Hebreos 11

₁Quiyim 'ue ca npi'ỹaxac, ca' chaqaida dá'maq ỹaatqajam 'chichiguiñi nqai'en quiyim seconaxaguit cá'maq ñauaanqataque, chaqai ỹaatqajam se'taxatqachiguiñi quiyim 'ue cá'maq se seuanaxa chaqaica cá'maq ỹaatqajam lliqueta. ₂Só'maq 'auaxaic qareta'allipi nallaaqo' ỹaatqajam qaỹa'maxarenta quiñi qota'a, ma' 'uo' da lpi'ỹaxac.

₃Chicqochigui da qarpi'ỹaxac quiyim qomi' sa'deenaq quiyim ñi qota'a lo'ueenatec ná'ogue na 'laua, ỹahota'ahi naua la'qaatqa. Vichiguiño' ná'maq seuanaxa 'ue nagui chicqochiquio' na'le cá'maq se re'xogui.

₄Ma' 'uo' da lpi'ỹaxac so Abel, ca' paguec loyac so lachitaxanataxanaxat caso lachitaxanataxanqate so Caín. Ca' ñi qota'a icoñiguit 'neeta'gue ca lo'yaxanec ca no'ueenataxac na' icoñiguit so lachitaxanataxanaxat. Ca 'eno'm tot qaica so Abel, qam da lpi'ỹaxac ñaqai queeta ra'qaataxantac.

₅Ma' 'uo' da lpi'ỹaxac so Enoc, ca' qaỹaueguegue da piguim imaashiguim nqohin, se ileu. Ca' se qaỹanata, ma' qai'xat quiñi qota'a. Chaqai naua naneresañi na'qaatqa ỹa'xate' na' saqa' qaỹauec so Enoc shi'gue qaỹa'maxarenta quiñi qota'a. ₆Qam qaica quet cá'maq qaỹa'maxarenta quiñi qota'a no'm qaica ca lpi'ỹaxac. Ma' quiyim qanqo'neu'a ñi'maxare, ca' ca qom huelec quiyim 'ue ñi qota'a chaqai quiyim ñi'maxare ishiueten cá'maq nimitaque ñi'maxare.

₇Ma' 'uo' da lpi'ỹaxac so Noé, ca co'na' qaỹaqata quiñi qota'a so'maxare quiyim 'ue ma'le ca naatalec saqa' re'oq. Qam so'maxare ỹaatqajam huejlec, ca' ỹo'uet aso lahi' huaxaỹaqse, qaiyi nca'leuec so llaalqaipi. Ca ma' 'ue da lpi'ỹaxac so'maxare, ca re'oq nqai'en quiyim 'ue ca nouaxanaxaset ná'maq qaica ca lpi'ỹaxac hueetalec ana 'laua, chaqai ỹovireta'a quiyim ỹaatqajam qaỹa'maxarenta. Ma' ñi qota'a ỹaatqajam ỹa'maxarenta cá'maq 'ue ca lpi'ỹaxac.

₈Ma' 'uo' da lpi'ỹaxac so Abraham, ca na'xaỹaxanto' na' qaroỹaxana quiñi qota'a, ca' eec quepegue' cá'maq shim qoỹaanem quiyim lalamaxaret quiñi qota'a. Ca'e yí'maq neetalec 'laua, qam se ỹa'den cá'maq taỹa'gue. ₉Ca ma' 'uo' da lpi'ỹaxac so Abraham, ca' ỹovira'a neetalec só'maq 'laua qaỹachaxantapega quiñi qota'a, qam 'ec se lalamaxaret nqai'en ca 'laua neetalec. Ma' so'maxare neetaugui so na'daañi 'imcoqui'. Chaqai chaqaida 'neeto'o' na'le so Isaac chaqai so Jacob, ma' saua'maxare qai'neete' iconchiguit só'maq qaỹachaxantac. ₁₀Ma' so Abraham nauaantaque ca na'a' qaica ishit ỹopoxoỹaxachigui, chaqai chaqaiñi ñí'maq qota'a ñí'maq no'viishiguim da no'ueenataxac, chaqai chaqaiñi ñí'maq no'xonshiguim.

₁₁Chaqai aso Sara qai'neeta chicqochigui da lpi'ỹaxac, 'eno'm qo'xoỹom. Qam qaỹa'ue da lquesaxanaxa, qaiyi 'ue ca llaalec. Ca 'uo' na'le ca llaalec, ma' huelco' na'le ñi qota'a quiyim ipacqajanchigui cá'maq ỹachaxantac. ₁₂Ca so Abraham, 'eno'm mashic ipalata'a ca lqodoc aca lqauaxaqui, qam ỹovirau'a quiyim 'xoic so llaalqaipi, 'nejem ana huaqajñi neeto'ot na piguim, chaqai 'nejem na lo'uaxanaxa hueeto'oto naua lahil aso huaaxai, se qaishit qanaloqochin.

