So Jacob ỹahotaque nemootauec queso Labán
1Qam so Jacob ỹa'deeno' quiyim so llaalqaipi so Labán 'naaco' quen: Ñi Jacob icona ná'ogue na na'aateteripi ñi qareta'a, ca chaqaina ná'maq resalligui.
2Ca so Jacob ra'ỹo'ot qai'neeta so Labán, ca' ỹoqa'a na lashic, mesqai 'nejem na' ñaqai 'aueta. 3Co'na'le, ca' ñi qara'gaxala' 'naaco' queso Jacob:
—Pillitegue da la'aate' caua qata'alli' yí'maq neeta'ñi yi qauochi' laseripi, ca' ỹim iỹaatac ma'le qami'.
4Ca' so Jacob roỹaxana'a aso Raquel chaqai aso Lea quiyim querepegue' quiyi no'ueenaxa yí'maq neeta'ñi aso lalo qagretaipi. 5Ca 'naapegalo':
—Yitan quiyim ñi qataa'i totqai 'ne'tegue aỹim cá'maq quesom. Qam ñi qota'olec quecá'maq ita'a se yayaxanec sqo ỹoxe'oga. 6Qamiri ỹaatqajam 'yiiñita na' so'ueenataxantacot na qataa'i ỹaatqajam 'ue da iuogoxo. 7Qam ñi'maxare chi yayintac chaqai ỹadalaxat añi ỹauegue. Qam qaiyiita ñi qota'olec sqai ỹaxanegue quiyim ỹo'uet ca se ỹa'maxañi caỹim. 8Ta'ta'a quena' 'naac ñi'maxare: “Ỹim seshiuetenaxana caqami' na iseripi 'ue ana lete,” ca ná'ogue ana'maxare 'ue ana lete na llaalec. Quena' 'naac: “Chi nishivichi'i' aná'maq 'vii naua lachi',” ca ná'ogue na llaalec 'vii naua lachi'. 9Ca' chaqaida dá'maq 'neeta quiyim ñi qota'olec rouootaxana'gue na laloipi, ca' nañaañim.
10Ca' 'uo' so na'xa'a co'na' na iseripi ỹovire'oga quiyim pa'e, ca' 'ue so i'guemataxac. Ca' queso'maxare, ca' seuana na quetaq loua' quena' renojlec ana loua nodaachiguiñi na 'vii naua lachi', chaqai na 'ue ana lete, chaqai teulaxaic. 11Ca' quesojo i'guemataxac, ca' 'ue so qota'olec lelaatec roỹaxañiua' queda ỹeenaxat. Ca' ỹim sasaachiguit, shinac: Aỹim seuete'e najo. 12Ca' so nelaatec 'naapiguiỹa': Ỹaatqajam 'ajñite', ca' huañita ma'le quiyim ná'ogue ná'maq quetaq louaaripi nodaachiguiñi 'ue ana lete chaqai 'vii naua lachi' chaqai teulaxaic, ma' yitan dá'ogue dá'maq 'ne'tegue qami' ñi Labán. 13Ỹim ná'maq ỹim qota'olec nachaxana qami' na'le quiyi Betel. Ca' yí hua'ñi na' cochirelec ca qa' queca aceite, ca' 'ỹaañirec da ra'qaachiqui'. Nagui, ca' raqamqai' ne'laxachirishiguim, oquire'e na ñi'sa'ñi, pillita ca 'laua ne'xaỹoqsoqochi'.
14Co'na'le, ca' aso Raquel chaqai aso Lea 'neraco':
—Qomi' tot qaica quet cá'maq qaỹaqatqajantari' nesallaxa taalgoto qomi' quena la'a' ñi qareta'a. 15Ta'ta'a quiyim qohintoxoric quiyim 'ec ỹora'alo qomi', vire'ta quiyim qaimeene' qomi', nquipijlec dá'maq rishiuetenaxanaxaqui' quiyim o'ñichiguita qomi'. 16Ca' llic quiyim dá'ogue dá'maq lesallaxa ñi qareta'a rouootaxana'gue ñi qota'olec, chaqai qaralamaxaret chaqai naua qochaalqa. Ca' 'viichi' cá'ogue cá'maq 'naac ñi qota'olec caqami'.
So Jacob eec ca'e yi Padan-aram
17-18Ca' so Jacob na'maxajñi, ỹahotaque pilegue da Canaán yí'maq neeta'ñi so leta'a Isaac. Ca' renotqajñishiguim saua llaalqa chaqai saua loua' quesaua nauaanaxanaxa late'el, ca' iconot sá'ogue só'maq lalamaxaret. Ca eec, liỹaatec sá'ogue so na'aateteripi só'maq icoñiguit ỹachigoxotaugui da lo'ueenataxanaxac quiyi Padan-aram. 19Ca co'na' so Labán ñaqai ỹoqa'a da hueeta'gue repetegaxantac caso lalo qagreta, ca' aso Raquel rocachalo' saua lqolaqa so leta'a. 20Ca' chaqaido' dá'maq 'neeta co'na' so Jacob ỹayin so Labán arameo le'ec, se ỹa'ue la'xaỹaxac quiyim eec. 21Ca' nemootauec, liỹaatec sá'ogue so na'aateteripi. Ca chita'gue, ca' ỹapacta aso lachiugue Eufrates. Ca queeta, taỹa'a yi quemaralequipi ladocai na'ñi yi 'laua Galaad.
