Génesis 37

₁Ca' so Jacob naalco' yi 'laua Canaán yí'maq 'auo' neeta'ñi so leta'a. ₂Ca' dajo dá'maq na'qaataxac só'maq llaalqaipi so Jacob.

Ca co'na' mashic ne'nec so José na' mashic ỹovite' saua diecisiete ñaxari, ca' reloqota'a ana qagreta, liỹareta'pe saua lqaỹa' saua llaalqa aso Bilha chaqai aso Zilpa sauá'maq chi leloxoỹaxanata so leta'a. Ca' so José ra'qaataxanem so leta'a quiyim ỹaatqajam se no'uen da no'ueenataxague' saua lqaỹa'.

₃Ca' so Israel paguec lqo'iichi queso José quesaua liỹa' lqaỹa', ma' ne'qaaño' co'na' mashic qo'xoic so'maxare. Vichiguiño' ỹo'ueeto' so lachiimec ỹaatqajam lo'yaxanec nqai'en. ₄Qam saua lqaỹa' co'na' retane' quiyim só'maq leta'a' paguec nqo'ta quesaua'que saua'maxare, ca' qanoquii'a chaqai vire'ta tot qaiquin.

₅Ca 'uo' so na'xa'a, ca' so José 'uo' so le'guemataxac, ca ra'qaataxanalo' saua lqaỹa'. Qam saua'maxare nqo'neuco' da loquiiqa' queso'maxare. ₆Ma' 'naaco' quesaua'maxare:

—Ñaq na'xaỹaxañii'ta, ñaq sa'xat da ỹi'guemataxac. ₇Se'guematetapega quiyim qomá'ogue seuqatalec yi no'ueenaxa, sahoqotaque ana qarcoñiita quena trigo. Ca' chi qaiuane'ta aso ỹaqata nachajñi ỹalamqachiguiñi. Qam saua rcoñitahi lapoorau'a aso icoñiita. Ime, ca' qanqouagaxainot.

₈Ca' saua lqaỹa' 'neraco':

—¡Ca' quedajo, ca 'ñirac quiyim qami' qarashi ma'le, ca' 'viiquiñisa'pe qomi' ma'le!

Ca co'na'le, ca' paguec qanoquii'a queso le'guemataxac chaqai quedá'maq 'neeto' na' ỹa'xat.

₉Ca co'na' ime, ca' so José lotqai 'uo' so liỹa le'guemataxac. Ca lotqai ra'qaataxanalo' saua lqaỹa', 'naaco':

—'Yiiñii lotqai 'ue so liỹa ỹi'guemataxac, ca queso'maxare, ca ya'iita'a añi ra'aasa chaqai ñi shiraigo chaqai saua once huaqajñi huaqaishiguim caỹim, ca' nqouagaxaintot aỹim.

₁₀Ca co'na' so José ỹa'xat dajo le'guemataxac queso leta'a chaqai quesaua lqaỹa', ca' so leta'a 'naaco' queso'maxare:

—¿Negue' cá'maq 'neeto' dá'maq dajo re'guemataxaqui'? Ca' ¿peeta'a ishito' quiyim añi qachii'i', naua rqaỹachi' chaqai aỹim sa'daqoto qami' naua qare'cootal, ca' ñqouagaxainqot qami'?

₁₁Ca' saua lqaỹa' ỹaatqajam 'ue da lpa'guenaxanqa'. Qam so leta'a ỹaatqajam 'xoic da 'neeta ỹa'deentapega cá'maq 'neeto' dajo.

₁₂'Uo' so na'xa'a, ca saua lqaỹa' so José taategue da Siquem, idaansaque lqui'ỹaaqa' quena 'uaqapi saua laloo qagreta ca leta'a'. ₁₃Co'na'le, ca' so Israel 'naaco' queso José:

—Caua rqaỹachi' hueesa'gue da Siquem reloqosa'a ca qagretaipi. Ca' ỹim sahotaque quirepegueto 'ajnaxañitalo.

—Ajá'a, hua', ỹim shico' —'naaco' so José.

₁₄—Hua' —'naaco' so Israel—, mo'e', 'ajñi' negue' cá'maq 'neesari' caua rqaỹachi' chaqai ca 'neetari' ca qagretaipi. Ime, ca' rapilli', vite ca ỹa'xaỹaxac.

Ca' so Israel ila' so José chicqochi'ñi so ca'megue quiyi 'laua Hebrón. Ca' so José co'na' ỹovita yi Siquem, ₁₅ca ỹo'maaco' queso no'ueenaxa. Co'na'le, ca qaiuanejlco' queso ỹale. Ca qainato':

—¿Negue' cá'maq daañisaque?

₁₆—Sedaantapiguii caua ỹaqaỹa' —'naaco' so José—. ¿Tegue' chaqai 'yiiñi' ca hua'gue ca leloxoiqate' caua'maxare queca qagretaipi?

₁₇—Shi'gue que' quere'e najo —'naaco' so ỹale—. Qam sa'xaỹapegalo quiyim 'nerac taasa'gue da Dotán.

