Ezequiel 2

₁Ime, ca' sa'xaỹaque so nivillaxac 'naac caỹim: Qami' ỹale, nachaachiriñi, ca' sa'ue da shinac caqami'.

₂Ca na' sa'xaỹa so na'qaatec, ca' inoxonaugui aỹim so lquesaxanaxa ñi qota'olec, ca' yachaalataxanñi. Ca' sa'xaỹaque so na'qaatec 'neetapiguiỹa', ₃ca' ñaqai queeta 'naac: Qami' ỹale, selachita na llaalqaipi so Israel ná'maq ỹaatqajam se na'xaỹaxan chaqai npa'guene'e' aỹim. Na'maxare chaqai so 'auaxaic leta'allipi npa'guene'e' aỹim, chi ỹovireta'a najo na'xa'a. ₄Chaqai na llaalqaipi se nouoogoñi chaqai se na'xaỹaxan. Ca' ỹim selata qami', qaiyi 'ñirapega: Ñi qara'gaxala' 'naac dajo. ₅Ca no'm qana'xaỹaxana qami' loqo'm se qana'xaỹaxañiraxaua', ma' yi qomyipi npa'guenaxai, qam ỹa'den ma'le quiyim 'ue na itaxaỹaxaqui ỹalequetaugui yi'maxare. ₆Qami' ỹale, totaxan ro'chita yi'maxare chaqai cá'maq 'naac caqami', 'eno'm 'ec vi'sañigui ca leesat loqo'm 'ec vi'sañigui ca pa'lotoxoiquipi. Totaxan ro'chita cá'maq 'naac yi'maxare caqami' chaqai quiyim na'axachigui na lashic, 'eno'm chalego re'qoota da lauel caqami', qam se ro'daxachirec. ₇Qami' 'ñirapega dá'maq shinac, no'm na'xaỹaxan loqo'm se na'xaỹaxan, ma' ỹaatqajam npa'guenaxairipi yi'maxare. ₈Ỹaatqajam pacqajñichirigui da ỹa'qaatec, 'neeto' lotqai se na'xaỹaxañi' 'ñiite' yi qomyipi. Huachirigui na qadapi', ca 'qui' ná'maq saanem qami'.

₉Ca na'le, ca seuane'ta so nqai'laxat 'ue so nañaanto'ot aỹim, ca so'maxare 'ue so nerec lepatetalec. ₁₀Ca' so nqai'laxat huachigui nqai'en sa'ajantac. Ca' naua'que naua lahil 'ue na lerqaipi: hueetalec na ỹenaxac, chaqai na naualaxac quena nqui'ic, chaqai na na'xalenataxanaxac.