Éxodo 32

₁Ca' so Israel llaalqaipi co'na' retan quiyim qaua' rapilñi so Moisés caso hueetalec qa' ladocai, ca lapoỹo'ot so Aarón, ca 'naaco':

—'Viichi' ca qarashiilec, ca' chaqaica cá'maq qolaxalec ma'le. Ma' qomi' se sa'deenaq cá'maq 'neeto' ca Moisés cá'maq naqata'alo qomi' quiyi Egipto.

₂Ca' so Aarón 'naaco':

—Naqachii' naua lishite 'oro naua rouarii, chaqai naua qachaalaxahi, chaqai naua qachaallii. Ca' nodoiuo quenajo.

₃Ca sá'ogue naqat ana lishite 'oro, ca' qaỹodou'a so Aarón. ₄Ca so'maxare icoñiguit. Ca icaxajta' so 'oro, ca' inaxañigui aso no'ueetaxaqui, ca' chicqochigui nqai'en so huaqui llaalec. Co'na'le, ca sá'ogue 'naaco':

—¡Qamiri Israel llaalqaipi, najo ná'maq rashiilliguii ná'maq naqata'alo qamiri na'le quiyi Egipto!

₅Ca co'na' so Aarón iuana dajo, ca' no'xonshiguim aso lcopatoxonaxalate. Ime, ca ỹaualaq, netenegue da la'qaatec, 'naaco':

—¡Ma' nete'e so'ueetqo' ca qaremaqachic, ca' semaqachinaq ñi qara'gaxala'!

₆Ca na' nete'etam queso liỹa na'xa'a, ca qaỹodouo na iseripi quiyim qaỹavigaxat, qaỹa'ue nachitaxanataxanaxat, ca qaỹopilot ñi'maxare. Ca na' ime, ca sá'ogue so qomyipi nqa'xanñi, ca' que'e chaqai ne'et. Ime, ca ne'laxashiguim, ca rishiguiỹata'.

₁₅Ca co'na'le, ca' so Moisés rapilñi caso hueetalec quemaralec qa' ladocai, ne'xatete' saua dos qari naneretalgoto da nelaataxanaxaquipi. Saua'maxare qoỹeretalgoto naua'que naua lahil. ₁₆Qam chaqaiñi ñi qota'olec lo'ueenatqa saua qari, chaqai chaqaiñi ñi'maxare lerqa sauá'maq hueetalgoto saua'maxare.

₁₇Ca co'na' so Josué 'xaỹaco' so laualaxac so qomyipi, ca 'naaco' queso Moisés:

—'Ec laualaxac na qom quena' lauataq dá'maq sa'qaataque quiyi co'matqa'.

₁₈Qam so Moisés 'naaco':

—Dá'maq sa'qaataque se no'ueenec quiyim netoon rauegaxan, chaqai se no'ueenec quiyim rachicota 'ue ca noxonec, 'eco' ỹoqa'a no'ueenec dá'maq sa'qaataque.

₁₉Ca co'na' so Moisés paguec sqoỹoqaque nqai'en so co'matqa', ca iuane'ta so huaqui llaalec chaqai ca rasotaxaripi, ca' ỹaatqajam ro'o. Ca nenaqaiño' saua lo'qoota'alo qari, ca ropoqoguilo nqai'ne' quena lahi aso quemaralec qa' ladocai. ₂₀Ca co'na'le, ca' icona so huaqui llaalec, ca' inaxañigui ca norec. Ime, ca' ỹopoxoỹaxachigui, ramoqota nqai'en. Ca na' ramoqota, ca' icona, ca inaxañigui ca huaxaỹaq. Ca na' ime, ca' ni'chigui nqai'en so Israel llaalqaipi ca huaxaỹaq. ₂₁Ime, ca 'naaco' queso Aarón:

—¿Nega'ỹo' cá'maq 'ne'tegue qami' najo qomyipi? ¿Chi'neco' ma' ỹo'uet nqai'ñi' da chalego lecaic lasauaxaset?