So Labán ỹocan so Jacob
22Ca co'na' ime'ueque caua tres na'xata', ca' so Labán ỹa'deeno' quiyim so Jacob nemootauec. 23Co'na'le, ca' co'uajlec, liỹaatac so lauo' laseripi. Ca co'na' ỹovite' siete na'xata' queetalec, ca' ỹovi'o' hua'ñi yi quemaralequipi ladocai quiyi Galaad. 24Qam queso pe ñi qota'olec nachaxana so Labán só'maq arameo le'ec queso le'guemataxac. Ca 'naaco':
—Ñaq na'xaỹaxañi', 'neeto' sqai 'maxachira'gue ca 'xachi' ma'le quiñi Jacob.
25Ca' so Labán mashic ỹovi' so Jacob quiyi quemaralequipi ladocai leenaxat Galaad yí'maq hua'ño' na' so Jacob nco'matec. Ca chaqaiyi nco'matqa' qai'neeta so Labán chaqai so lauo' laseripi. 26Co'na'le, ca 'naapego' so Jacob:
—¿Negue' ca 'neeta dá'maq 'viichi'? ¿Chi'negue ma' yayiñi'? ¡Ne'xachi'o' naua ỹaale, 'ñiisa'que caua noxona na'a! 27¿Chi'negue ma' yayiñi', chaqai nemoochirauec nañoxochisañi sqa vite ca ỹa'xaỹaxac? Ma' queta' sa'deenta, ca' ỹim ñpoyicne'te' quet qami', ca' sa'ue ca nemaqachic niviigaxanaxac. Ca' 'ue ca ñitoonaxac, sahote'e ana niviigue chaqai ana nouaxana. 28Vire'ta se ñqo'goxoguita nqai'ñi' naua ỹaale chaqai naua iua'. ¡'Eco' sqaica ca 'yiiñi' quedá'maq 'ñitetegue! 29Ỹim ỹa'maqachiguiñi quet quiyim so'uet ca se ỹa'maxañi caqamiri. Qam squepe netaxaỹa'ña aỹim ñí'maq qota'olec queca qataa'i'. Ca 'naapiguiỹa': Ñaq na'xaỹaxañi', 'neeto' sqai 'maxachira'gue ca 'xachi' ma'le quiñi Jacob. 30Qam quiyim mashic paguelec ca riyaxa'e' quiyim pillita ca la'a' ca qataa'i', ca' vichiguiño' qui', qam ¿chi'negue ma' cuachitalo' caua ỹashiilqa iqolaqa?
31Ca' so Jacob 'naaco' queso Labán:
—Ỹim 'ue da iqolonaxa. Ca' 'neetapigui iuel quiyim huootaxañira'que naua qachaalli'. 32Qam no'm 'ue cá'maq lo'qoota'alo caua rqolaxahi', ¡ca' ileu! Ca naua qouo' laseripi 'qaata'pe: 'Ñirapiguiỹa' quiyim 'ue ca qatooỹaqui' llo'qoota'a, ca' coñita, 'xachi'.
Qam so Jacob se ỹa'den quiyim aso Raquel rocachalo saua nqolaqa.
33Ca' so Labán inoxonougui so lauo' na'daañi so Jacob. Ime, ca' lotqai so lauo' aso Lea chaqai saua lauooto' saua dos nelaata, qam se ỹanatalo caua lqolaqa. Ca co'na' nenoxonec queso lauo' na'daañi aso Lea, ca inoxonougui ca neetaugui aso Raquel. 34Ca aso'maxare iconalo' caua nqolaqa, ca illauguilo saua laualate' caso lañaxalate, ca' icanlgoto saua'maxare. Ca' so Labán imitetapougui sá'ogue so lauo' na'daañi, qam se ỹanatalo saua lqolaqa. 35Co'na'le, ca 'naaco' aso Raquel:
—Qami' ita'a, totaxan o'iriua' quiyim se ñi'laxashiguim, qam ma' ỹim la'aaxai, vichiguiño'.
