1Ca co'na'le, ca' so nashi Darío relaataxanlec quiyim qaidaanaque queso lerellipi quesó'maq hueetalec ná'ogue ná'maq qaỹo'uet quiyi Babilonia. 2Ca hua'ñi so 'imec lodegaxat quiyi na'a' Ecbatana, huaugui yi 'laua Media, ca co'na' qaỹanata aso lere hueetalec dá'maq 'deenaxaco' na'le, 'neetasa':
3Queso 'auaxaic ñaaxa na' nashi so Ciro, ca' ỹaan da la'qaatec 'neetasa':
Aca no'ueenaxanaxaqui quiñi qota'olec quiyi Jerusalén qaỹa'yiñi ca lo'xonaxala', ca' qano'xonshiguim cajo 'imec, qaiyi hua'ñi ca'maxare, ca' qaỹavigaxat ca nachitaxanataxanaxat. Ca ca'maxare ỹovi' veintisiete metros da lishicshi'megue, chaqai veintisiete metros da leca'gue; 4chaqai tres llico nqohin ca qaỹo'xoñiñi quena ỹaatqajam leta'al qari, chaqai 'oonoqui' nqohin ca qaipa'xanashiguim quena qo'paq dalaxaicolec. Ca' qarishiuetenaxana ma'le ana ỹam. 5Ca ná'maq nouenqaipi chicqaugui na 'oro chaqai na plata quená'maq lalamaxareteripi ñi lauo' ñi qota'olec, quená'maq icona na'le so Nabucodonosor quiñi no'ueenaxanaxaqui quiyi Jerusalén, ca ỹoda'a yi Babilonia, ca qaỹopilaxat, ca qaỹodo'gue da Jerusalén, ca' qoỹanaugui ñi no'ueenaxanaxaqui quiñi qota'olec quecá'maq chaqai'en na'ñi.
6Ca co'na'le, ca' so nashi Darío ỹaanec da la'qaatec queso Tatnai só'maq lotaua neloxoỹaq quiyi 'laua pa'ỹa'gue na lauashiguim caso lachiugue Eufrates, chaqai Setar-boznai chaqai so liỹa nashillipi quiyi 'laua. 'Naaco':
Le'neetari', 'xañitac na Jerusalén, 7chaqai 'xañitac cá'maq nashi reloqota'a na judioipi chaqai ná'maq la'gaxalateripi quiyim idaanlec quiyim liỹa qano'xonshiguim ca no'ueenaxanaxaqui quiñi qota'olec quiyí'maq chaqai'en na'ñi. 8Ca' chaqaida da 'neeta da ỹotaanaxanaxac quena la'gaxala' na judioipi, qaiyi liỹa no'xonshiguim aca no'ueenaxanaxaqui quiñi qota'olec: Ca quedá'maq nishiuetenaxac quiyim qaishiueten, qarishiuetenaxana ná'maq iconta'piguit ná'maq reloqota'a yi 'laua pa'ỹa'gue da lauashiguim caso lachiugue Eufrates, ỹaatqajam ipaquichigui nqohin qaila' qarishiuetenaxana quiyim qaishiueten da no'ueenataxanaxac, qaiyi sqai qaca'guit da no'ueenataxanaxac. 9Chaqai naua'que naua na'xata' qoỹaanem cá'maq ỹouentaque na netaxaỹaxanqajanqaipi quena' retaxaỹa'pegue' ñi qota'olec na'ñi yi Jerusalén, quecá'maq ỹouen quená'ogue na huaqui llaalec, loqo'm ca qagreta loua', qagreta llaalec quiyim ỹavigaxat, ca' ỹaanot ñi qota'olec neeto'ot na piguim, loqo'm na trigo, 'ue, loqo'm lataxa loqo'm ca aceite, 10qaiyi na'maxare ỹavigaxat na lachitaxanataxanaxat, ca' ỹaanot ñi qota'olec neeto'ot na piguim quiyim qaỹa'maxarenta. Chaqai nqouagaxaintalec aỹim chaqai na ỹaalqaipi.
11Chaqai saanec da ỹa'qaatec quiyim no'm 'ue ca se na'xaỹaxana, ca' qanaqat ca qo'paq lodegaxat queca lauo', ca' qainaxaguit na lo'lo ca'maxare, chaqai ca lauo' qanopoxoỹaxajñi. 12¡Chaqai ñí'maq qota'olec ñí'maq lca'acsec na'le na Jerusalén quiyim hueeta'ñi da leenaxat, ñi'maxare ishit quiyim nopoxoỹaxajñi canchaqaica nashi, loqo'm ca qomyipi, loqo'm cá'maq se ỹa'maxata'gue ná'maq lo'ueenaxanaxaqui ñi qara'gaxala' na'ñi yi Jerusalén! Ỹim Darío saanec da ỹa'qaatec, ca' dá'ogue qaipacqajanchigui.
Liỹa qoyiguelec qaỹo'uet, ca' qaỹomat añi no'ueenaxanaxaqui
13Ca co'na'le, ca' so Tatnai só'maq nashi quiyi 'laua pa'ỹa'gue na lauashiguim caso lachiugue Eufrates, chaqai so Setar-boznai, chaqai so nauegaxauaripi, ỹaatqajam ipacqajanchirigui dá'maq la'qaatec so nashi Darío. 14Ca' quedajo, ca' so la'gaxalateripi so judioipi lotqai quelec quiyim no'xonshiguim aso no'ueenaxanaxaqui, ipaquichigui nqohin dá'maq la'qaatec so letaxaỹaxaquiripi ñi qota'olec, so Hageo chaqai so Zacarías só'maq llaalec so Ido. Ca' qaỹomat añi no'ueenaxanaxaqui, ipaquichigui nqohin dá'maq la'qaatec ñi qota'olec queso llaalqaipi so Israel, chaqai dá'maq 'naac so Ciro, Darío chaqai so Artajerjes, nashil quiyi Persia. 15Ca' ỹaatqajam imeeta aso no'ueenaxanaxaqui cana' quesaua tres na'xata' queso shiraigo leenaxat Adar, na' ỹovite' seis ñaxari quiyim neetaho nashi so Darío quiyi Persia.
16Ca' so llaalqaipi so Israel, só'maq netaxaỹaxanqajanqaipi chaqai so lotauaripi chigoxougui so Leví, sá'ogue na'aquipi na'le, ỹaatqajam 'xoic da netoonaxac na' qoỹaanot aso no'ueenaxanaxaqui ñi qota'olec. 17Ca' quesojo na'xa'a, ca' cien na huaqui llaalec qoỹaano quiyim qaỹavigaxat, doscientos na qagreta loua', chaqai cuatrocientos na qagreta llaalec, chaqai saua doce queta' quiñi 'óna taỹaugui ca 'óna ni'ic queso llaalqaipi so Israel, 'óna ñi lachitaxanataxanaxat queca 'óna ni'ic quena lasauaxaseteripi sá'ogue so llaalqaipi so Israel. 18Ime, ca' qanaloqojnec quenaua laloqote' quiyim ro'ueenataxan na netaxaỹaxanqajanqaipi chaqai na lotauaripi quena llaalqaipi so Leví, chaqai ipaquichigui dá'maq leloxoỹaxac dá'maq nqouagaxainaxac quiyi la'a' ñi qota'olec na'ñi yi Jerusalén. Ca' ỹaatqajam ipaquichigui nqohin naua nerqa naneresañi caso nelere so Moisés.
(6.19-22 Lapoỹata' so qomyipi ỹo'uet so lemaqachic na' ime so no'ueenaxanaxaqui.)
