Saua lqaỹa' so José taategue da Egipto
1Ca co'na' so Jacob 'ue ca la'xaỹaxac quiyim 'ue na trigo queda Egipto. Ca 'naaco' quesaua llaalqa:
—¿Negue' cá'maq 'ñiita'pegue quena, chi na'iitecta'? 2'Ue da ỹa'xaỹaxac quiyim 'ue na trigo queda Egipto. Mohi, 'iiquera, shiujnaxañiỹaque ca qonoq trigo, qaiyi se qaralauat na qarqopaaxa.
3Co'na'le, ca' que' saua diez lqaỹa' so José rishiujnaxandaque trigo queda Egipto. 4Qam so Jacob nollaañi sqai eec nqai'en so Benjamín, lqaỹa so José, ma' 'naaco': Sqoue ca lo'maxaset.
5Saua llaalqa so Israel queuguilo' saua liỹa' qai'neete' que' neuorene', ma' quiyá'ogue yi 'laua Canaán 'xoic na nqopaaxa.
6Ca' so José só'maq idaanteguelec yijo 'laua, ca' chaqaiso só'maq imeentac na trigo quena qomyipi chicqote'ogalo ỹoviretapego. Ca co'na' ỹoviro so lqaỹaripi, ca' ỹa'dooto naua le'cootal, ỹoviraqta'guita naua lataapi' na 'laua. 7Ca' so José co'na' chi iuane'talo saua lqaỹa', chaqa'ma' no'ueneguelo. Qam 'eco' se no'ueneguelo. Ca' inate'o', qam se ichira'guelo naua la'qaatqa, 'naaco':
—Qamiri ¿negue' ca chigoxoỹa'gue?
Ca saua'maxare 'neraco':
—Sachigoxosqa'a yi 'laua Canaán, seshiujnaxanqataque na trigo.
8So José chaqa'ma' no'ueneguelo saua lqaỹa', qam saua'maxare se no'uentegue so'maxare. 9Co'na'le, ca' so José no'uenco' so le'guemataxac taỹauguilo saua'maxare. Ca 'naaco':
—Qamiri chaqaiqamiri na'ajnaxanqajanqa, ca chi na'ajnaxañiỹa najo 'laua negue' cá'maq paguec hua'ñi quiyim qaica ca lquesaxanaxa.
10Ca' saua'maxare 'neraco':
—¡'E', qami' qara'gaxala'! Qomi' relaataxahi', qomi' ñanaguinaq, qam chi seshiujnaxanqataque na trigo. 11Qomá'ogue 'oonoqui' ca qareta'a chaqai se ña'majanqatac quedá'maq sa'xataq. Ca se ỹauanapega quiyim qomi' quet na'ajnaxanqajanqa.
12Ca' so José 'naaco':
—¡'E', sqai llic! Qamiri ra'iitaque cá'maq hua'ñi ca qaica ca la'ñaxac quenajo 'laua.
13Qam saua'maxare 'neraco':
—Qomi' relaataxahi', qomi' doce nqaỹaripi, 'oonoqui' ñi qareta'a. Ca senqata'ñi yi 'laua Canaán. Ca cá'maq qarqaỹa na'aasa no'ueena'ansop ñi qareta'a. Ca' ca liỹa, ca totqai neetauguilo qomi'.
14Qam so José 'naaco' liỹa:
—¡Ca cha'regue ipaquichigui dá'maq shinac quiyim chaqaiqamiri na'ajnaxanqajanqa! 15Ca' nagui, ca' se'guenaxe' qamiri quedajo, se'taxajñi da ỹa'qaatec chaqai yotauan ñi Faraón ma'le, quiyim sqo quii quenajo no'm se novi' ca rqaỹahi na'aasa. 16Ca 'óna cá'maq eec caqamiri i'guena'a ca'maxare. Ca' na liỹaripi, ca' qaicoñi', qaiyi sa'deenaq quiyim ỹaatqajam llic dá'maq ra'qaachiguii. Ca no'm sqai llic, ca' qamiri na'ajnaxanqajanqa. ¡Ca' ñi Faraón ỹo'uet ca nouaxanaxashichii!
17Ca' so José coñi' sá'ogue quesaua tres na'xata'. 18Ca na' ime' saua tres na'xata', ca 'naaco' quesaua'maxare:
—Ỹim 'ue da iqolonaxa quiñi qota'olec. Ca vichiguiño' 'maxaraic quiyim 'viichii da ỹa'qaatec, qaiyi qai'xorene' qamiri: 19no'm llic qaica ca nishichiỹapegueu'a, ca' no'ueenaxachiỹañi ca 'oonoqui' rqaỹahi cañi ncoñiitaxanaxaqui. Ca' na liỹa, ca pil, ỹodo na trigo, qaiyi que'e ca llaalqaipi. 20Ma'le, ca naviguii ca rqaỹahi na'aasa. Ca' sa'ajnaq quiyim tegue' chaqai llic dá'maq 'ñiỹac. No'me', ca rillivii.
Ca saua'maxare saate', 21qam quena'le, ca' chi retaqatecta', 'neraco' quen:
—Ỹaatqajam llic se no'uen dá'maq shinqa'tegue na'le ca qarqaỹa José, ma' se ña'xaỹaxanaxa quena' ne'xoresentouguilo qomi' quiyim se'xorenaq. Vichiguiño' ỹoviro'oto qomi' nagui da qare'xoric.
