Aso Agar chaqai so llaalec Ismael
1Aso Sarai se co'o queso loua Abram, qam 'ue aso la'a Egipto lase, aso'maxare leenaxat Agar. 2Ca 'naapego' so loua Abram:
—'Anta, ñi qara'gaxala' se ỹo'uet ca ỹaalec. Qam ñi'xoresene'tot qami' quiyim quirepegue' añi ỹa'a Agar, sha'apiguito' 'ue ma'le ca ỹaalec chicqotougui añi'maxare.
Ca' so Abram saachiguit da la'qaatec aso Sarai. 3Ca só'maq Sarai ỹaanem aso Agar Egipto lase quiyim leloxoỹaxaua queso Abram, co'na' mashic ỹovi' diez ñaxari neesa'ñi yi Canaán. 4Ca' so Abram viguit aso Agar, ca so'maxare 'man. Qam co'na' retan da 'neetari', ca' se nqo'ta quena' ra'ỹo'ot aso na'cooro. 5Ca co'na'le, ca' aso Sarai 'naaco' queso Abram:
—¡Qami' rasauaxashichi' quiyim añi Agar tot nqo'chiiua'! Shaaco' ỹim saanem qami' quiyim roua'e'. Ca' nagui ma' sham 'ue ca llaalec, ca' 'neetapigui lauel quiyim ỹapacauec caỹim. Ca' ñi qara'gaxala' ỹa'xat cá'maq 'ue ca lasauaxaset, ỹim loqo'm qami'.
6Ca' so Abram 'naaco':
—'Anta añi ra'a'e', 'viiquiñi'sac quecá'maq sham 'ñi'sa'gue.
Co'na'le, ca' aso Sarai se ỹa'maxata'gue, ca vire'ta na' aso Agar 'eet. 7Qam so lelaatec ñi qara'gaxala' piguim le'ec iuanejlec quiyi 'laua qaica qom, seeque'ta yi huaxaỹaq ne'paxantashiguim neeta'ñigui so nayic quiyi Shur. 8Ca inato', 'naaco':
—Agar, qami' la'a aca Sarai, ¿negue' ca chicqoira'gue, chaqai negue' ca 'ira'gue?
Ca 'naaco' aso'maxare:
—Seetetapeguem aca ña'cooro Sarai.
9Co'na'le, ca so nelaatec piguim le'ec 'naaco':
—Mo'e', pillita aca na'coro'e', ca cá'maq 'naac, ca' na'xaỹaxañita.
10Chaqai so nelaatec piguim le'ec 'naaco':
Ñqo'naxatec ma'le ca qachaalaxai'pi,
ca' qaica ca ishit naloqochin.
11Ca nagui qami' 'manaxai,
ca 'ue ma'le ca qachaalqui'.
Ca leenaxat nqai'ñi' ma'le Ismael, loqo'm ñi qota'olec 'qaa,
ma' ñi'maxare iuana da re'xoriqui'.
12Ca'maxare ỹaatqajam co'ỹaxaraic ma'le, 'ec ca isecỹac neuec;
ca'maxare reloguiỹe'e' ná'ogue, chaqai ná'ogue reloguiỹe'e' ca'maxare;
qam ca'maxare ỹa'yiñi ca la'a',
'eno'm na lqaỹaripi npa'guene'e'.
13Ca' aso Agar na' ime retaqata'pegue' so nelaatec piguim le'ec, ca ỹanco' Ñi qota'olec ñí'maq reuanaxan, ma' 'naaco': Ñi qota'olec iuañiua', qam ñaq yca'leetauec. 14Ca' vichiguiño' añí'maq ni'ỹa leenaxat: Li'ỹa ñí'maq nca'leetauec chaqai iuañiua'. Ñijo ni'ỹa neetañiguilo yaua na'aate' Cades chaqai yi Bered.
15Ime, ca' aso Agar co'o, ne'qaañi so llaalec so Abram. Ca so'maxare qoỹanegue leenaxat nqohin Ismael. 16So Abram ỹovite' ochenta y seis ñaxari co'na' ne'qaañi so llaalec Ismael.
