(21.1-17 Nelaataxanaxaquipi quiyim qaỹa'maxate'tegue na qomyipi.)
Da napaxaguinataxac quecá'maq se ỹa'paqachin ca liỹa
18Ca' ñi qota'olec 'naaco':
—No'm 'ue ca co'uaq, ca no'm 'ue ca ỹale coñirqachit ca liỹa, ỹoda'a ca qa', loqo'm ỹahote'e nashitaxañi, ca' 'vii caua na'xata' illaañi, qam se ileu, 19ca cá'maq coñirqachit, ca' qaica nqohin ca lasauaxaset. Ta'ta'a no'm cá'maq coñiraxaic nenoxonec, qam ỹahote'e aca lashilete, ca cá'maq coñirqataxan ishiueten cá'maq natarenataxac chaqai cauá'maq na'xata' na'laxaterañi.
20Chaqai no'm 'ue ca ỹouaxan ca la'ac loqo'm aca la'a, ỹodoota'a ca qo'paq, ca' ỹalauat, ca' qaỹa'ue ca nouaxanaxaset. 21Qam no'm queugui ca na'xa'a loqo'm 'vii caua na'xata' nca'leetauec, ca' sqaica ca lasauaxaset, ma' lalamaxaret cá'maq la'ac.
22Ca no'm nco'ỹata' caua ỹale', ca no'm ilamqara'a aca 'aalo 'manaxai, ca nachi'ñigui, qam sqaica nqai'negue da nachaalataxac, ca cá'maq lasauaxaset, ca' ishiueten acá'maq roỹaxanaque cá'maq loua, quecá'maq 'neeta'gue cá'maq ỹoiquenac na leloxoỹaxac na nasauaxaset. 23Qam no'm acá'maq 'aalo sham tot qaica ca la'maqa' ileuetac, ca' qaỹalauat cá'maq rasauaqataxan. 24Ca cá'maq ỹachipiaxachigui aca nqote ca liỹa, ca ca'maxare qanaqat aca nqote, loqo'm aca loue, loqo'm ca lqai'laxat, loqo'm ca lapia', 25loqo'm ca ỹavigaxat ca liỹa, loqo'm ca coñirqachit ca liỹa, loqo'm ca ỹouaxan ca liỹa, ca cá'maq 'ne'tegue ca liỹa, ca' chaqaida qohine'tegue.
26Chaqai no'm 'ue ca ỹouaxañigui aca nqote ca la'ac loqo'm aca la'a, ca' qotesaq nqai'en, ca ca'maxare ỹaxanec ca'maxare ñiguit quiyim qotesaq nqai'en. 27Chaqai no'm nac nqai'en aca loue, ca' qai'neeta ỹaxanec, ca' chi laseue' quiyim nac aca loue nqai'en.
(21.28-32 Dá'maq 'neeta'gue quiyim cochiỹa cá'maq 'ue ca lalamaxaret louenec.)
Dá'maq 'neeta ca ỹasauaxat ca liỹa
33Chaqai no'm 'ue ca 'ue aca li'ỹa loqo'm ỹo'uet aca li'ỹa, qam se ỹapo'ñigui, ca no'm 'ue ca ilamqa'ñigui ñii'lola loqo'm ca 'ashin, 34ca cá'maq lo'ueenata cajo ni'ỹa, ca ca'maxare ishiueten cá'maq lalo cajo isecỹac quiyim ỹasauaxat. Qam no'ueeno'ot ca'maxare cá'maq isecỹac ileu.
35Chaqai no'm 'ue ca ñii'lola ỹotogoq ca liỹa nauegaxanaxala', ca' ileu, ca' qaimen cá'maq ralauataxan. Ca acá'maq laseuete, ca qaneuagaxachigui chaqai ná'maq la'at cá'maq ileu ñii'lola. 36Qam no'm qaỹa'den quiyim cá'maq ñii'lola chaqai'en lanatec togoxosoxonaxai, qam cá'maq na'co' chaqai ỹaxantac, ca cá'maq ileu ỹa'ue cá'maq laseue' quecá'maq chi lalo nca'leetauec. Ca cá'maq ileu, ca' chaqa taỹot.
