Qaỹa'ue lovi' da ne'naxac aso Dina
1Ca' aso Dina asó'maq llaale so Jacob caso Lea eec, ỹouou'a so nequetegaxaipi na'ñi yi'maxare. 2Qam so llaalec so Hamor só'maq nashi heveo le'ec, leenaxat Siquem, iuane'ta aso'maxare. Ca' quepegue', 'eno'm se nasen, qam qaiyiita lapa'ñi', ca' chi iualaxain. 3Qam ỹaatqajam nqo'neuec da lqo'iichi, ca' 'ue da liyaxa quiyim ipaca'guit aso'maxare, ma' nqo'ta. 4Co'na'le, ca retaxaỹa'pegue' so leta'a Hamor. Ca 'naaco':
—Shiilaxañitegue añi nequetegaxai, sahotaque quiyim ỹoua añi'maxare.
5Qam so Jacob mashic ỹa'den quiyim so Siquem chaqai iualaxain aso llaale Dina. Qam qaica ca ỹa'xat, ma' saua llaalqa ñaqai hueesa'oga so no'ueenaxa, reloqosa'a na laloipi. Ca' nauaanta'a quiyim novirero saua'maxare. 6Qam so Hamor, só'maq leta'a so Siquem, quepegue' so Jacob quiyim retaxaỹa'pegue' so'maxare.
7Ca co'na' novirero saua llaalqa so Jacob, chicqorauec queda no'ueenaxa. Ca co'na' ỹa'deene' dajo, ca' chalego lauele', ma' chalego lecaic dá'maq ne'naxac so llaalqaipi so Israel, ma' so Siquem chaqai ỹoiquentac quiyim lapa'ñi' aso llaale. ¡Dajo qaica ma' 'ue quet ca ishit 'ne'tegue! 8Qam so Hamor retaxaỹa'pegueto' saua'maxare, ca 'naaco':
—Ñi ỹaalec Siquem ỹaatqajam nqo'ta añi rqaỹahi. Ca' qouaguiic, 'xañiỹac quiyim loua añi'maxare. 9Ca' qaiyi qomi' neuo' lase', qaiyi seshitaq so'naxaguit na qachaalli'ipi chaqai qamiri shichii o'ñiiguit na qochaallipi. 10Ca' chaqai ñiita'ñi najo, qamiri qouora'. Chaqai cá'maq sham 'ñiita'gue na qara'a' quiyim ñiitalec. Nimiiñitac, chaqai shiujnaxañiỹaque ca na'lauahi.
11Ca' so Siquem 'naaco' queso leta'a chaqai quesaua lqaỹa' aso Dina:
—'Ue da ipagaxallic, ca ni'xoresentouguilo qamiri quiyim coñiguit aỹim. Ca cá'maq ỹaxañiỹaque, ca' ỹim sa'ue. 12'Eno'chaqai paguec lecaic aca ỹaxañiỹaque, chaqai 'xoic ca ỹame, qam qaiyiita saan ma'le. Qam 'xañiỹac quiyim so'ñiguit ada nequetegaxai.
13Qam quiyim so Siquem chi iualaxain aso Dina, ca saua llaalqa so Jacob saachichiguito' saua'maxare, qam ỹayine'. 14Ca 'neraco':
—Se seshitaq saanqaem añi qarqaỹa cá'maq sqaica ca netanec na loshicmaxa. Ma' no'm shinqa'tegue dajo, ca pa'ỹo'oto qomi' ca qarayiloxo. 15Qaidaata sa'maxarenqata, no'm qamiri shichii quiyim 'ñiitari' qomi'. Ca' dajo 'neetasa': Quiyim qamiri 'viichii ca netanec na loshicmaxa ná'ogue na ỹalliripi caqamiri. 16Ca' ma'le maqsa', ca' qamiri shichii o'ñiiguita naua qochaale chaqai qomi' seshitaq so'naxaguita naua qachaallii. Ca' senqauguilo qamiri. Ca ma'le, ca' ỹaatqajam qom neuo' lase'. 17Qam no'm sqa 'maxariñii dá'maq shinqac quiyim 'viichii ca netanec na roshicmaxahi, ca' qomi' qolqa'e najo, ca' se'xataq añi qarqaỹa.