Ca' so José eec idaanapiguii saua lqaỹa', ca' ỹanatalo na' ỹovita yi Dotán. ₁₈Ca saua'maxare ñaq qoỹoqo'chiguit, qa' idaanda'guit. Ca co'na' saqa' ỹoviro, ca chaqa'ma' na'deenta' quiyim ỹalauate' ma'le. ₁₉Ca 'neraco' saua'maxare:

—Ñaq ra'iiguit naỹa'quena na 'guemataxaic. ₂₀Ỹalahi salauataq. Ca ma'le, ca' senaxasoxo'ñigui maca ni'ỹa. Ime, ca' shinqaco' 'uo' ca isecỹac toxonaxai ito, ca' ỹa'ic. Ca ma'le, ca' sa'deenaq negue' cá'maq 'neeta so le'guemataxac.

₂₁Ca co'na' 'xaỹa dajo so Rubén, ca ỹahotaco' ro'ootaxanlec quesaua lqaỹa'. Ca 'naaco':

—'E', se salauatqo'. ₂₂Sqai coraxachiỹa'pe caua neuo'. Ta'ta'a quiyim naxai'ñigui añi ni'ỹa quena 'laua qaica qom, qam qaica cá'maq 'ñii'tegue da'maxare.

So Rubén 'naaco' dajo, ma' ỹahotaque nca'laxatec so lqaỹa. Ime, ca' ỹopilaxateu'a so leta'a. ₂₃Qam co'na' so José ỹovira'alo saua lqaỹa', ca' saua'maxare naqate'o' so lachiimec ỹantañi. ₂₄Ca qaiconlec, ca' qainaxa'ñigui aca ni'ỹa co'chiichigui chaqai rashivichigui.

₂₅Ca co'na' ime, ca nqa'xañiñi qui'ỹe'. Ca' queco'na'le, ca' iuanchichiguit so Ismael llaalqaipi no'viiquetañi chicqota'gue da Galaad, ỹahote'e ana li'ỹaaquioxolate lalo nauaanaxanaxa late'ellipi, li'ỹaac na coraxat lo'daxaraic lahita, chaqai na qo'paq louaq ỹoreta'oguit leenaxat bálsamo chaqai ana mirra, ỹodo'ogue da Egipto. ₂₆Co'na'le, ca' so Judá 'naaco' quesaua lqaỹa':

—¿Negue' queto' ca qaraueguec quiyim salauataq ñi qarqaỹa, ime, ca' soxotqategueñi ca lelauaxa? ₂₇Paguec la'maxa quiyim semeenaq quena Ismael llaalqaipi. Ca' se salauataq, ma' ñi'maxare qarqaỹa.

Ca' saua lqaỹa' ỹa'maxarente' dá'maq 'naac so'maxare. ₂₈Ca co'na' que'tegueyi so nemeenaxaiquipi, liỹa leenaxat Madián laseripi, ca' qanaqajshiguim so José cañi ni'ỹa quesaua lqaỹa', ca qaimen queso Ismael llaalqaipi, veinte ana chiróla chicqaugui ana plata lesega'a nqohin so José. Ca' qai'xategue da Egipto.

₂₉Ca co'na' so Rubén liỹa ỹovita añi ni'ỹa, qa' totqai hueeta'ñigui so José. Ca nasectaqta'ahi saua loho queda lqui'ic nqai'en. ₃₀Ime, ca' quepegue' yi neesa'ñi saua lqaỹa', ca 'naaco' quesaua'maxare:

—¡Ca ne'nec totqai hua'ñigui añi ni'ỹa! Ca' nagui, ca ¿nega'ỹo' ca shinta'gue?

₃₁Co'na'le, ca saua'maxare iconta so lachiimec so José. Ca' iñitaxaterelec ca leuoripi so lalauategue' quetaq llaalec. ₃₂Co'na'le, ca' ilajta so leta'a', ca 'neraco':

—Seuanqajlec anajo. Ỹaatqajam 'ajñite' tegue' chaqana na lachiimec ca qachaalqui'.

₃₃Ca co'na' no'uenegue so Jacob, ca 'naaco':

—¡Ajá'a, chaqana na lachiimec ca ỹaalec! 'Uo' ca isecỹac toxonaxai ito' ca ỹaalec, ca ỹa'ic.

₃₄Co'na'le, ca' so Jacob nasectaqta'ahi saua loho, ca' ỹañiñi saua noho nasouaxaqui'. Ca' dajo lasouaxac so llaalec mesqai chita'gue ca ỹapalaxat. ₃₅Ca sá'ogue so llaalqaipi chaqai so llaallipi ỹahotaque quiyim lo'yigui lauel so'maxare. Qam so'maxare se ỹa'maxaren qaicochaq. Lama'xa noỹenteguelec da na'laxac so llaalec. Ca 'naaco' da la'qaatec:

—Ỹim se seshit ñaqate' naua ỹoho ỹasouaxaqui', chi ỹovireto'o' quiyim llapoo'guit queca loma' na lqui'i na leuaxaiquipi.

₃₆Ca' so Madián laseripi co'na' ỹovi' queda Egipto, ca' qaimen so José, qaimeenot so ỹale leenaxat Potifar. So'maxare neloxoỹaq queso qomyipi nalliripi so Faraón, nashi quiyi Egipto.