Da loỹaxanaxac ñi qota'olec queso Isaías quiyim letaxaỹaxanqajnec
1Queso ñaaxa na' ileu so nashi Uzías, ca' seuana ñi qara'gaxala' qota'olec nqa'xantañi quiyi nqa'xanqa' qoỹoqoshi'ma; ca naua lo'lo' so napoxoqui no'xataxachichigui ñi no'ueenaxanaxaqui quiyi Jerusalén. 2Ca' 'vii saua ỹaviquetauguilo pa'aasashiguim queso'maxare. Seis naua laua' quiñi 'óna, quesaua dos laua' ỹapoosagui na lashic, quesaua liỹa' dos ỹapoosalec na hua'nquira quena loshicmaxa, chaqai quesaua liỹa' dos, ca' ỹo'. 3Chaqai quena' retaxahi' 'neracsa':
Co'teeta, co'teeta, co'teeta ñí'maq qara'gaxala' qaica ca lqalanec;
ná'ogue na 'laua no'qajlec queda lauaq.
4Ca' queda lelamaxa da lavillaxague', ca' naua lasomi' ñi no'ueenaxanaxaqui lodegaxat redaỹa'pe, chaqai ñí'maq no'ueenaxanaxaqui no'qaachigui quena nesalaxaripi. 5Ca' da ỹa'deenataxanaxac 'neetasa': ¡'Xoraicolec aỹim; nagui, ca' yileu! Ma' mashic seuana quenaua ñqote' ñi nashi, ñi qara'gaxala' sqaica lqalanec; ma' ỹim qom, ca' se no'viiñi naua ỹa'qaatqa, chaqai salequetaugui na qomyipi se no'viiñi naua la'qaatqa.
6Ca' quiyi na'le, ca' 'ue so 'óna quesauá'maq ỹaviquetauguilo naỹo'ña aỹim, lo'qoota'a aso poqo ỹachigoxotalec ada ncopatoxonaxalate, ỹahote'e aso leconaxanqate. 7Ca' ỹouoocau'a nqai'en aso poqo na ỹap, ca 'naac:
'Anta, najo poqo ỹouoocau'alo naua qadapchi'.
Ca' naqata'a da se no'uen caqami',
chaqai da rasauaxashichi' mashic qaỹapalaxat.
8Ca na'le, ca' sa'xaỹaque ñi qara'gaxala', 'naac:
¿Nega'ỹo' cá'maq sela'?
Ca ¿nega'ỹo' cá'maq qara'qaataxanqajnec? Ca' ỹim sasaat na'le, shinac:
Mashic seuete'e najo, aỹim 'ena, yilachi'. 9Ca' ñi qara'gaxala' 'naac caỹim:
Mo'e', ca 'ñiraco' ma'le dajo quiyi qomyipi:
'Eno'm 'xahitapega, qam sqa 'yiiñii;
'eno'm 'ajñitac, qam 'ec sqai huañiỹa.
10Ra'ñii nqai'ñi' yi la'deenataxanaxac najo qomyipi;
po'iriguilo naua lque'laa lauaco, 'xachiriguilo naua nqote',
qaiyi se reuanaxan chaqai quiyim 'qaa,
chaqai quiyim se ỹa'deene'uegue,
qaiyi se rapilot aỹim,
qaiyi se somatec. 11Ca' ỹim senat na'le:
¿Laquio' ime dajo, qami' qara'gaxala'? Ca' ñi qara'gaxala' 'naac:
Dajo ỹovireto'o' ma' qanopoxoỹaxajñi na na'aateripi
chaqai qaica ca no'ueenashiguim quena qom;
chi ỹovireto'o' ma' qaica ca qom nauguilo naua 'imqa,
chaqai naua no'ueenaxari qaica ca naalgoto,
12chaqai ñi qara'gaxala' na'ac nqai'en na qomyipi, ỹoqa'a ca qaỹaueguegue,
ca ná'ogue najo 'laua co'tejlec.
13Chaqai no'm sqo vito'olqai' caua no'ueendañi quenajo qomyipi,
qaiyiita qanalauajñi ma'le,
'ec quena' qaỹouaxanlec aca qo'paq roble loqo'm aca encina,
ca' qacaata aca loỹo no'ueenañi.
(Ca acá'maq dalaxai llaxataxai aca loỹo, ca lalamaxarete ma'le ñi qota'olec.)
