So José chaqai aso loua so Potifar
1Ca co'na' so José qaỹaueguegue da Egipto, ca 'uo' so Egipto le'ec, leenaxat Potifar, rishiujnaxano' quesó'maq Ismael llaalqaipi ỹaueguegue da'maxare. So Potifar lasho' só'maq neloxoỹaripi queso Faraón só'maq lashi yá'ogue yi Egipto. 2Qam ñi qara'gaxala' liỹaatac so José, ca' sqaica canchaqaica na' ñaqai hueeta'ñi yi la'a' so na'co' Egipto le'ec. 3So na'co' retan quiyim so José na'deeta'guit ñi qara'gaxala', vichiguiño' quecá'maq ỹo'uet so José, qam ỹa'maqachiguiñi. 4Ca' quedajo, ca chicqochigui quiyim qanqo'ta so José queso na'co', ca icona quiyim lotaua chaqai pataxalec quiyim reloxoỹa'a ná'ogue ná'maq louenqaipi hueeta'ñi yi la'a'. 5Ca' quecá'maq na'xa'o' na' so Potifar pataxalec so José quiyim reloxoỹa'a yi la'a' chaqai ná'ogue na louenqaipi, ca' ñi qara'gaxala' nqo'naxatec da lqouagaxa quiyi la'a' chaqai quena looỹac no'ueenaxa. 6Ca co'na' so José reloqota'a so louenqaipi so Potifar, ca so'maxare tot qaica ca ỹo'uet, ta'ta'a da lqui'ỹaxac.
Ca' so José ỹaatqajam imaañi da loyac, ca' quena' qaỹa'ajan, ca' qanqo'ta. 7Ca co'na' mashic shi'gom neeta'anyi, ca asó'maq loua so na'co' ỹaatqajam nqo'to' so José. Ca 'uo' so na'xa'a, ca isecna'a, 'naaco':
—Sahoqe qaranatec.
8Qam so José se na'xaỹaxan, ca 'naaco' caso'maxare:
—'Ajñi', so ña'co' pataxailec ná'ogue na louenqaipi. Ca' quiyim aỹim senta'ñi najo, ca ñi'maxare tot qaica ca hueetapigui lauel. 9Quenajo na'a' qaica ca liỹa ỹapacauec, qaỹimeta. Chaqai so ña'co' qaica ca ỹollaapiguim, chi qaqamite', ma' qami' loua. Ca' ¿chi'negue queta' so'uet ca se ỹa'maxañi, chaqai quiyim sa'ue ca ỹasauaxaset quiñi qota'a?
10Qam aso'maxare ỹaatqajam 'ue da lepagaxallic queso José quenaua'que naua na'xata' quiyim viguit aso'maxare chaqai quiyim huaqate'e', qam so José se na'xaỹaxana. 11Ca 'uo' so na'xa'a, ca' so José inoxonougui so 'imec quiyim ỹo'uet so lo'ueenatec. Qam qaico' na'le ca hua'anyi. 12Ca aso'maxare ỹaconaho', nolliisañi saua loho. Ca 'naaco':
—Ñinanaxañi, sahoqe qaranatec.
Qam so'maxare 'eet, no'ueenaqtetañi so lapo' caso'maxare. 13Ca aso'maxare co'na' ỹa'den inoxonec, qam no'ueenaqtetauo so lapo', 14ca roỹaxane'oga so lelaatqaipi quiyi la'a', ca 'naaco':
—Ñaqai 'ajñii, so ỹoua nauego so hebreo le'ec quena qara'a'. Ca' nagui, ca' qare'naari'. Ma' so'maxare inoxonau'a aỹim, ca' sham yocaat, qam ỹaatqajam ñitenegue quiyim yaualaq. 15Ca na' 'xaỹa quiyim ỹaatqajam ñitenegue da ỹaualaxac, ca 'eet, ta'oguiyi, ca vire'ta na lapo' no'ueenaqtañi.
16Ime, ca aso'maxare ỹa'maxat so lapo' so'maxare, chi ỹovireta'a na' noviro quiyi la'a' so loua. 17Ca co'na' noviro so loua, ca lotqai ra'qaataxana, 'naaco':
—So qara'ac hebreo le'ec inoxonau'a aỹim quiñi 'imec, ca sham yocaat. 18Qam na' ỹaatqajam ñitenegue ca ỹaualaxac, ca' 'eet, inoxonec. Ca no'viinchiguiñi na lapo'. 19Ca' dá, 'ne'tegue caỹim ñi ra'aqui'.
Ca ỹaatqajam ro'o' na'le so na'co' so José, co'na' 'xaỹa da la'qaataxanaxac aso loua. 20Ca' iconlec so José, ca relaataxanlec quiyim qaicoñi', qoỹanaugui añi ncoñiitaxanaxaqui ñí'maq neetaugui so lcoñiitecseripi so nashi. Qam cañi ncoñiitaxanaxaqui 21qaiyiita ñi qara'gaxala' na'deeta'guit so José, ichoxotetac da lqouagaxa. Ca ỹo'uet quiyim qanqo'ta queso lashi añi ncoñiitaxanaxaqui. 22Ca ilarelec quiyim reloqota'a sá'ogue so ncoñiitecseripi. Ca' so José chaqaiso' quen só'maq relaataxanlec ná'ogue ná'maq qaỹo'uet caso ncoñiitaxanaxaqui. 23Ca só'maq lashi añi ncoñiitaxanaxaqui tot ỹouen quiyim liỹa ỹa'ajan ná'maq mashic leloxoiqateguesec so José. Ma' ñi qara'gaxala' na'deeta'guit so'maxare, ca ỹa'ue quiyim ỹa'maqachiguiñi ná'ogue ná'maq ỹo'uet so'maxare.
