1Paguec da i'xorenataxanaxa caqami', qami' Sión, qaỹamata'gue Jerusalén,
vichiguiño' se yi'maqata qaica ca shinac chaqai se ñco'matec,
vire'to' ma' re'oq ca qadoxonaxanaxaqui', 'ec quiyim re'xolecna,
chaqai da rca'laxa'e' ma' 'ec aca ncoỹeraxanaxaqui ỹaviquetaugui.
2Na ỹoreta'oguit qomyipi iuana ma'le ca rca'laxa'e',
ná'ogue na nashillipi iuana ma'le da rauaqe'.
Ma'le, ca' chaqaiñi ñi qara'gaxala' ỹa'ue ca dalaxaic qadeenaxachi'.
3Qami' 'ñiisari' aca no'uen nashi nado'o
lo'qoota'a ñi qara'gaxala' qota'olec.
4Ca' tot qohinac caqami' Nalate,
chaqai na na'aateripi quena na'laua'e' tot qohinac Qanopoxoỹaxajñi,
ta'ta'a dá'maq qadeenaxachi' ma'le 'neetasa': Paguec iqo'itqate qami',
chaqai dá'maq leenaxat na na'laua'e' Ỹoua.
Ma' qami' aná'maq paguec lqo'itqate ñi qara'gaxala',
ñi'maxare 'neetari' ca loua na na'laua'e'.
5Ma' 'nejem ca ne'necoqui' quiyim shilliguit aca napiitaxaua,
ca' chaqaida 'ne'tegue ñi qota'olec icoñiraxaua' quiyim qami' loua,
liỹa no'xonshiguim aqami', ca' netoonta'pegue qami',
'nejem cá'maq chita'gue 'on netoonta'pegue aca loua.
6Qami' Jerusalén, quenaua rquepaqataxanqachichi' sa'vii naua neloxoỹa',
se i'machiñi quiyi na'xa'a chaqai yi pe 'nerac:
Se i'maqata ná'maq mashic ỹashiila ñi qara'gaxala',
7sqai 'xañiigue quiyim nco'matec,
vire'to' ma' liỹa no'xonshiguim na Jerusalén
chaqai quiyim ỹo'uet quiyim ná'ogue na ỹoreta'oguit qomyipi quena 'laua imaqachin na'maxare.
8Ñi qara'gaxala' nallitalta', ỹaanec da la'qaatec,
nanojshiguim da loic, ca 'naac:
Tot qaica ma' liỹa quet quiyim saxanegue
quiyim ỹa'ic na qadañicshiqui' trigo na npa'guenaxaua'e'ipi
chaqai na ỹoqa'a na chicqa'gue quiyim ni'chigui
ná'maq chi ro'ueenachiqui' lataxa;
9ta'ta'a quiyim chaqaqamiri naqachii ná'maq qadañicshiguii,
chaqai 'guii ma'le, ca' yimaqachiñii;
chaqai naqachii ana 'uva,
ca' ni'chiigui na lataxa quiyi nasoxoc ñi ỹo'ueenaxanaxaqui.
10Noxoñiuec, nenoxoñiuec, quiitouguilo naua lasomi' na Jerusalén,
no'ueenaxachii na nayic, lligo na ỹalamaxareteripi.
Ỹaatqajam 'maxachiichiguiñi na ñigo
co'taxachiigue quena qa';
ca' vii ca netanec qoỹoqoshi'ma nqai'ñii,
ca' qaroỹaxane'oga na ỹoreta'oguit qomyipi.
11Ñi qara'gaxala' ỹa'xateta'guit dajo
quenaua'que naua lahil na 'laua:
'Ñiỹapega na na'a' Sión:
mashic novi' na nca'laqatqochi'.
Na qara'gaxala' noviraxat na lalamaxareteripi,
na' ime quiyim louootaxanaxat.
12Ca' na llaalqaipi so Israel qaỹamata'gue:
Ná'maq co'teeta nalamaxaret,
Ná'maq qaỹosouec quiñi qara'gaxala',
chaqai na Jerusalén qaỹamata'gue Na'a' nqo'itaxat,
Na'a' se ỹauanapega qaỹalat.