22Ca' so Rubén 'naaco' quesaua'maxare:
—Ỹim shinac na'le quiyim qaica ca 'ñii'tegue ca qarqaỹooqui', qam se na'xaỹaxañiua'. Vire'to' nagui, ca taalgoto qomi' da lelauaxa ca'maxare.
23Ca saua'maxare se ỹa'deene' quiyim qara'xaỹalo queso José, ma' so'maxare na' retaqatac, qam 'ue so letaxaỹaxanqajnec. 24Ca' so José noỹootec quesaua'maxare, ca' noỹen. Co'na' rapila yí'maq hueesa'ñi saua'maxare, ca' ishit retaqa. Ca' ỹoỹootec so Simeón, ca ỹa'ajansac nqai'ne' na' relaataxanlec quiyim qaicoñirañi. 25Ime, ca' relaataxan quiyim qano'xataxate' saua lloxoqui' queso trigo, chaqai quiyim qaỹopilaxatema saua lami', qailliitagui ca lloxoqui quiñi 'óna, chaqai quiyim qaỹa'ue ca loq nouene' queca nayic. Ca' chaqaida qohine'tegue. 26Ca saua'maxare inaqaishiguim so li'ỹaague' trigo quesaua 'ashiñi'. Ca que', pile'.
27Ca co'na' ỹovijta ca ỹahosaque la'xasqote', ca 'uo' so ỹauajñigui aso lloxoqui, ma' ỹahotaque qui'ỹaxan so lalo 'ashin. Ca iuane'ta aso lam pa'aatashiguim quena lap aso lloxoqui. 28Co'na'le, ca 'naaco' quesaua lqaỹa':
—¡'Ajñii, qarapilaxateta ana ỹam! ¡'Ana hueeta'guit na lap ana ỹoxoqui!
Ca saua'que no'daxateterec, i'loxoltasa'lo quena lqolonqa'. Ca chi retaqatecta', 'neraco' quen:
—¿Negue' cá'maq 'neetoxorico' ñi qota'olec?
29Ca co'na' ỹovite' queda Canaán, ca ỹa'xate' queso leta'a' Jacob dá'ogue dá'maq 'neeto' na'le quesaua'maxare. Ca 'neraco':
30—Ñí'maq ỹale nashi quiyi 'laua, na' retaqa, ca se ỹa'maxata'guelo qomi' chaqai 'naac quiyim qomi' qolaxapegue' yijo 'laua, qam chaqaiqomi' na'ajnaxanqajanqa. 31Qam qomi' shinqac, quiyim qomi' se ỹauanapega saataxa ca se no'uen, chaqai sqai qomi' na'ajnaxanqajanqa. 32Chaqai quiyim qomi' doce nqaỹa', cá'ogue ca qareta'a, qam ca 'óna totqai ỹalequetauguilo qomi', chaqai cá'maq na'aasa no'ueena'ansop qami' quena Canaán. 33Ca 'naac coqomi': Ca' quedajo, ca' sa'deene' qamiri ma'le quiyim llic qaica ca naỹii'a. No'ueenaxachiỹañi quenajo ca 'óna rqaỹahi, ca' qamiri pillii, dohi na trigo queca qachaalaxahi. 34Qam naviguii ma'le ca rqaỹahi paguec noctoqui', qaiyi ỹaatqajam sa'deenta quiyim qaica ca naỹii'a, sqai qamiri na'ajnaxanqajanqa. Qaiyi sosouec ma'le ñi rqaỹahi, chaqai qamiri qaica ca rovichiỹaque ma'le quiyim huoxoñitac najo 'laua.
35Ca co'na' qaico'taxatetapiguilo saua lloxoqui' saua lqaỹa' so José. Ca' cañi lloxoqui quiñi 'óna 'ue ana ñoxoquio'lli' hueetagui ana lam lishiuetenaxanqate quiñi 'óna. Ca saua'maxare chaqai so leta'a' no'daxateterec. 36Co'na'le, ca 'naaco' so Jacob quesaua'maxare:
—Qamiri ỹaatqajma' tot qaica nqai'ñii ca ỹaalec. Ca José mashic tot ỹalequetauguilo qomi', ca Simeón qai'neeta. ¡Chaqai nagui viitaque huootaxañiỹa'gue ñi Benjamín! ¡Ca dá'ogue chaqaỹimeta taateguelec!
37Co'na'le, ca' so Rubén 'naaco' queso leta'a:
—'Xañirec ñi Benjamín quiyim seloqota'a ñauequeta'pegue', ca' ỹim yapilaxat ma'le. Ca no'm se yapilaxat, ca' qami' lauachi'o' saua dos ỹaalqa.
38Qam so Jacob 'naaco':
—Ñi ỹaalec sqai queguelo nqaishine' qamiri. Ma' so lqaỹa José tot qaica, ca ñi'maxare qaiñiita no'ueenañi. Ca no'm 'ue ca lo'maxaset quecá'maq 'iỹa'gue nagui, ca' qamiri rasauaxashichii ma'le najo qo'xoicolec quiyim ileu, ỹalauat ca lachicoxo.
