Qai'taxajñi da 'maqataxac
1Ca ñi qara'gaxala' 'naaco' queso Moisés:
—'Irishi'megue ada qa' ladocai leenaxat Sinaí, riỹa'isashiguim yaua Aarón, Nadab, chaqai ñi Abiú, chaqai co' setenta qo'xoiquipi quena Israel llaalqaipi. Naguiipegue' ná'maq senta'ñi, qam ỹoxauc ca viita'ñi, ca' 'yiiñii naua re'cootallii. 2Ca' qaqamite', qami' Moisés, nqo'ñira'a ma'le aỹim, ca' naua riỹachi' se nqo'nero, chaqai ná'maq qomyipi riỹahitac.
3Ca' so Moisés eec, ca' ỹa'xato' quesá'ogue so qomyipi dá'maq qohinapego' quiñi qara'gaxala'. Ca sá'ogue 'naaco':
—¡So'ueetaq ma'le cá'ogue cá'maq 'naac ñi qara'gaxala'!
4Ca' so Moisés ỹiriño' dá'ogue dá'maq qohinapego' quiñi qara'gaxala'. Ca' queso liỹa na'xa'a na' nete'etam, ca no'teetashiguim. Ca' no'xonshiguim aso lcopatoxonaxalate, ỹane'tot aso qa' ladocai. Ca ỹanda'anyi saua doce qari ỹocanchiguilo nqai'en sauá'maq doce llaalqa so Israel. 5Ime, ca' ỹa'vii saua ilate' ne'naqa quena Israel llaalqaipi quiyim ỹalauate' ca ñii'lola, ca ỹavigaxat, ca' lachitaxanataxanaxat, ca' ỹaanot ñi qara'gaxala', qaiyi pilot ñi'maxare. 6Ime, ca' so Moisés ỹacona so leuoripi, ca' ỹocorigui so lahiripi; chaqai so lahi, ca iñitaxajlec aso ncopatoxonaxalate. 7Ca co'na' ime, ca ỹacona aso lere hueetalec da 'maqataxac, ca' retaqalec, 'qaatac nqai'en sá'ogue so qomyipi. Ca' so qomyipi 'naaco':
—Cá'ogue cá'maq 'naac ñi qara'gaxala', ca ña'xaỹaxanqa'ta, ca' so'ueetaq.
8Co'na' ime, ca' so Moisés ỹaconalo' saua leuo', ca iñitaxajlec sá'ogue so qomyipi. Ca 'naaco':
—Nauajo leuo' chaqainaua nauá'maq i'taxachiñi quiyim ñi qara'gaxala' mashic na'maxajto qamiri, quiichiguilo nqai'ne' naua'que nauajo la'qaatqa.
9Ime, ca' so Moisés taashi'megue aso qa' ladocai, liỹaresashiguim saua Aarón, Nadab, Abiú chaqai so setenta qo'xoiquipi queso Israel llaalqaipi. 10Ca' quiyi, ca iuanto' só'naq qota'olec queso Israel. Quecá'maq co'ueeta'ñi, ca' 'ue ca co'ueetalec qashilec 'ec na qa' leenaxat zafiro, chaqai richaañi 'ec na piguim. 11Ca' ñi qota'olec qaico' ca 'negue na'le queso qomyipi nca'acseripi queso Israel llaalqaipi. Ca' so'maxare iuana ñi qota'olec, ca' na'le, ca' so qomyipi que'e chaqai ne'et.
So Moisés na' hueetashi'megue aso qa' ladocai Sinaí
12Ca' ñi qara'gaxala' 'naaco' queso Moisés:
—Quirishi'megue ana qa' nqo'ñirishi'ma na seueta'ñi. Ca ma'le, ca' nauaañira'piguit aỹim, ma' ỹim saañiraxaroma ma'le caua dos qari mashic seretalgoto queda ỹaqataxac chaqai da ilaataxanaxac, qaiyi paxaguiñi' na Israel llaalqaipi.
13Ime, ca' ne'laxashiguim so Moisés, ca taashi'megue aso qa', taashi'ma yí'maq neeta'ñi ñi qota'olec, liỹaatac so lotaua Josué. 14Ca' queso qo'xoiquipi, ca 'naaco':
—Nauaañiỹa'piguita qomi' quenajo, toco' ma' yapilaq. Najo hueeso'o' daua Aarón chaqai da Hur ro'viiñiỹa'guita. Ca no'm 'ue ca 'ue ca qalaneguelec, ca 'naapegalo daua'maxare.
15Ca co'na' ime 'naac dajo so Moisés, ca' taashi'megue aso qa' ladocai. Qam aso qa' ladocai ỹaatqajam pojlec queso naueguelec. 16Ca' da lauaq ñi qara'gaxala' hueetalec aso qa' ladocai leenaxat Sinaí. Ca ỹovirerauec saua seis na'xata' pootalec aso qa' queso naueguelec. Ca' queso liỹa na'xa'a, ca' ñi qara'gaxala' roỹaxano' so Moisés 'maqatougui so naueguelec. 17Ca na' re'oq da lauaq ñi qara'gaxala', ca' so Israel llaalqaipi iuana, qam 'ec norec ravicqataxan cana roto adá'maq qa' ladocai. 18Ca' so Moisés inoxonougui so naueguelec, ca quishiguim cada qa' ladocai. Ca' hueetaugui quesaua cuarenta na'xata' chaqai saua cuarenta piri.
