Hebreos 5
1Ma' quiñi 'óna la'gaxala' na netaxaỹaxanqajanqaipi qanca'au'a quena qomyipi quiyim retaqalec nqohin na qomyipi quiñi qota'a, chaqai quiyim ỹaano ana nachitaxanataxanqate chaqai ana liỹa qaỹavigaxat, qaiyi qaỹapalaxat na nasauaxaset. 2Ma' na la'gaxala' na netaxaỹaxanqajanqaipi qai'neeta qaica ca lquesaxanaxa, 'nejem na liỹa qom, ca' ishit 'ue da leualaxavic quená'maq qaica ca ỹa'den chaqai na ỹo'meetac. 3Chaqai quedá'maq ma' sqaica ca la'ñaxac, ca na'maxare qai'neeta ỹaano aná'maq chi lachitaxanataxanqate quená'maq chi lasauaxaset quiyim ỹavigaxat, 'nejem quená'maq lasauaxaset na liỹa qomyipi.
4Qaica ca ishit quiyim nanoiquentac 'naac quiyim na'gaxala' quena netaxaỹaxanqajanqaipi; ta'ta'a quiyim noỹaxanaxat quiñi qota'a, ca ỹa'ue da lemaqachic, ca 'nejem nqai'en na'le so Aarón. 5Ca' chaqaida 'neeta nqohin so Cristo; so'maxare se nanoiquentac 'naac quiyim lashi na netaxaỹaxanqajanqaipi, ta'ta'a quiyim chaqaiñi ñi qota'a ỹaanem da lemaqachic. Ma' chaqaido' dá'maq 'naaco' na'le:
Qami' na' qami' ỹaalec,
saañiraxarom da rca'laxa'e' nagui.
6Qaican ỹapaguec quedá'maq liỹa 'naaco' na'le quenaua naneresañi la'qaatqa ñi qota'a, 'neracsa':
Qami' sqaica lqodoc quiyim qami' letaxaỹaxanqajnec na qomyipi quiyim taqaira'pegue' aỹim,
'nejem da 'neetari' na'le so Melquisedec.
7Co'na' so Cristo hueetalec najo 'laua ỹaatqajam nelamaxaren nqouagaxaintac, chaqai rashiilaxantac, noỹento'ot ñí'maq 'ue da lquesaxanaxa quiyim se ỹovira'a nqai'en da nelauaxa. Ca ñi qota'a na'xaỹaxana so'maxare, ma' so'maxare ỹaatqajam nomatalta' nañaanot ñi'maxare. 8Ca' so Cristo 'eno'm ỹaatqajam ñaalec, qam ỹovirau'a da le'xoric, ca' ỹa'den quiyim na'xaỹaxanta. 9Ma' so'maxare ỹaatqajam qanaloqojonchiguiñi da no'ueenataxac, ca ỹovirau'a quiyim chicqochigui nqohin dá'maq nca'laxa sqaica lqodoc quená'ogue ná'maq huelec so'maxare. 10Ca' ñi qota'a ỹanagui quiyim chaqaiso so la'gaxala' na netaxaỹaxanqajanqaipi quiyim qaretaxaỹa'pegue' ñi'maxare, 'nejem na'le da no'ueenataxac so Melquisedec.
Da lichic queca mashic qaica da lpi'ỹaxac
11Ca qomi' 'xoic quet na sa'xataq quedajo, qam 'xoic lqalaic quiyim qaỹa'xateta da leloxoỹaxac da'maxare, ma' qamiri sqai viitaque quiyim 'yiiñii. 12Ma' mashic shi'gom nagui nalootañi quiyim paxaguinataxañitaiquet, qam qaiyiita viñitaque quiyim liỹa qaichoxochichiguilo nauá'maq se qalachi lapaxaguinataxanaxaco ñi qota'a. Ca' pillichigui quiyim ra'lliite'm qamiri, ca' viñitaque quiyim qane'taxañiguilo qamiri caua lo'i', mesqai ca ỹaatqajam resalli na'ic. 13Ma' ná'maq ñaqai ne'teetapiguilo naua lo'i', 'nejem ca noctoqui' ñaqai llipetac. Ca saqa' ỹovita quiyim ỹa'den cá'maq llicyaxac dá'maq no'uen 'ueenataxac. 14Ma' ná'maq ỹaatqajam na'ic ta'chiguit ná'maq qom mashic ỹi, ná'maq mashic ra'deenataxan, ná'maq mashic ỹa'den quiyim retan ca lo'yaxanec chaqai ca se no'uen.
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
