Ezequiel 36

₁₆Ñi qara'gaxala' novita ỹim, ca 'naapiguiỹa': ₁₇Ma' ỹovita quiyim neetalec yi na'laua na Israel llaalqaipi, iualaxain quedá'maq se no'uen ỹo'ueetetac. Dá'maq no'ueenataxac caỹim napio'o chaqai yaqaica'a. ₁₈Ca na'le, ca' senaxalec da iuel yi'maxare queda lalauataxanaxac ỹo'uet quenajo 'laua chaqai dá'maq 'neetari' quiyim iualaxaintac, nqouagaxaintacot na nashiilec nqolaquipi. ₁₉Chaqai dá'maq nouaxanaxaset ná'maq se no'uen ỹo'ueetetac, chicqochigui quiyim seuagaxajlec na liỹa 'laua quena ỹoreta'oguit qomyipi quena 'laua. ₂₀Qam quená'ogue ná'maq na'aateripi quená'maq ỹovira'a yi'maxare, ỹo'maqajantac da co'teeta ỹeenaxat, ma' na qomyipi 'naiquen: Najo ná'maq lalamaxaret ñi na'gaxala' qota'olec, qam ca'o' na'le yi na'laua. ₂₁Ca na'le, ca' ỹaatqajam 'xoic da iueetaxanaxa na' seuana quiyim qaiualaxaintac da co'teeta ỹeenaxat sauaxat yi Israel quecanchaqaica quena qomyipi ỹovirera'a saua'maxare.

₂₂Vichiguiño' 'ñirapega yi qomyipi quiyi Israel: Dajo 'naac ñi qara'gaxala': Dá'maq ỹim so'uet sqa 'iỹapegueu'a qamiri llaalqaipi so Israel, ta'ta'a quiyim sahotaque liỹa qaimaqachin dá'maq co'teeta ỹeenaxat, quiyim 'maqajñiỹac qamiri quená'maq qomyipi viriu'a qamiri. ₂₃Ỹim ñachaxana na ỹoreta'oguit qomyipi queda chalego lecaic lco'taxa da ỹeenaxat dá'maq qamiri hualaxaiñitac quena'maxare. Ca ma' ỹim so'uet, ca yi'maxare ỹa'den quiyim ỹim ná'maq ỹim na'gaxala'. Ỹim na'gaxala', se'taxajñi dajo. ₂₄Ỹim ñaqata'alo qamiri ma'le quená'ogue na qomyipi quenaua 'lauari; llapoonta' qamiri, ca yapilaxate' qamiri quena na'lauahi. ₂₅Sco'taxate' qamiri quená'maq no'uen huaxaỹaq, ñquiỹouec ná'ogue na rishillii, ñaqata'a ma'le dá'maq 'ñiitari' quena nashiilec nqolaquipi; ₂₆sanauguilo qamiri ma'le aca dalaxai re'taxanatahi chaqai ca dalaxaic no'ueenataxaguii. Ñaqat caqamiri añi re'taxanatahi 'ec ca qa', ca' sanauguilo qamiri aca re'taxanatahi nañaanta. ₂₇Chaqai sanauguilo qamiri da ño'ueenataxac, ca' so'uet quiyim pacqajñichiguilo naua ỹapaxaguinataxanaxaco chaqai naua ỹaqataxaco; ₂₈ca' ñiitalec ma'le najo 'laua saanem na'le so 'auaxaic qataa'illipi, ca' qamiri ỹalamaxarete' ma'le chaqai ỹim qota'olec caqamiri. ₂₉Ñaqata'alo qamiri ma'le quená'ogue ná'maq rapio'xochii. Ca' so'uet quiyim 'xoic ma'le ca na'ic trigo, ca' tot ỹovitalo qamiri nqaishin ca nqopaaxa. ₃₀Chaqai qai'neeta so'uet quiyim ana qo'paq quena no'ueenaxa nqo'neuec ana la, qaiyi tot liỹa quiyim 'ue quet ca rayiloxohi quena liỹa qomyipi sauaxat da rqopaaxahi. ₃₁Chaqai noma' o'lliinchi'te dá'maq se no'uen 'ñiitari' chaqai da se no'uen ro'ueenataxanaxaguii, ca chaqai qamiri 'ue ma'le ca rayiloxohi sauaxat dá'maq rasauaxashichii chaqai dá'maq se no'uen 'viichitac. ₃₂Ỹim na'gaxala', se'taxajñi da ỹa'qaatec. Ca' dajo 'yiiñita, qamiri llaalqaipi so Israel, quiyim ỹim se so'uet dajo quiyim qamiri 'viichitac ca lo'yaxanec, ta'ta'a quiyim nayiloxoñii chaqai 'miitajlec quedá'maq no'ueenataxaguii.