Isaías 42

₁'Ena hueete'e na ilaatec, na'maxare ñolliitañi,

ñi'maxare ica'acsec, ỹaatqajam yqo'ta.

Sellaagui ñi'maxare so ñi'espíritu,

qaiyi noviraxat ca na'maxa quená'ogue na ỹoreta'oguit qomyipi.

₂Se ỹaualaq, se nelamaxaren

se qara'xaỹa ca lavillaxac quenaua nayico,

₃mese ỹaqaguichigui aca noqola late'e mashic cona'gue,

chaqai se ỹo'mat ca ncoỹeraxanaxat imeetapego ca lauaq.

Ỹaatqajam lliqueta noviraxat ma'le ca na'maxa.

₄Se nco'matec chaqai se neualñi dá'maq 'neetari',

chi ỹovireto'o' ma' ỹa'ue ca na'maxa quena 'laua.

Na qomyipi cana delec nauaanta'guit ca lapaxaguinataxanaxac.

₅Ñi qara'gaxala' qota'olec ñí'maq ỹo'uet na piguim, ca' ipeguenec,

ñí'maq ỹo'uet na 'laua chaqai ná'maq ñaxat cana'maxare,

ñí'maq ỹa'ue da nachaalataxac chaqai na lacat na qomyipi hueetalec ana'maxare,

'naac queso lelaatec:

₆Ỹim na'gaxala', soỹaxana qami',

secona da rqai'laxachi',

qaiyi so'ueenataxana qami' queda nca'laxa;

ỹim so'viichi', ma' sahotaque quiyim qami'

netanec queda ña'deenaxac quena ỹalamaxareteripi,

chaqai ncoỹeraxanaxat quená'ogue na ỹoreta'oguit qomyipi.

₇Sahotaque neuanñi nqai'ñi' na qai'laqaipi,

quiyim naqachira'a na ncoñiitecseripi cañi ncoñiitaxanaxaqui

qaỹapootau'a quiyi hua'ñi na napalaxa.

₈Ỹim ná'maq ỹim na'gaxala' qota'olec, ca' chaqaida ỹeenaxat,

se sa'maxaren quiyim 'ue ca liỹa qoỹaanem da icaic

chaqai quiyim qaimaqachin na nashiilec nqolac ñigui nqohin aỹim.

₉'Ajñii quiyim ipaquichigui ná'ogue ná'maq shi'gue shinac,

nagui, ca lotqai dalaxaic ná'maq sa'xateta'guit;

sa'deenaxanaxaneguelo qamiri naua'maxare,

'eno'm saqa' novite'.