Isaías 58

₁Ñi qara'gaxala' qota'olec 'naac caỹim:

Se ro'chi'i', taxahi' nelamaxariñi',

'ec npe'te nqai'ñi' ca qavillaxaqui';

relaqaita na ỹalamaxareteripi llaalqaipi so Jacob quedá'maq se no'uen ỹo'ueetetac chaqai queda lasauaxaset.

₂Naua'que na'xata' idaantaque aỹim,

ca ỹa'maqachigui lauel ma' ỹa'den da ñayicyaxac,

'ec ca qom ỹo'ueetetac ca ỹa'maqachiguiñi

chaqai 'ec quiyim se napacalgoto naua ilaataxanaxaco;

ỹahotaque quiyim saanem ca 'maxaraic ỹaqataxac

chaqai 'ue da netoonaxac ma' sqoỹoqaque caỹim.

₃Qam quena'le, ca 'naac:

¿Negue' quet cá'maq 'negue quiyim ñqopaaqachit? ma' ñi qota'olec se iuanalo qomi'.

¿Negue' quet cá'maq 'neeta quiyim qareuogoq? ma' ñi'maxare se retane' qomi'.

Só'maq na'xa'a nqopaaqataxaguii remiilec da nemeenaxaguii

chaqai quiyim chiitegueñi na 'ueenataxanaxairipi;

₄cá'maq na'xa'a nqopaaqataxaqui ta'ta'a da napetaxaguii chaqai da nco'uaxaguii,

huaxanaxañitac viita'ahi naua nashitaxañii.

Cá'maq na'xa'a quiyim qopaaqataxaqui 'neetari' dajo,

se ishit quiyim ña'xaỹaxana ca nqouagaxainaxaguii.

₅¿'Ñiitapego' quiyim ca yqo'ta qopaaqataxac

taỹaugui quiyim ỹahotaque ca le'xoric,

chaqai quiyim nanaxañi nqai'en ñi lqahic 'ec aca na'uaate

chaqai quiyim nenanñi queeta'anto caua loho ne'xoyaxaqui' hueetañigui ca lo?

¿Chaqaido' dá'maq 'ñiỹac qopaaqataxac

chaqai ñi qara'gaxala' nqo'ta sojo na'xa'a?

₆Qam mesqaida.

Ma' cá'maq qopaaqataxac yqo'ta 'neetasa':

quiyim qaỹachipiaxate' daua lequeete' da se no'uen

chaqai qaỹosoguilo naua motel naua nequeetenaxanaxat ỹauego;

chaqai quiyim qoỹaxanec ná'maq 'xoic na le'xoric

chaqai 'xañiriñi ná'ogue ná'maq chicqaugui da nqa'viic;

₇quiyim nouañise'e' ca qopaaxaic queca qanoqe'

chaqai quiyim na'ñi ca ra'aachi' ca qaica ca lauo';

chaqai quiyim vite ca looỹac cá'maq sham neetauec

chaqai quiyim rqouaquitegue cá'maq riỹa'e'.

₈Ca' ma'le, ca re'oq ca lauaq aca rcoỹeraxanaxagui'i' 'ec quiyim richiitegueñi,

ca' sqaỹaloq imeuec na rcoñiraxa'e'ipi.

Ca na'maqataxaqui' 'auetauec caqami',

chaqai da iquesaxanaxa sqo ỹoxe'oga caqami'.

₉Ca noma' ỹaxañiraque aỹim, ca' ỹim sasaachiguit qami';

chaqai no'm raualqe' ỹaxañisaque ca notaanaxaqui',

ca' ỹim shinac ma'le: Aỹim seuete'e najo.

No'm na'laañi nqai'ñi' ná'ogue na npataxasoxonaxac,

no'm sqai quira'a ca liỹa chaqai se na'majñirelec,

₁₀no'm nañaañiralta' quiyim rqouaquitegue ca qopaaxaic,

no'm tauañi' cá'maq 'ue ca louenaxanaxa,

ca' naviguec aca rcoỹeraxanaxagui'i' queca napalaxa,

ca' ra'alli' ñigui ca lauaq yi na'xa'a lavinñi.

₁₁Ca' ỹim se neme sashaxañi'sac

chaqai 'xoic nqaishin ca qanoqe' quiyi 'laua qaica qom,

sa'ue lquesaxanaxa na roshicmaxa'e',

'ec nqaishin qami' ca nanaxanqa' se neme ỹaquitetalec,

'ec ca ne'paxantashiguim huaxaỹaq se neme.

₁₂Na ralamaxarichi' liỹa no'xonshiguim na ropoqogui 'imqaipi

chaqai ỹa'ñaxajñi na no'xonaxanaxala' ñaauapec.

Ca' qaỹamata'gue na ralamaxarichi'ipi:

nadalaxashiguim ná'maq mashic 'guiñi napoxonqateripi,

liỹa no'xonshiguim na 'imqaipi 'guiñi.