Éxodo 8

—Mo'e', quirepegue' ñi Faraón. Ma' vichira'a, ca 'ñiraco': 'Neetasa' da la'qaatec ñi qara'gaxala': 'Xañirec quiyim eec na qomyipi ỹalamaxaret, qaiyi nqouagaxainot aỹim. ₂Ma' no'm sqai 'xañirec na qomyipi quiyim eec, ca' ỹim ño'xataxajlec ná'ogue na na'laua'e' cana piyiloxoloxo. ₃Ana lachiugue ỹaatqajam 'ec ni'ỹam ma'le cana piyiloxoloxo. Ime, ca' chicqochiguiñigui aso lachiugue, ca' ta'oga yi ra'aachi'. Ca inoxonougui ỹovirau'a yi relaqsoqochi' quiyi romalachi', chaqai na la'a' na rotaua'e'ipi, chaqai quena liỹa qauochi' laseripi, chaqai na nqatelaxanaxaqui, chaqai na naqaulatqa' na pan. ₄Ma'le, ca' renojlec qami' ana piyiloxoloxo, chaqai na rotaua'e'ipi, chaqai ná'ogue na qauochi' laseripi.

₅Ca' ñi qara'gaxala' 'naaco' queso Moisés:

—'Ñirapega ca Aarón quiyim ỹachaxanshiguim aca lashilete, quelec nqai'en na lachiuguellipi, ñaachipi, chaqai qai'imipi, qaiyi chicqochiguiñigui ma'le ana piyiloxoloxo, nenoxonshiguim, ca' taalec ná'ogue na 'laua Egipto.

₆Ca' so Aarón quelec nqai'en sá'ogue so huaxaỹaq quiyi Egipto. Ca chicqañigui ana piyiloxoloxo, ca' no'xalec yá'ogue yi 'laua. ₇Qam so 'viiquiaxairipi qai'neeta 'ne'tegue dajo queda lo'viiquiaxac. Ca no'xalec yi 'laua Egipto cana piyiloxoloxo. ₈Co'na'le, ca so Faraón roỹaxane'ogalo' saua Moisés chaqai so Aarón, ca 'naaco':

—Nqouagaxaiñiỹot ñi ra'gaxalari qota'olec, qaiyi naqat caỹim chaqai quena iuo' laseripi ana piyiloxoloxo. Ca saxanec ma'le na qauori quiyim ỹo'uet aca lachitaxanataxanqate, ca ỹaanot ñi'maxare.

₉Ca' so Moisés 'naaco' queso Faraón:

—Hua', nagui 'ñirapiguiỹa' lagui vi'saque quiyim sashiilaxanlec qami', chaqai na rotaua'e'ipi, chaqai na qauochi', qaiyi eec ana piyiloxoloxo quena ra'aachi' chaqai quena rotaua'e'ipi, ca' qanaata ana lachiugue hueetañigui.

₁₀—Ma' nete'e —'naaco' so Faraón.

Ca 'naaco' so Moisés:

—Ca' chaqaida 'neeta ma'le, qaiyi 'yiiñi' quiyim qaica 'nejem ñi qara'gaxala' qota'olec. ₁₁Ca' ana piyiloxoloxo ca'e ma'le ñi qauochi', ca' qanaata ana lachiugue hueetañigui. Ca' tot novira'a qami', na rotaua'e'ipi chaqai na qauochi' laseripi.

₁₂Ca' so Moisés chaqai so Aarón inoxondec quiñi lauo' so Faraón. Ca na' ime, ca' so Moisés ỹashiila ñi qara'gaxala' quiyim loỹoote'oga ana piyiloxoloxo quiyi la'a' so Faraón. ₁₃Ca' ñi qara'gaxala' ỹo'uet cá'maq rashiilaxantaque so Moisés. Ca ileu aná'maq piyiloxoloxo hueeta'ñi ca la'a', nasoxoc chaqai quena no'ueenaxa. ₁₄Ca na qomyipi lapoon ana piyiloxoloxo leuaxai, ỹahota'ahi naua lapoonqa, ỹomaxata' na lahita se no'uen. ₁₅Qam qaiyiita so Faraón, na' no'ueenlec quedajo, ca lotqai se ỹaqamaq chaqai se na'xaỹaxanalo saua Moisés chaqai so Aarón. Ca ipaquichigui dá'maq 'naaco' na'le ñi qara'gaxala'.

₁₆Ca' ñi qara'gaxala' 'naaco' queso Moisés:

—'Ñirapega ñi Aarón ỹacona ayi lashilete, ca ỹouaxanñigui na lamoxoỹaxa na 'laua, qaiyi ñigui ra'gaxan, ca no'xalec ná'ogue na 'laua Egipto.

₁₇Ca' chaqaida 'neetetegue. Ca' so Aarón nanojshiguim aso lashilete, ca ỹouaxanñigui na lamoxoỹaxa na 'laua quiyi Egipto. Ca' ñigui ra'gaxan, ca se lo'daxat na qomyipi chaqai na iseripi. ₁₈Ca' so 'viiquiaxairipi qai'neeta ỹahotaque ro'ueenataxana da lo'viiquiaxac quiyim ỹo'uet na ra'gaxan, qam se ishit ỹo'uet. Ca' na ra'gaxan queetalec quiyim sqai ỹaxanac na qomyipi chaqai na iseripi. ₁₉Co'na'le, ca' so 'viiquiaxairipi 'naaco' queso Faraón:

—Chaqaiñi ñi qota'olec ñí'maq ỹo'ueetetac dá'ogue dajo.

