Dá'maq 'neeta da lelauaxa chaqai na' qaishinñi aso Sara
1Ca' aso Sara ỹovite' ciento veintisiete ñaxari. 2Ca' ileu quiyi Quiriat-arba, yí'maq nagui na'a' leenaxat Hebrón, huaugui yi 'laua Canaán. Ca' so Abraham noỹen na' ileu aso Sara, ca ỹadenaxachichigui da no'ueenataxac ná'maq 'ue ca lasauaxanec. 3Ime, ca' ca'e yí'maq hueeta'ñi lasouaqa' aso Sara, ca eec 'naapega so hitita laseripi só'maq la'a' yijo 'laua:
4—'Eno'm ỹoqa'a ca sachicqa'gue quiyim salequetauguilo qamiri, qam ỹim sahotaque miiñiỹot aỹim ca 'laua quiyim loma' ayi ỹasauaxana, qaiyi seshinñi ayi ỹoua tot qaca.
5Ca 'naaco' so hitita laseripi:
6—¡Nañaañi' rqouagaxa'e', qami' qara'gaxala', na'xaỹaxañiroxoua'! Qami' lca'acsec ñi qota'olec quiyim lliquisauguilo qomi'. Nca'a'iraque acá'maq paguec no'uen napal lahi' coqomi', ca' shiñiri'ñi aca roua'e', ma' coqomi' qaica quet cá'maq ỹollitapeguem aca lahi'.
7Co'na'le, ca' nachajñi so Abraham, ca' ỹa'dooto naua le'cootal so hitita laseripi. 8Ca 'naaco':
—No'm ỹaatqajam llic quiyim viitaque seshinñi quenajo ayi ỹoua, ca' ñaq qouaguiic shiilaxañilec aỹim queca Efrón, ca llaalec ca Zohar, 9quiyim imeenem aỹim ñi lauac na'ñi yi Macpela yí'maq hueetau'e na lahi yi na'laua. Ca ỹim seshiueten cá'ogue acá'maq laseuete ñi lauac, qaiyi ỹaatqajam ỹalamaxarete aca napal lahi' quenajo.
10Qam ma' só'maq Efrón ỹalequetauguilo saua'maxare, 'naaco' queso Abraham, ca' da la'qaatec qara'qaachigui queso lauo' laseripi chaqai ná'ogue ná'maq naatapegueu'a ca ñigo quiyi na'a':
11—¡Qami' ỹa'gaxala', 'e', qouaquiric! Ỹim chaqai saañiraxarom yijo 'laua chaqai ñi lauac na'ñi yi'maxare. Ca' na iuo' laseripi 'qaachigui quiyim aỹim saañiraxarom. Ca' shiñiriñi aca roua'e' quiyi'maxare.
12Qam so Abraham liỹa ỹa'chi'iñi naua le'cootal queso qomyipi la'a' yi'maxare. 13Ca' 'naaco' queso Efrón qara'qaachigui quesá'ogue so qomyipi:
—¡Qouaquiric na'xaỹaxañiriua' qami'! Ñi'xoresene'tot qami' quiyim coñichiguit aca ishiuetenaxanqate quiyijo 'laua, qaiyi seshinñi ma'le ayi ỹoua.
14Co'na'le, ca' so Efrón 'naaco' queso'maxare:
15—Ñaq na'xaỹaxañiriua', qami' ỹa'gaxala': yijo 'laua ỹovi' quiyim laseuete quet aca cuatrocientos chiróla chicqaugui ana lecat leenaxat plata. Ca' quiyijo lashivichaqa', ca' sqaica quet cá'maq liỹa sa'xataq. Ca' chaqaiyi shiñiri'ñi aca roua'e'.
16Ca' so Abraham ishit ishiueten aca roỹaxanaque so Efrón só'maq hitita le'ec. Ca' iuanchigui sá'ogue so hitita laseripi na' ỹomatauec ishiueten aso laseuete yijo 'laua. 17Ca' chaqaido' da 'neeto' na'le yi na'laua so Efrón hua'ñi yi Macpela pa'a'gue da lqodoigue quiyi Mamre, yijo 'laua liỹa'ogue' so lauac chaqai ná'ogue ana qo'paq pa'aataugui yi'maxare. 18Ca' lalamaxaret so Abraham yi'maxare. Ca' quedajo iuanchigui so hitita laseripi chaqai sá'ogue só'maq inoxontapego quiyi ñigo quiyi na'a'.
19Ca na' ime dajo, ca' so Abraham ishinñi aso Sara quiñi lauac na'ñi yi Macpela. Yi'maxare pa'ỹa'gue da lqodoigue quiyi Mamre. Yi'maxare qaiyiita qaỹa'den quiyim qohinac Hebrón, chaqai huaugui yi 'laua Canaán. 20Ca' quiyi, ca so Abraham ỹaatqajam lalamaxaret yijo 'laua chaqai so lauac huaugui yijo 'laua mashic imen so hitita laseripi quiyim qaỹa'ue loma' na napalyipi.
