Isaías 52

₇¡Chalego loyac ma' qaiuañi'chiguit queetalgoto naua quemaralgoto

cá'maq nodo ca no'uen qara'xaỹaxac,

cá'maq nodo ca no'daxa,

ỹa'xateta'guit quiyim qanaqata'a na Sión,

ca 'naac quena'maxare: “Ñi qota'olec caqami', ñi'maxare nashi!”

₈¡Na'xaỹaxañiriñi! Na neloxoỹaripi quena na'a' lodegaxat ỹaualqatagui nelamaxaren,

qam da laualaxac 'naac rauegaxan,

ma' iuañi'chiguit quenaua nqote'

dá'maq 'neeta ñi qara'gaxala' quiyim rapila na Sión.

₉¡Chaqa'ma' ỹaualqagui queda netoonaxac

na 'imec lahillipi quena Jerusalén,

ma' ñi qara'gaxala' 'ue da lqouagaxa quena lalamaxareteripi,

ca' naqata'a na Jerusalén!

₁₀Ñi qara'gaxala' ỹachaxan da co'teeta lquesaxanaxa,

ca' qaiuanchigui quená'ogue na ỹoreta'oguit qomyipi.

Ca' quená'ogue na 'laua qaỹa'den ma'le

quiyim ñi qota'olec nca'laxaterec qomi'.

₁₁¡Noxoñiuec, chaqa'ma' noxoñiuec quena Babilonia,

totaxan coñiỹau'a na napio'o,

chaqa'ma' noxoñiuec quena Babilonia!

¡Ỹaatqajam nco'taxachita

ná'maq i'xat ma'le na louenqaipi quiñi no'ueenaxanaxaqui quiñi qara'gaxala'!

₁₂Qam nagui mesqai 'xoic ca riỹalaxahi quiyim noxoñiuec,

mesqai 'ec 'iichitac quiyim noxoñiuec,

mesqai 'nejem na' 'au qoyique'e yi Egipto,

ma' ñi qara'gaxala' ñí'maq qota'olec quena Israel

quenaua'que naua rahilli quepaqataxanteguelgoto qamiri ñi'maxare.

₁₃'Naac ñi qara'gaxala':

Ñi ilaatec ná'ogue ỹa'maqachiguiñi ná'maq ỹo'uet,

ca qoỹanalec ca noma' chalego lecaic, qaiyi qaimaqachin.

₁₄'Nejem dá'maq quiyim 'xoic ná'maq no'daxatetec na'le so'maxare,

na' ra'i'tot quiyim ỹoqa'am na lashic

mashic sham 'ec sqai qom,

₁₅ca' chaqaida 'neeta 'xoic ma'le na ỹoreta'oguit qomyipi 'ue da le'laxa;

na nashillipi ma' iuana, ca' tot qaicaua caua la'qaatqa queda le'laxa,

ma' iuana ma'le chaqai ỹa'den

cá'maq ỹaatqajam se ỹauanapega 'xaỹa.