₂₂Ca' so Aarón 'naaco':

—Qami' ỹa'gaxala', totaxan 'o'iriua'. Qami' 'yiiñite' najo qomyipi ỹaatqajam nqo'ta ỹo'uet da se no'uen. ₂₃Na'maxare 'naapiguiỹa': 'Viichi' ca qarashiilec, qaiyi qara'gaxala', ma' se sa'deenaq negue' cá'maq 'neeto' ca Moisés cá'maq naqata'alo qomi' quiyi Egipto. ₂₄Ca' ỹim shinac na'le: Quecá'maq 'ue ca hueeto'ot 'oro, ca' ỹoỹootec. Ca na'maxare nañan ca 'oro, ca' ỹim senaxañigui ca norec, ¡ca chicqochigui na'le ñi huaqui llaalec!

₂₅Ca co'na' so Moisés iuana so qomyipi quiyim qaica ca nollaañi, chaqai 'ue da lichic quiyim chi ne'naxat quena npa'guenaxauaripi, ma' so Aarón tot ishit quepaxat. ₂₆Co'na'le, ca' nachajñi, hueetougui ñi ñigo queso co'matqa'. Ca 'naaco':

—Ná'ogue ná'maq ñaqai queetalec ñi qara'gaxala', ca nacpegue' aỹim.

Ca sá'ogue so llaalqaipi so Leví lapoouo queso'maxare. ₂₇Co'na'le, ca 'naaco' so Moisés:

—Ñi qara'gaxala', ñí'maq qota'olec quena Israel llaalqaipi, 'naacsa': Quiñi 'óna icona cá'maq chi lecat, ca pilliu'ga na co'matqa', ca' quiitaguilo naua lasomi', ca chi nalauachiỹata'. Quiñi 'óna ỹalauat ca lqaỹa, nauochaxaua chaqai ca lauora.

₂₈Ca so Leví llaalqaipi ipaquichigui nqai'en da 'naac so Moisés. Ca quesojo na'xa'a tres mil so ỹalliripi ileu. ₂₉Co'na'le, ca 'naaco' so Moisés:

—Ca' nagui, ca' qoỹanaguilo qamiri quiyim qamiri letaxaỹaxanqajanqa na qomyipi quiyim qaretaxaỹa'pegue' ñi qara'gaxala'. Ma' quiñi 'óna npa'guene'e' ca llaalec chaqai quena liỹa queca chi lqaỹa. Ca' vichiguiño' nagui, ca' ñi qara'gaxala' no'ueenaxat nagui ca qayicyaxaguii.

₃₀Ca' queso liỹa na'xa'a, ca' so Moisés 'naaco' queso qomyipi:

—Qamiri ỹaatqajam chalego lecaic da rasauaxashichii. Ca' vichiguiño' nagui, ca saashi'ma ñi qara'gaxala', sha'apiguito' seshit quiyim ỹapalaxat da rasauaxashichii.

₃₁Ca' so Moisés pilshi'ma yi neeta'ñi ñi qara'gaxala'. Ca 'naaco':

—Yi qomyipi ỹaatqajam chalego lecaic da lasauaxaset na' ỹo'uet so lashiilec 'oro. ₃₂Ca' ñi'xoresene'tot qami' nagui quiyim palaxachi' da lasauaxaset. Qam no'm sqai palaxachi', ca ¡'maxaraic palaxachi' ca ỹeenaxat mashic 'chiriñi caso nilliri'i'!

₃₃Qam ñi qara'gaxala' 'naaco':

—Cá'maq 'ue ca lasauaxaset caỹim, qaicaata sapalaxat cayi ñilere. ₃₄Ca' qami' qui', viquita na qomyipi yí'maq shiquetapi'ñi. Ca' so ilaatec piguim le'ec ỹashaxantac qami' ma'le. Ca ma' noviro ca na'xa'a quiyim sa'ue ca nouaxanaxaset, ca ỹim sa'ue ma'le ca nouaxanaxaset cá'maq 'ue ca lasauaxaset.

₃₅Ca' ñi qara'gaxala' ỹa'ue so nelata ne'ne' so qomyipi sauaxat nqouagaxainot só'maq huaqui llaalec só'maq lo'ueenatec so Aarón.