Qam so Faraón qaiyiita se ỹaqamaq chaqai se na'xaỹaxan, ma' chaqaida 'naaco' na'le ñi qara'gaxala'.

₂₀Ca' ñi qara'gaxala' 'naaco' queso Moisés:

—Ñi Faraón o'teetaxasom nete'e caso lachiugue. Ca' qami' ma' na'xa'atac, ca' qui', ca 'ñirapega: 'Eda da 'naac ñi qara'gaxala': 'Xañirec na ỹalamqateripi, qaiyi nqouagaxainot aỹim. ₂₁Ma' no'm sqai 'xañirec quiyim eec na ỹalamqateripi, ca' ñilata qami' ma'le aca qogo, chaqai na rotaua'e'ipi, chaqai na qauochi' laseripi, chaqai quiñi qauochi' 'imec. Chaqai ná'ogue na lauo' na Egipto laseripi no'xagui ma'le cana qogo, chaqai vire'ta na 'laua. ₂₂Ca ma' ỹovirelec quiyim ipaquichigui dajo, ca soỹoote'oga ma'le yi 'laua Gosén yí'maq neetalec yi ỹalamqateripi. Ca quiyi'maxare qaca aca 'oonole qogo ma'le, qaiyi qami' 'yiiñi' quiyim ỹim na'gaxala' seuetalec najo 'laua. ₂₃Ca' ỹim soỹoote'oga ma'le na chi ỹalamaxareteripi quená'maq chi qauochi' laseripi. Ca' nete'e ỹovirelec nqaishin dajo.

₂₄Ca' chaqaida 'ne'tegue so qara'gaxala'. Ca' novi' aso ỹaatqajam 'xoic qogo. Ca' taugui ñi lauo' lodegaxat so Faraón, chaqai naua la'aate' so lotauaripi, chaqai yá'ogue yi 'laua Egipto. Ca ma' paguelec ana qogo, ca ná'ogue ná'maq huaalec yi 'laua na'axat.

₂₅Co'na'le, ca' so Faraón roỹaxane'ogalo saua Moisés chaqai so Aarón. Ca 'naaco':

—Mohi, quiipegue' ca qota'olec. Vigaxachii aca rachitaxanataxanqachii, ca 'ỹaañiỹot. Qam sqo quiỹa'e najo 'laua.

₂₆Ca' so Moisés 'naaco':

—'E', se ỹa'maxañi quiyim shinqa'tegue dajo. Ma' ná'maq iseripi saanqot ñi qara'gaxala' qota'olec coqomi' 'ue da lichic, ma' quena Egipto laseripi lashiilec na'maxare. Ca no'm na Egipto laseripi iuanchigui quiyim savigaxataq ca 'óna quena iseripi nqouagaxaintacot na'maxare, caalata'm qaralauat, qarenaq quena qa'. ₂₇Qam qomi' sahoqotaque quiyim qolaqpegue' yi 'laua qaica qom. Yi'maxare sovitaxa quecaua tres na'xata' qolqata. Ca' ma' sovitaxa, ca' savigaxataq aca qarachitaxanataxanqate, ca saanqot ñi qara'gaxala' qota'olec, qaiyi ipaquichigui nqaishinaq dá'maq la'qaatec ñi'maxare.

₂₈Co'na'le, ca 'naaco' so Faraón:

—Hua', ỹim saxanterec qamiri quiyim quiipegue' yi 'laua qaica qom, qaiyi vigaxachii aca rachitaxanataxanqachii, ca 'ỹaañiỹot ñi ra'gaxalari qota'olec. Qam 'neeto' paguec qoỹoqo'teguelo qamiri quenajo, chaqai nqouagaxaiñitalec aỹim qai'neeta.

₂₉Ca' so Moisés 'naaco':

—Ca ma' ỹim shique'e najo, ca' nete'e chaqa'ma' sashiila ñi qara'gaxala' quiyim ỹoỹoote'oga ana qogo caqami', chaqai quena rotaua'e'ipi, chaqai quena qauochi' laseripi, qam no'm sqai queeta qarayiñi'sac chaqai quepaqchi'sac na llaalqaipi so Israel quiyim eec ỹavigaxat aca lachitaxanataxanqate, ca' ỹaanot ñi qara'gaxala'.

₃₀Ca co'na' inoxonec so Moisés quiñi lauo' so Faraón, ca nqouagaxainot ñi qara'gaxala'. ₃₁Ca' ñi qara'gaxala' ỹo'uet dá'maq rashiilaxantaque so Moisés. Ca' aso qogo ca'e so Faraón, chaqai queso lotauaripi, chaqai queso lauo' laseripi. ₃₂Qam so Faraón lotqai ỹa'ñaxat añi le'taxanata. Ca' sqai ỹaxanec quiyim eec so Israel llaalqaipi.