Na'maxajta' quiyim qaỹo'uet so no'ueenaxanaxac
1Ca na' ime'ueque saua seis shiriguiri, ca' so llaalqaipi so Israel neetalgoto nauá'maq chi na'lauari, ca' sá'ogue quepegue' yi Jerusalén, lapoỹata'. 2Co'na'le, ca' so Josué, llaalec so Josadac, chaqai so liỹaripi netaxaỹaxanqajanqaipi, chaqai so Zorobabel, llaalec so Salatiel, chaqai so lauo' laseripi, eec, ca' no'xonshiguim aso ncopatoxonaxalate quiñi qota'olec quiyi Israel, qaiyi qarcopatoxonlec aso'maxare quiyim qaỹo'uet dá'maq relaataxanlec na'le so Moisés só'maq nale ñi qota'olec. 3Ca' qano'xonshiguim aso ncopatoxonaxalate ỹaatqajam qaỹa'maxachichiguiñi, ma' no'cha'a so qomyipi neetalec yi 'laua. Ca' quiyi nete'eta chaqai yi avit qaỹo'uet ana nachitaxanataxanqate quiyim qanqouagaxainot ñi qara'gaxala'. 4Chaqai qai'neeta qaỹo'uet so nemaqachic quiyim qoyinauguilo naua 'imqolqai' na'derañi, qaiyi qaipacqajanchiguilo naua naqataxaco naneresañi. Ca naua'que naua na'xata' qaỹavigaxatetac na nachitaxanataxanqateripi, qam qaỹaỹajanta cá'maq laloxoqui yi na'xa'a. 5Ca qai'neeta qaỹo'uet ná'maq nachitaxanataxanqateripi, chaqai quena' ỹovirec yi shiraigo, chaqai ná'maq taỹaugui cá'maq na'xa'a quiyim qaimaqachin ñi qara'gaxala', chaqai aná'maq chicqauec chi nachitaxanataxanqate quiyim qoỹaanot ñi qara'gaxala'. 6Ca chicqochi'ñi nqohin yi 'auaxaic na'xa'a quena' ime'ueque yaua seis shiriguiri, ca' qaỹo'uet na nachitaxanataxanaxat qaỹavigaxat, ca' qoỹaanot ñi qara'gaxala', 'eno'm saqa' qano'xonshiguim aso no'ueenaxanaxaqui quiñi qara'gaxala'. 7Ime, ca' qaishiueten so 'imec lo'ollipi chaqai so qomyipi ichaqapigui na qo'paq, chaqai qaỹa'ue na loq, ne'taxat, chaqai ne'aceite so qomyipi na'gue da Tiro chaqai da Sidón, qaiyi ỹachigoxota'ñi yi Líbano na qo'paq cedro, quiñigui nqai'en aso huaaxai, ca' taita'a nqai'en yi na'a' Jope, ma' chaqaido' dá'maq 'naaco' na'le so nashi quiyi Persia.
So qomyipi taañi quiyim no'xonshiguim aso no'ueenaxanaxaqui
8Ca' so Zorobabel só'maq llaalec so Salatiel, chaqai so Josué só'maq llaalec so Josadac, chaqai so nauegaxauaripi netaxaỹaxanqajanqaipi chaqai so lotauaripi só'maq llaalqaipi so Leví, chaqai sá'ogue so na'aquipi na'le rapila yi Jerusalén, taañi quiyim liỹa no'xonshiguim ñi no'ueenaxanaxaqui quiñi qota'olec queso co'uaataxanaxaic shiraigo queso liỹa ñaaxa na' ỹovi' quiyi Jerusalén, ca' ra'ilec nqohin da no'ueenataxanaxac só'maq llaalqaipi so Leví, qanca'au'a ná'maq napacalgoto yaua veinte ñaxari. 9Ca' so Josué chaqai so llaalqaipi chaqai lqaỹaripi lapooguit so Cadmiel chaqai so llaalqaipi só'maq chigoxougui so Judá, chaqai so chigoxougui llaalqaipi chaqai lqaỹaripi so Henadad chigoxougui na llaalqaipi so Leví, qaipataxalec quiyim idaanlec so no'ueenataxanyipi quiyim qaỹo'uet ñi no'ueenaxanaxaqui quiñi qota'olec.
10Ca só'maq 'imec lo'ollipi co'na' chita'gue inaxañi so lo'xonaxala' so 'imec lauo' ñi qota'olec, ca' saua netaxaỹaxanqajanqa no'ueetete' nachaachiñi lo'qoota'alo saua lpe'tel. Ca' so Leví llaalqaipi chigoxougui so Asaf lo'qoota'a na latoinec ma' ỹahotaque imaqachin ñi qara'gaxala', ma' chaqaida 'naaco' na'le so David só'maq nashi quiyi Israel. 11Ca' queso qomyipi 'uo' quen na ro'ueenaxantac, chaqai 'uo' quen na ỹa'ue da lopilaxaset, 'naaco' quen:
—'Ỹaañiỹot da na'aachicyaxaguii ñi qota'olec, ma' ñi'maxare ỹaatqajam huagaxaraic, chaqai da lqo'iichi quena llaalqaipi so Israel sqaica lqodoc.
Chaqai sá'ogue so qomyipi ỹaualqatagui queda netoonaxac chaqai imaqachintac ñi qota'olec, ma' mashic liỹa qano'xonshiguim ñi qouagaxainaxaqui quiñi qota'olec. 12Ca' 'xoic so netaxaỹaxanqajanqaipi quena' qaretaxaỹa'pegue' ñi qota'olec chaqai so lotauaripi chigoxougui so Leví, só'maq mashic qo'xoiquipi só'maq iuano' na'le so 'auaxaic no'ueenaxanaxaqui, ỹaatqajam noỹen naualqategueñi queda netoonaxac, ma' ỹauanchigui quiyim liỹa qano'xonshiguim so dalaxaic no'ueenaxanaxaqui. Chaqai 'uo' na liỹaripi mashic ỹaualqatagui queda netoonaxac. 13Ca' mashic tot qaỹaataxagui quena naualaxaquipi chaqai na ỹenaxaquipi quena qomyipi, ca' mashic ỹapaguelec na naualaxac. Ca quena' qoỹoqo'ta, ca' qara'qaataque na naỹaac.
