Ñi qota'a retaqa chicqochigui nqai'en so llaalec da la'qaatec
1Queso 'auaxaic ñaxaripi ñi qota'a 'xoico' quen da letaxaỹaxac queso 'auaxaic qareta'allipi, qam ỹoreta'oguit na leloxoỹaxaquipi nqai'en quena' retaqa nqai'en so letaxaỹaxaquiripi. 2Qam nagui quenaua pa'aaterec na'xata', ca' retaqauguilo qomi', chicqochigui nqai'en so llaalec. Ñi qota'a chicqochigui nqai'en so llaalec na' ỹo'uet ná'ogue nanchaqaina, ca' chaqaiso só'maq pataxalec quiyim idaanlec ná'ogue na'maxare. 3Ca' chaqaiso so lqai'legaxa dá'maq lauaq ñi qota'a, chaqai so'maxare chaqaiso só'maq 'nejem da no'ueenataxac ñi qota'a, chaqai so'maxare só'maq nolliitañi ná'ogue nanchaqaina queda lquesaxanaxa da la'qaatec. Ca co'na' ime co'taxate' qomi' quena qarasauaxaset, ca' nqa'xanñi quiyim nashi queda loic yi nqa'xanqa' ñi qota'a queda piguim.
So llaalec ñi qota'a paguec lecaic quena nelaatqaipi piguim laseripi
4So llaalec ñi qota'a chi ỹovireta'a quiyim ỹapacauec quena nelaatqaipi piguim laseripi, ma' icoñiguit yi loma' paguec lecaic quena'maxare. 5Ma' ñi qota'a se ỹauana 'ue ca 'naapega quena lelaatqaipi piguim laseripi:
Qami' na' qami' ỹaalec;
saañiraxarom da rca'laxa'e' nagui.
Chaqai sqaica ca 'naapega quena piguim laseripi:
Ỹim shintari' ca leta'a so'maxare,
chaqai so'maxare shinta'gue ca ỹaalec.
6Qam na' noviraxat so 'auaxaic llaalec quena 'laua, ca 'naaco':
Ná'ogue na lelaatqaipi ñi qota'a queda piguim ỹa'dooto naua le'cootal so'maxare.
7Qam dá'maq 'neeto' na'le quena piguim laseripi, ca' ñi qota'a 'naaco':
Ñi'maxare ỹo'uet na lelaatqaipi piguim laseripi 'ec nqai'en na nonot,
chaqai na lo'ueenataxanqajanqaipi 'ec nqai'en na norec lauaq.
8Qam quesó'maq llaalec, ca 'naaco':
Añi nqa'xanaxagui'i' quiyim qami' qota'a, ñi'maxare qaica ca lqodoc;
chaqai da ro'ueenataxanaxaqui' quiyim qami' nashi, ỹaatqajam ỹa'maqachiguiñi.
9Qami' ỹaatqajam rqo'chita dá'maq ỹa'maqachiguiñi,
chaqai ỹaatqajam se rqo'chita dá'maq se no'uen.
Vichiguiño' ñí'maq qota'a caqami',
ñi'maxare ỹocorelec aqami' quedá'maq chalego lecaic netoonaxac,
ỹapacauec nqai'en quena nauegaxauachi'.
10Qai'neeta 'naaco':
Qami' ná'maq ỹaatqajam qami' na'gaxala', 'auaxanchiriñi 'viichi' no'xoñirishiguim na 'laua,
chaqai naua rqai'laqachichi' lo'ueenategue' na piguim.
11Qam na'maxare tai'a quiyim ime, qam qami' qaica ca rqodoqui',
chaqai ná'ogue tai'a quiyim qo'oq, 'nejem ca chaqai nooỹac.
12Quiyim nañireta' 'ñiisa'gue meca nooỹac, chaqai na'maxare tai'a quiyim qaỹadalaxat, 'nejem ca nooỹac.
Qam qami' chaqaidaata dá'maq 'ñiisari',
chaqai da nachaalataxaqui' qaica ca lqodoc.
13Ñi qota'a se ỹauanapega 'ue ca 'naapega quena lelaatqaipi piguim laseripi:
Nqa'xañiriñi quena ỹoic,
toco' ma' sillo'oto naua qapiaachichi' ná'maq pa'guentac aqami'.
14Ná'ogue ná'maq nelaatqaipi piguim laseripi, na'maxare se re'xogui, ro'ueenataxantacot ñi qota'a. Na'maxare nelaatqaipi quiyim ỹotauan ná'maq icoñiguit ma'le ca nca'laxa.
