Ezequiel 47

₁Na' ime, ca' so ỹale yopilaxata ñi ñigo quiñi no'ueenaxanaxaqui. Ca seuane'ta quiyim ñi lasom chicqotapi'ñot na huaxaỹaq, taata'pegue da lqodoigue quedá'maq reloqota'gue ñi no'ueenaxanaxaqui. Ca' na huaxaỹaq pa'aata'gue da loic ñi no'ueenaxanaxaqui, pa'aata'gue da 'guiñi cada ncopatoxonaxalate. ₂Na' ime, ca' yinoxonaxatec quiyi na'laua ñi no'ueenaxanaxaqui quiñi lasom pa'a'gue da rapiguim, ca' naqaletenlec nqai'en aỹim spa'aatauec, chi sovireta'a ñi ñigo pa'aauec reloqota'gue da lqodoigue. Ca' 'ue so cocho'qui' huaxaỹaq ne'paxantauec, pa'aata'gue da 'guiñi quiñi ñigo. ₃Ca' so ỹale inoxonec, ta'tegue da lqodoigue, lo'qoota'a so laloqojnaxanaxat, ca naloqochin so quinientos metros, ca' sapacta nqai'en so huaxaỹaq ne'paxantauec; ca' so huaxaỹaq taachiguilo naua ỹataavi'. ₄Ime, ca' lotqai naloqochin so liỹa quinientos metros, ca' sapacta nqai'en so huaxaỹaq, ca' so huaxaỹaq taachiguilo naua i'cootal. Ca lotqai liỹa naloqochin so liỹa quinientos metros. Ime, ca' lotqai sapacta nqai'en aỹim so huaxaỹaq. Ca' so huaxaỹaq naque'tegue na isot. ₅Ca' naloqochin so quinientos metros liỹa, ca so huaxaỹaq mashic ñigui lachiugue. Ca' tot seshit sapacta, ma' ñigui lachiugue qoỹoqochi'ñigui. Ca' qaidaata quiyim qaỹo'xonta'ta, ca' qaigueme qaishit qaỹapacta. ₆Ca na'le, ca 'naapiguiỹa': Ỹaatqajam na'ijñitetegue dá'maq huañita.

Ime, ca' yopilaxategue da lahi aso lachiugue, ₇ca 'xoic ana seuana qo'paq quenaua'que naua lahil. ₈Ca na'le, ca 'naac caỹim: Najo huaxaỹaq queeta, taỹa'gue da lqodoigue, ca ỹoviraxaso'ma aso lachiugue Jordán, ca necoñiguit aso huaaxai qaỹamata'gue huaaxai leuaxai. Ca ma' ỹoviraxaso'ma aso'maxare, ca' yi huaxaỹaq caso'maxare ñigui lo'daxaraic. ₉Chaqai canchaqaica ỹovitegue najo huaxaỹaq, ca' ishit nca'leuec ná'ogue nanchaqaina isecỹac chaqai 'xoic na nallin. Ma' na huaxaỹaq canajo lachiugue cá'maq hua'ñi ca huaxaỹaq chim, qam ñigui lo'daxaraic nqai'en, chaqai nca'leuec ma'le ná'ogue nanchaqaina. ₁₀Chicqochi'ñi yi Engadí, ỹovira'a yi En-eglaim, 'ue ma'le ca noqoinaxanaripi, ca' chaqaiyi hua'ñi ma'le, ca' ỹashiviaxat na laleguec. Ca' yi, hua'ñi na ỹaatqajam 'xoic chaqai ỹaleque'ejta' nallin, 'nejem aso huaaxai hueetegueñigui ana delec. ₁₁Qam quenaua lahil quenaua nishaaqate', ca' qaica ca lo'daxaraic huaxaỹaq; ca' yi hua'ñi ma'le na huaxaỹaq nochaua, ca' quena'maxare, ca ỹa'maqachiguiñi quiyim qanaqata'a na 'ue. ₁₂Ca' quenaua lahil aso lachiugue, ca' ñaxat ana ỹoreta'oguit qo'paq 'ue ana la. Chaqai se ỹauanapega quiyim 'ue aca najñi laue, chaqai se ỹauanapega quiyim qaica quet ca la. Quena' ỹovirec yi shiraigo, ca' lotqai 'ue ana la, ma' ỹaquiteta'ñot quena huaxaỹaq chicqau'a ñi no'ueenaxanaxaqui. Ana la ỹa'maqachiguiñi qaỹa'ic, chaqai ana laue, ca' qanatarena.