Ca ma' so Labán imitetapigui caua lqolaqa, qam se ỹanatalo. 36Ca' so Jacob ro'o' na'le, ca 'naaco' queso Labán:
—¿Negue' cá'maq ỹo'maxaset? ¿Negue' cá'maq ỹasauaxaset, ma' ỹaatqajam yocañi'sac? 37Chaqai ¿negue' cá'maq huañiterelec quecá'maq rovinqui' chicqa'ñi ca ra'aachi'? Lli'ra'ñi najo ná'maq seloxoiqata'ñi quenaua qauochi' lase' chaqai nauá'maq ỹalamaxarete', ca naua'maxare ỹa'xate' cá'maq ỹaatqajam llic ca ỹa'xat coqomi'. 38Quesá'ogue so veinte ñaxaripi so'ueenataxantacot qami', qaca aca nachi'ñigui cana qalo'e' qagreta chaqai ana quetaq. Chaqai se ỹauanapega 'ue ca sa'ic qagreta llaalec cana qalo'e'. 39Chaqai se ỹauanapega ñodouo aca qalo'e' quiyim neto. Ta'ta'a quiyim seshiueten aca na'laañi. No'm na'xa'a loqo'm pe qarocachigui ana qalo'e', ca o'laxañitegue caỹim. 40Quiyi na'xa'a yalauat quen na npa'ỹaaxa, chaqai quiyi pe yalauat quen na no'oomaxa. ¡Vire'ta quena' sqaica ca ilaxac! 41Veinte ñaxari senta'ñi yi ra'aachi', ca nauajo nauá'maq sovirau'alo: so'ueenataxantac catorce ñaxari sahinteguelgoto naua dos qachaalli'; ca' quena qalo'e', ca' seis ñaxari so'ueenataxantacot aqami'; qam chita'gue quen lotqai dalaxachi' aca ñishiuete. 42Quetqai sqai sento'oto' ñi qota'olec queca Abraham, ñi qota'olec ñí'maq nqouagaxaintacot ñi ita'a Isaac, ca' peeta'a sqaca quet aca nañaañi' queta' yilachirec. Qam ñi qota'olec iuana da ỹachicoxo chaqai dá'maq ñigui da ỹo'ueenataxanaxac. Ca' squepe, ca retaxaỹa'a qami'.
Jacob chaqai so Labán 'ue da na'deenaxague'
43Co'na'le, ca 'naaco' so Labán queso Jacob:
—Naua rouachi' ỹaatqajam ỹalamaxarete ỹaale, chaqai na llaalqaipi chi iuaripi, chaqai na qagretaipi chi iloipi. Ca ná'ogue najo 'ajñi'sac ná'ogue ỹalamaxaret. Qam ¿negue' cá'maq shinta'que quet nagui naua ỹaale chaqai ná'maq llaalqaipi naua'maxare? 44Vichiguiño' na'itquena qami', sahoqe ca qana'maqataxac cá'maq i'taxajñi quiyim shi'gue ña'maxataxata'.
45Co'na'le, ca' so Jacob icono' so qa', ca' nachaalataxanñi. 46Ca 'naapegalo' saua lauo' lase':
—¡Lapoonaxañii quena qa'!
Ca sá'ogue rapoonaxan quena qa', ca' ỹa'ue lapoonec. Ca' qui'ỹe' quiyi hua'ñi so napoonec qaripi. 47Ca' so Labán ỹanco' yi'maxare quenaua chi la'qaatqa arameo la'qaatqa Jegar-Sahaduta, loqo'm napoonec no'leentaxat, chaqai so Jacob ỹanegue quenauá'maq chi la'qaatqa hebreo la'qaatqa Galaad, loqo'm napoonec no'leentaxat. 48Co'na'le, ca' so Labán 'naaco':
—Nagui najo napoonec qa' i'taxajñi dá'maq qana'deenaxac.
Ca' vichiguiño' yijo qoỹanegue leenaxat Galaad, 49chaqai qai'neeta leenaxato' nqohin Mizpa, loqo'm 'ue ñi qara'ajantac. Ma' so Labán 'naaco':
—Ñi qara'gaxala' reloqota'alo qomi', 'eno'm tot liỹa ñiuanaqta'. 50No'm sqa 'maxachira'que naua ỹaale nauá'maq rouachi', loqo'm vite caua liỹa' 'aalo rouachi' quenaua'maxare, 'eno'm qaica ca ỹauanchiguilo qomi', qam ñi qota'olec chaqaiñi ñí'maq ỹauanchiguilo qomi'.
51Ca' so Labán ñaqai queetalec dá'maq 'neetapega so Jacob:
—'Ajñi', 'ena ná'maq napoonec qa', chaqai yí'maq qa' salamaxajñi hueetañiguilo qomi'. 52Ca' chaqaida dá'maq i'taxajñi coqomi'. Ca' qami' chaqaỹim se seshitaq ñapacqalec quiyim ca 'óna ỹo'uet ca se no'uen queca liỹa. 53Ca' chaqai ỹoiquena'pe qomi' ñí'maq qota'olec quesó'maq qapichi' Abraham chaqai so ỹapi' Nacor.
Co'na'le, ca' so Jacob nallitalta' ỹaanot da la'qaatec ñi qota'olec queso leta'a Isaac, ñí'maq nqouagaxaintacot. 54Ime, ca' ỹo'uet so lachitaxanataxanaxat ỹavigaxat huaalec nqai'en ada quemaralec ladocai. Ca' roỹaxana ca lauo' laseripi quiyim que'e. Ca' sá'ogue que'e chaqai la'qaañi queso pe hueetalec aso quemaralec ladocai.
55Ca na' richiguiñi, ca' so Labán ne'laxashiguim, ca' qo'goxe' saua laua' chaqai saua llaale. Ime, ca' ỹaanem da nqouagaxa, ca' pilegue dá'maq chi la'a'.