₁₃Sá'ogue so qomyipi nelliviñi, qam se icoñiguit ca qaỹachaxantapeguem quiñi qota'a. Qam 'ue da lpi'ỹaxac so qomyipi, ca iuana, qam qoỹoqo'ta, chaqai ma' mashic huelec, ca' chalego loyac nqai'en na' ỹa'ajantac. Ca chaqaida 'neeto' na'le so qomyipi co'quena' ỹa'xatetac quiyim se lalamaxaret la'a' najo 'laua. ₁₄Ma' ná'maq 'neeta'gue dajo da la'qaatec, ca 'ec ichoxochichigui quiyim ñaq imitetaque ca lalamaxaret la'a'. ₁₅Ma' quetqai ñaq ỹa'deensapega cá'maq 'laua chicqora'ñi, ca ishit quet pilda'a. ₁₆Qam so'maxare ñaq ipaquetaque cá'maq ỹaatqajam lo'yaxanec lalamaxaret 'laua, cá'maq na'a' hueeta'gue da piguim. Vichiguiño' ñi qota'a se nayiloxonlec quiyim qaỹamata'gue qota'olec quesaua'maxare, ma' ñi'maxare shi'gue ỹaqatqajantari' ca na'a' lodegaxat ỹauaaque la'a' so'maxare.

₁₇Qai'neeta so Abraham 'uo' da lpi'ỹaxac co'na' qai'guen quiñi qota'a, ca' ỹauec so Isaac quiyim ỹalauat chaqai ỹavigaxat, ca' ỹaanot ñi qota'a. Ỹaatqajam qaica ca huapigui lauel, ta'ta'a quiyim ỹaano so 'oonoqui' llaalec, 'eno'm chaqaiso só'maq ỹachaxantaco' na'le ñi qota'a, co'na' 'naac: ₁₈“Chicqochigui ma'le ñi Isaac quiyim qami' 'xoic ca qachaalaxai'pi.” ₁₉Ma' so Abraham ỹaatqajam ỹa'deenta quiyim ñi qota'a 'ue da lquesaxanaxa quiyim liỹa nca'laxatec na leuaxaiquipi. Ca dá'maq leloxoỹaxaco' na'le dajo, 'ec quiyim so Abraham liỹa icoñiguit so llaalec chicqochiguingui yi leuaxaiquipi.

₂₀Ca' so Isaac qai'neeta 'uo' da lpi'ỹaxac, ca so'maxare ỹaanema da no'uen llicyaxague' saua llaalqa Jacob chaqai so Esaú. ₂₁So Jacob qai'neeta ma' 'uo' da lpi'ỹaxac, ca co'na' mashic ileuetac, ca' ỹaanema da no'uen llicyaxague' saua laua', llaalqa so José. Ca ỹashiltalec na'le aso lashilete, ca' imaqachintac ñi qota'a. ₂₂So José qai'neeta, ma' 'uo' da lpi'ỹaxac, ca ra'qaataxanem so lqaỹaripi liỹa llaalqaipi so Israel quiyim inoxonec ca'e ma'le yi 'laua Egipto, chaqai no'ueenaqtañi da la'qaatec quecá'maq qohinta'que ma'le caua lpi'naqa.

₂₃Qai'neeta queda lpi'ỹaxague' saua leta'al so Moisés co'na' ne'qaañi, ca qoỹoxojño' na'le quecaua tres shiriguiri; ma' iuanta quiyim ỹaatqajam lo'yaxanec so noctoqui', ca se no'chita da la'qaatec so nashi quiyim qaỹalauat na ñaaqaipioqui'. ₂₄Chaqai so Moisés ma' 'uo' da lpi'ỹaxac, ca co'na' mashic ỹi, ca se ỹa'maxaren quiyim qohinac llaalec aso llaale so nashi quiyi Egipto. ₂₅Ta'ta'a quiyim ipaquetaque quiyim le'xoyaxaua queeta'ñi' nqohin so lalamaxareteripi ñi qota'a, sqai cocho'qui' quet ipita'a da lamaanaxanqachic quena se no'uen nasauaxaset. ₂₆Chaqai 'ec paguec lesallaxa nqai'en quiyim 'ue da le'xoric se qaỹa'maxata'gue soualec so Cristo, sqai quiyim hueeto'ot yá'ogue yi lesallaxa yi Egipto, ma' ra'iitagui da lishiuetenaxanaxac ma'le ñi qota'a. ₂₇Ma' 'uo' da lpi'ỹaxac so Moisés, ca' ca'e yi 'laua Egipto, se no'cha'a da lonogoxonaxac so nashi. Ỹaatqajam queetalec dá'maq chi no'ueenataxac, 'ec ra'iito'ot ñi qota'a ñí'maq sqaica iuana.