18So Hamor chaqai so llaalec Siquem ỹa'maxarente' dá'maq qohinac. 19Ca' so Siquem qaica ca nauaanaque, chaqa'ma' naỹacot qaỹo'uet so netanec na loshicmaxa, ma' paguec da lqo'iichi caso llaale so Jacob. Ca ma' so Siquem qaỹapacqajnauec quiyí'maq la'a' so leta'a, 20ca' so'maxare chaqai so leta'a Hamor que', querepegue' ñi lasom ñigo quiyi na'a' yí'maq hua'ño' quena' 'ue da qaretaxaỹapigui. Ca' yí hua'ño' na' retaxaira'pegue' so qomyipi la'aayaxauaripi, 'neraco':
21—Yijo ỹalliripi chi qanauochaxauaripi. Ca yi'maxare nagui qouoraripi nauguilo qomi' chaqai qanemeenaxauaripi, ma' ỹaatqajam 'xoic lecaguiñi na 'laua quena senqata'ñi. Ca' qomi' seshitaq so'naxaguit na llaallipi yi'maxare, chaqai yi'maxare ishit o'ñiguit na qochaallipi. 22Qam quiyim ỹaatqajam qom neuo' laseripi, ca' yi'maxare ỹahotaque so'ueetaq dá'maq ỹahotaque 'neetasa': quiyim ná'ogue na ỹalliripi qaỹo'uet na netanec na loshicmaxa, 'nejem dá'maq no'ueenataxac yi'maxare. 23Qaiyi ná'ogue na louenqaipi chaqai na na'aateteripi qaralamaxaret. Ca' qaidaata ỹouentaque quiyim sasaataq, ca' yaua'maxare chaqa'ma' nauguilo qomi' qouora'.
24Ca ná'ogue na ne'naqaipi quená'maq mashic sham taho nouaataxanaq ỹa'maxarenta dá'maq 'nerac saua Hamor chaqai so Siquem. Ca' sá'ogue so'maxare qaỹa'ue na netanec na loshicmaxa. 25Qam so Simeón chaqai so Leví sauá'maq llaalqa so Jacob, lqaỹa' aso Dina, na' ime' saua dos na'xata', ca' queso liỹa na'xa'a, ca' tarougui yi na'a' na' ñaqa 'ue na nqui'ic quena netanec na loshicmaxa na ỹalliripi. Ca' saua'maxare ỹahota'ahi lecachi, ca' nalauachiñi sá'ogue, ma' qaica ca ishit ỹashila'guit ca lo'o. 26Ỹahose'e lecachi na' ỹalauate' so Hamor chaqai so llaalec Siquem. Ime, ca' naqaterec aso Dina quiñi lauo' so Siquem, ca' que'. 27Ca co'na' novite' saua liỹa' llaalqa so Jacob, que', queeterelec na hua'ñi na nalauatqaipi, ca qanouo' so na'a'. Ca' qaỹa'ue lovi' dá'maq ne'naxac aso lqaỹa' Dina. 28Ca' i'xate' ana qagreta, huaca, 'ashinyipi chaqai ná'ogue ná'maq 'ue quiyi na'a' chaqai quena no'ueenaxa. 29Chaqai rocachita sá'ogue só'maq hueetaugui so 'imqaipi, chaqai ỹauec so loxonallipi 'aallipi chaqai so ñaaqaipioqui'. 30Co'na'le, ca 'naaco' so Jacob queso Simeón chaqai queso Leví:
—Nagui qamiri 'viichii quiyim qaypataxata'. Ma' na la'a' najo 'laua cananeo laseripi chaqai na ferezeoipi noquii'a ỹim. Nagui, ca' lapoỹata' ma'le na'maxare, ca' nalauate'e' aỹim ma'le na'maxare. Qam ma' sqo vito'olqai' naua ñale', ca' qanalauachiñi aỹim chaqai na ỹaalqaipi.
31Qam saua'maxare 'neraco':
—Ca' ¿ỹa'maqachiguiño' quiyim so'maxare 'neeta'gue quiyim 'ec aca nanatqa lo'o' añi qarqaỹa?
