netanec, chaqai quiyim se ỹahotaque iuañiua'. ¡'Neeto' 'xoic ca ileu ma'le! 22Chaqai vire'ta na letaxaỹaxanqajnec na qomyipi qai'neeta quiyim nqo'neuo caỹim. Qam 'au nco'taxateta, ¡'neeto' 'ue ca ñopoxoỹaxajñi quena'maxare!
23Ca' so Moisés 'naaco' quiñi qara'gaxala':
—Na qomyipi sqai huapigui lauel quiyim quishi'megue anajo qa' ladocai, leenaxat Sinaí, ma' qami' vite naua laloqote' cá'maq se qaishit.
24Qam ñi qara'gaxala' 'naaco' queso Moisés:
—Mo'e', nochirec. Ca ma' rapillirishiguim, ca riỹa'isaco' ñi Aarón. Qam na netaxaỹaxanqajanqaipi chaqai na qomyipi, ca' se napacalec na netanec quiyim naashi'ma ná'maq senta'ñi. ¡'Neeto' 'ue ca ñopoxoỹaxajñi quena'maxare!
25Ca' renotec so Moisés, ca lotqai liỹa 'naac dajo queso Israel llaalqaipi.