₂₈Ma' so Moisés qai'neeta 'uo' da lpi'ỹaxac, ca' relaataxanlec so nqui'ỹaxac chicqochigui quiyim qanaqatec so Israel llaalqaipi quiyi Egipto. Chaqai relaataxanlec quiyim qaỹa'meene' naua lasomi' quesaua qagreta leuo', qaiyi só'maq qota'a lelaatec nalauataxanqajnec sqaica ca ỹovira'a quená'maq ỹi llaalec so Israel laseripi. ₂₉Chaqai queda lpi'ỹaxac so llaalqaipi so Israel, ca' ishit pacta aso huaaxai, leenaxat Huaaxai Toc, 'ec nqai'en ca rashivijlec 'laua. Chaqai co'na' so Egipto laseripi sham pacta qai'neeta, ca' sá'ogue homac.

₃₀Qai'neeta queda npi'ỹaxac, ca 'guiño' na'le so lapooque' yi na'a' Jericó, co'na' ime' saua siete na'xata' quiyim so Israel llaalqaipi ỹaqaletentac yi'maxare. ₃₁Qai'neeta 'uo' da lpi'ỹaxac aso Rahab só'maq nanatqa lo'o', ca' se ileu, sqai queeta'ñi' só'maq se na'xaỹaxan. Ma' aso'maxare ỹaatqajam quelolalo' na'le saua la'ajnaxanqajanqa so llaalqaipi so Israel.

₃₂Ca ¿negue' quet cá'maq liỹa sa'xat? Ma' mashic qaica ca idaaqa' quiyim sa'xat so Gedeón, so Barac, so Sansón, so Jefté, so David, so Samuel, chaqai queso letaxaỹaxanqajanqaipi ñi qota'a. ₃₃Sá'ogue so'maxare chicqochigui da lpi'ỹaxac quiyim 'ue na loxonec naqajñi 'lauaripi, chaqai 'maxaraic da lo'ueenataxanaxac quiyim nashi, chaqai icoñiguit da ỹachaxantac lotaanaxanaxac ñi qota'a, ỹapogui na lap na sauaxaic leta'allipi, ₃₄chaqai ỹo'mat na chalego lecaic norec, chaqai nañit quiyim qaỹalauat qaỹahote'e lecat. Chaqai na qaica ca lquesaxanaxa ỹovira'a quiyim quesaxanaxaiquipi, chaqai ỹovira'a quiyim 'ñaaxaiquipi queda nalauataxac, chaqai loxonec na npa'guenaxauaripi. ₃₅'Uo' ana 'aalo liỹa icoñiguit na lasauaxanec liỹa nca'leuec.

Chaqai 'uo' na ileu queda ne'guenaxac, qam se ỹa'maxaren quiyim qaỹosouec, ma' ỹahotaque quiyim liỹa qanca'laxatec quecá'maq paguec loyac nca'laxa. ₃₆Chaqai na liỹa ỹovirau'a da ne'naxac, chaqai da nouaxanaxac, chaqai vire'ta qaỹahote'e na lequet quena ncoñiitaxanaxaqui. ₃₇'Uo' na qaỹalauat qaỹodoota'a na qa', chaqai qaiconaqta'gue na lavinñi, qaillilec da ne'guenaxac, qaỹalauat qaỹahote'e lecat, chaqai taaguilo nodaatec ỹansañi naua loho chicqaugui na qagreta chaqai na quetaq loshicmaxa, ỹaatqajam 'ue da le'xoric, chaqai da ne'guenaxac, chaqai se qaỹa'maxata'gue. ₃₈Ca' sojo qomyipi sqa taiguit quiyim lauora na qomyipi hualoxonyipi hueetalec ana 'laua, ca saua'maxare chaqai queetalec na 'laua qaica qom, chaqai ana quemaralec ladocai, chaqai na lauac na 'laua, chaqai ana temaipi. ₃₉Sá'ogue so qomyipi ỹaatqajam qaỹa'maxarenta quiñi qota'a, ma' 'ue da lpi'ỹaxac, qam se icoñiguit cá'maq ỹachaxantac ñi qota'a, ₄₀ma' ñi'maxare 'uo' cá'maq paguec loyac ỹa'maxatetañi. Ỹa'deentapegalo qomi', qaiyi 'maxaraic nqohin da nachaalataxac so qomyipi, qam quiyim na'deita'gueta qomi'.