Ñi qota'olec roỹaxana so Abram
1'Uo' so na'xa'a, ca 'naaco' ñi qara'gaxala' queso Abram: Lachi' na na'laua'e' chaqai na qauochi' laseripi chaqai na la'a' ñi qataa'i', ca' quirepegue' yí'maq 'laua sachaxanem qami' ma'le. 2Ca' queca qachaalaxai'pi, ca' sachigoxochichigui ca ni'ic lodegaxat; chaqai saanem qami' da iqouagaxa, chaqai so'uet quiyim qami' choxoraic ma'le, chaqai chicqochigui qami' ma'le ca la'maxa na liỹaripi. 3Ca' ỹim se'xoren cá'maq re'xoriñi', chaqai se se'xoren cá'maq se re'xoriñi'; chaqai chicqochigui qami' ma'le quiyim yqouaguegue ná'ogue na qomyipi quena 'laua.
4Ca' so Abram ipaquichigui nqai'en dá'maq qohinapega quiñi qara'gaxala'. Ca' ca'e yi 'laua neetalec, ca' quepegue' yi 'laua Canaán na' ỹovite' setenta y cinco niñaxari. 5Ca' liỹaatec aso loua Sarai chaqai so leteesec leenaxat Lot. Chaqai qai'neeta i'xat sá'ogue so louenqaipi chaqai so la'aquipi ỹachigoxota'ñi yi Harán. Ca co'na' ỹovita yi Canaán, 6ca' so Abram ỹapaca'ta yi 'laua chi ỹovireta'ta'a yi Siquem yí'maq na'ñi aso qo'paq qouagaxainaxalate leenaxat encina naalec so More. Ca' ná'maq cananeo laseripi neetalec yijo 'laua na'le. 7Ca' quiyi, ca' ñi qara'gaxala' nachaxano' so'maxare. Ca 'naaco': Najo 'laua ná'maq saanem ma'le na qachaalaxai'pi.
Co'na'le, ca' so Abram no'xonshiguim aso ncopatoxonaxalate, ca nqouagaxainot ñi qara'gaxala', ma' chaqaiyi hua'ño' co'na' qanachaxana. 8Ca co'na' ime, ca' quepegue' so qoỹoqoshi'megue 'laua pa'ỹa'gue da lqodoigue quiyi na'a' leenaxat Betel, ca ỹa'yiño' so la'a' na'daañi. Ca yi na'a' Betel pa'aata'gue da lauashiguim nqai'en so'maxare, chaqai pa'aata'gue nqai'en da lqodoigue yi na'a' Hai. Ca' quiyi, ca' so Abram liỹa no'xonshiguim aso lcopatoxonaxalate, ca' nqouagaxain quiichigui nqai'en da leenaxat ñi qara'gaxala'. 9Ime, ca' eec, nemooteta, nqo'neeta'a yi 'laua Néguev.
So Abram ỹovita yi Egipto
10Ca' quesaua na'xata' ỹaatqajam chalego da lovic na na'ic quesá'ogue so 'laua. Ca' so Abram quepegue' yi Egipto, ca' naalec lecocho'qui', ma' qaica ca qaỹa'ic quiyí'maq neeta'ñi. 11Ca co'na' shim ỹovita yi Egipto, ca' so Abram 'naaco' caso loua Sarai: 'Ajñi', ỹim ỹaatqajam sa'deenta quiyim qami' ỹaatqajam lo'yaxana 'aalo. 12Ca ma' qaiuana qami' quiyi Egipto laseripi, ca 'naac ma'le yi'maxare: Ada 'aalo peeta'a loua ñi ỹale. Ca' qayalauat ma'le, ca' qami' qarca'laxachisauec, ca qaỹacoñiraxaua' ma'le quiyim qami' noua. 13Ca qouaquiric, 'ñiraco' quiyim qami' ỹaqaỹa, qaiyi sqaican qohinegue aỹim, ca' se qayalauat sasougui qami'.
14Ca co'na' so Abram ỹovita yi Egipto, ca' so Egipto laseripi iuana aso Sarai quiyim ỹaatqajam lo'yaxana. 15Qai'neeta qaiuano' queso lotauaripi so Faraón, nashi quiyi Egipto. Qai'neeta qara'qaataxana so Faraón quiyim aso 'aalo ỹaatqajam lo'yaxana. Ca qaỹauega'a yi la'a' so Faraón.
16Ca' chicqochigui aso Sarai quiyim so nashi nqo'ta so Abram. Ca' ỹachit, ỹa'ue lalo qagreta, chaqai ana huaca, chaqai ana nauaanaxanaxa late'e, chaqai so 'ashinyipi, chaqai so la'aquipi 'aallipi chaqai so ỹalliripi. 17Qam so Faraón sougui aso Sarai, ca' ñi qara'gaxala' ỹo'uet so nouaxanaxaset so'maxare chaqai so llaalqaipi, qaỹodota'a so napijna' lodegaxat. 18Ca' so Faraón relaataxane'oga so Abram, ca 'naaco' queso'maxare:
—¿Chi'neco' ma' 'ñitetegue dajo caỹim? ¿Chi'neco' ma' sqai 'ñirac quiyim roua'e' añi 'aalo? 19Ma' qami' 'ñirac quiyim rqaỹa'e' añi'maxare. Vichiguiño' soỹaxane'oga ma' sahotaque quiyim ỹoua. 'Ada ada roua'e'. ¡Viquirec, ca' mo'e', qui'!
20Co'na'le, ca' so Faraón ilate' saua nale' quiyim 'nerapega so Abram quiyim ca'e yi Egipto, liỹaatec nqohin aso loua chaqai sá'ogue so na'aateteripi.
