So José nichoxota so lqaỹaripi
1Ca' so José tot nalo'guit dá'maq 'neeta. Qam reloqotaho sá'ogue só'maq lelaatqaipi, ca' ỹaualaq, 'naaco':
—¡Qamiá'ogue 'iu'oguiyi!
Ca' qaico' ca hueeta'anyi co'na' so José nichoxota so lqaỹaripi. 2Co'na'le, ca' noỹen, ỹaatqajam nelamaxaren. Ca sá'ogue so Egipto laseripi ỹa'den, chaqai vire'ta so Faraón 'ue da la'xaỹaxac. 3Ca so José 'naaco' quesaua lqaỹa':
—Ỹim José. ¿Ñaqa 'ue nca'leetauec ca ita'a?
Ca saua'maxare ỹaatqajam no'daxateterec só'maq reloqoso'ot. Ca saua'maxare i'maretem', qaica ca retaqa. 4Qam so José 'naaco' quesaua'maxare:
—Qouaguiic, nqo'ñiiuo caỹim.
Ca co'na' nqo'nero saua'maxare, ca 'naaco':
—Ỹim ná'taq ỹim rqaỹahi José, yimiiñii na'le quena Egipto. 5Qam qouaguiic, qaica huapigui qavillii chaqai sqai 'ohiỹa dá'maq chi no'ueenataxaguii quiyim yimiiñii. Ma' qota'olec ñí'maq 'au yila' caqamiri, ma' ỹahotaque ñca'laxatec ca chaalataxac. 6Mashic ỹovite' dos ñaxari nagui nqopaxaqui' quenajo 'laua, chaqai saqa'lecaua caua liỹa' cinco ñaxari qaica ca qanaqat, 'eno'm 'ue ca qoỹanñi. 7Qam ñi qota'olec ya'auaxan yila', qaiyi qamiri 'ue aca qachaxataxahi quena 'laua, qaiyi 'ue ca ne'laxa quiyim ñca'laxaterec qamiri queda nqopaaxa. 8Ca' chaqaiñi ñi qota'olec ñí'maq yila' quenajo, ca' mesqai qamiri. Ñi'maxare ñí'maq ỹo'uet quiyim aỹim lotaua ñi Faraón quiyim sa'xatem cá'maq 'neeta'gue, chaqai quiyim seloqota'a yá'ogue yi la'a', chaqai quiyim seloqota'a ná'ogue na 'laua Egipto. 9Ca' mohi, chaqa'ma' quiipegue' cá'maq neeta'ñi ca ita'a. Ca 'ñiỹaco': Dajo 'naac ñi qachaalqui' José: Ñi qota'olec ỹo'uet quiyim ỹim na'gaxala' quená'ogue na 'laua Egipto, chaqa'ma' naico'na, sahotaque ñauane'e'. Se naỹaloxoriñiỹo'. 10Ñiỹalec ma'le yi 'laua Gosén, riỹahitac na qachaalaxahipi, chaqai ná'ogue na qalohipi, chaqai na roviñiguii, chaqai sqoỹoqapiguii qamiri caỹim. 11Quenajo sa'ue ma'le ca qanoxohi, chaqai cá'ogue ca qachaalaxahipi, chaqai cá'ogue cá'maq qauorahi, qaiyi qaica ca viñiỹaque. Ma' ñaqai naate' naua liỹa' cinco ñaxari nqopaxaqui'. 12Ñi inoq Benjamín chaqai qamiri 'xaichigui dajo ỹa'qaatec quiyim ỹim shinac dajo. 13'Qaataxañim ca ita'a quedá'ogue dá'maq shintari' quena Egipto, chaqai quená'ogue ná'maq huañiỹa quenajo. ¡Se naỹaloxoriñii, mohi, naviguii ca ita'a!
14Ca' so José qa'aalgue so lanoq Benjamín, ca' noỹen. Ca' so Benjamín qai'neeta noỹen na' qa'aalgue so lopiichi José. 15Na' ime, ca' so José nqo'goq so lqaỹaripi, ca' noỹen quena' qa'aalgue. Ca na' ime dajo, ca saua lqaỹa' qaigueme ishite' retaxaira'pegue'.
16Ca' quiñi lauo' so Faraón ỹoviro so na'xaỹaxac quiyim ỹovite' saua lqaỹa' so José. Ca' so Faraón 'ue da netoonaxac chaqai sá'ogue so lotauaripi. 17Ca' so Faraón 'naaco' queso José:
—'Ñirapegalo caua rqaỹachi' quiyim iỹoxolgoto caua laloo, ca' pile' queda Canaán. 18Ca' nauegue' ca leta'a' chaqai ca llaalqaipi. Ỹim saanem ma'le na paguec loyac quena Egipto. Ca ỹa'gue' ná'maq paguec loyac nanecsec quenajo 'laua. 19'Ñirapegalo quiyim i'xate' caua nahoglena quena Egipto, ca ne'xate' caua loua', chaqai ca llaalqaipi, chaqai cá'maq qataa'i. Qai'neeta anac, 20chaqai se ỹa'deentapega cá'maq 'ue hueeto'ot nagui, ma' ná'ogue ná'maq paguec loyac quena Egipto taỹoto ma'le qamiri.
21Ca' saua llaalqa so Israel chaqaida 'netetegue. Ca' so José ỹaandec saua nahoglena relaataxanlgoto so Faraón chaqai so nouenete' queso nayic. 22Qai'neeta ỹa'vii saua loho dalaxaqa, qaiyi nadalaxat. Qam queso Benjamín, ca' ỹaanem aso trescientas lamo'lli' plata, chaqai saua cinco loho no'ueetaxaqui'. 23Chaqai queso leta'a, ca ilate' saua diez 'ashiñi' no'qajlgoto quená'maq no'uen chicqa'ñi yi Egipto, chaqai saua liỹa' diez 'ashiñi' no'qajlgoto quena trigo, chaqai pan chaqai loq ỹauaaque nouene' so leta'a ma' ỹovita quiyim nanac. 24Co'na' so José ime npoyiguinto saua lqaỹa', ca 'naaco' quesaua'maxare:
—'Neeto' nco'uaitecta' quena nayic.
Ca saua'maxare que', 25chicqochiri'ñi yi Egipto, ca ỹovirera'gue da Canaán yí'maq neeta'ñi so leta'a' Jacob. 26Ca co'na' qara'qaataxana so Jacob quiyim so llaalec José ñaqa 'ue nca'leetauec, chaqai chaqaiso só'maq reloqota'a yá'ogue yi 'laua Egipto, ca tot ỹa'den ca 'neeta chaqai qaica ca 'naac, ma' sqai huelec dá'maq qaỹa'xatetac. 27Qam qaỹa'xatem dá'ogue dá'maq 'naaco' na'le so José, ca na' iuanalo saua nahoglena qaỹauaapigui lahiri ma' eec queso José, ca ỹaatqajam 'ue da lpe'e. 28Co'na'le, ca 'naaco':
—¡Qaidaata quiyim sa'den ca ỹaalec José quiyim ñaqa 'ue nca'leetauec! Ca ỹim shic, shicpegue', qaiyi ñauane'e' tomaq saqa' yileu.
