Isaías 54

₁Qami' Jerusalén, qami' 'ec aca 'aalo se co'o,

qami' se ỹauanapega co'ii',

raualqaisari' queda raỹaaqui',

nachipishiguim nqai'ñi' ca ro'viinqui' queda netoonaxaqui',

ma' ñi qara'gaxala' 'naac caqami':

“Aca 'aalo nalate paguec ma'le ca llaalqaipi cana 'aalo 'ue ca loua.”

₂Noquiigaxachirec na qauochi' na'daañi,

piguiñirec ná'maq qauochi' ñi'so'ot, qaica ro'chiraque;

ladogaxachi' naua lequeete', ỹaatqajam tocqoichiriñi naua lauegaxalate,

₃ma' nqo'neuec qami' ma'le queda qatoiqui' chaqai queda nemaqe';

ca' qachaalaxai'ipi 'xoic ca loxonec na'aateripi ma'le,

ca' naalec ma'le na na'aateripi co'tejlec nagui.

₄Totaxan ro'chi'i', sqaica huapigui qavilli';

totqai qoyiga'a qami' chaqai qaica ca nayiloxoñisaque ma'le.

Coua'ire'e da nayiloxonaxaqui' na' ñaqai qami' nogot,

ca totqai o'lliinchite na' tot qaimaqachin da npa'ỹeshiqui',

₅ma' ñí'maq qami' lo'ueenata icona qami' ma'le quiyim qami' loua.

Ca' dá'maq leenaxat ñi'maxare na'gaxala' qaica lqalanec;

ñí'maq naqata'a qami', ñi'maxare co'teeta qota'olec quiyi Israel,

ñi'maxare qota'olec quená'ogue na 'laua.

₆'Ec qami' aca noua ñaqai nogot

qaỹalat chaqai 'xoic da le'xoric,

qam ñi qota'olec caqami' lotqai liỹa roỹaxana qami', ca 'naac:

₇Salachi' na'le, qam se ladoguec,

qam chalego da iqouagaxa na'le caqami',

ca' lotqai liỹa sopilliguit qami'.

₈Na' ñaqai hue'ejta' so iuel, ca' shique'e qami', qaiyi sqai huañiriua',

qam queda i'xorenataxanaxa sqaica lqodoc, ca lotqai yqouaguegue qami'.

Dajo 'naac ñí'maq qara'gaxala' ñí'maq naqata'a qami'.

₉'Nejem na' saanec da ỹa'qaatec queso Noé na' 'ue so nqodoc,

ca' tot liỹa i'paxanlec nqaishin na 'laua quena huaxaỹaq,

ca' chaqaida 'neeta nagui saanec da ỹa'qaatec

quiyim tot yoquii'a qami' chaqai tot sa'xalen qami'.

₁₀'Eno'm ana qa' ladocai nqo'in ỹoỹoota'a ca loma'

chaqai naua quemaralgoto taari'nquira,

qam dá'maq iqo'iichi caqami' se nadalaxat

chaqai se nqo'ñiñi dá'maq qana'deenaxac queda no'daxa.

Dajo 'naac ñi qara'gaxala' ñí'maq 'ue da lqouagaxa caqami'.