Se ỹa'maxañi quiyim qanca'atagui na qomyipi
1Qamiri ỹaqaỹa', ma' mashic viilec so chalego lecaic qara'gaxala' Jesucristo, ca' se ỹa'maxañi quiyim nca'aitagui na qomyipi. 2Ma' sqoue quiyim inoxondo caua dos qomi' caca ro'ueenaxanaxaguii, ca' ca 'óna neetaguilo naua napoquena aca nichicshaqate oro, chaqai caua loho ỹaatqajam lo'yaxanqa, ca' ca liỹa ỹansañi caua noho iterete'. 3Ca no'm paguec quelolliguit cá'maq ỹansañi caua lo'yaxanqa noho, ca' 'ñiỹapega: “Nqa'xañisanquio' ma'le ana lo'yaxana qa'xanaxaqui”, qam queca 'xoraic, ca 'ñiỹapega: “Qami' viise'e najo nachaachisañi, loqo'm nqa'xañisañi quena 'laua”, 4ca no'm 'ñiita dajo, ca chaqa'ma' nca'aitagui na qomyipi. Ca' dajo rca'axanaxaguii chicqaugui dá'maq se ỹa'maxañi ra'deenataxanaxaguii.
5Qamiri ñauochaxaua' ỹaqaỹa', ñaq na'xaỹaxañiỹa da ỹa'qaatec: Ñi qota'a lca'acsec na 'xoraic qomyipi quená'maq hueetalec na 'laua, ma' ỹahotaque quiyim 'ec nesallaxanec queda lpi'ỹaxac chaqai quiyim ỹalecau'a icoñiguit cá'maq ñaqa naataho lo'ueenataxanaxac ỹachaxantapeguem ná'maq nqo'ta ñi'maxare. 6Qam qamiri viitaque na layiloxo na 'xoraiquipi. ¿Peeta'a mesqaino' na nesallaxanqaipi ná'maq ỹa'ue da re'xoriguii? ¿Mesqaino' ná'maq ỹahoglentau'alo qamiri na nashillipi? 7¿Mesqaino' na'maxare ná'maq ishiuentac da lo'yaxanec leenaxat so Cristo dá'maq ỹaanema qamiri ñi qota'olec?
8No'm ipaquichigui nqai'ñii dá'maq ỹaatqajam naqataxac ma' chaqaida dá'maq 'naac yi naneretañi na'qaatec: “Rauochitegue ca riỹa'e', 'ñiisa'gue quiyim qami' nauochiralta'”, ca' 'viichisac dá'maq ỹaatqajam ỹa'maqachiguiñi. 9Qam no'm nca'aitagui na qom, ca' 'ue ca rasauaxashichii, soviỹalec da quiyim se na'xaỹaxañiỹa na laqataxaquipi ñi qota'a. 10Ma' no'm ca qom na'xaỹaxane'ta dá'ogue da naqataxaquipi, qam 'oonoqui' ca napacalec, ca' ỹo'maqajnac dá'ogue da naqataxaquipi. 11Ma' chaqaiñi ñí'maq qota'a ñí'maq 'naac: “Se lapa'ira'ñi' aca se roua'e'”, qai'neeta 'naac: “Sqa lauataxañi'.” Ma' no'm 'ue ca se lapa'ñi' aca se loua, qam ralauataxan, ca chaqa'ma' se na'xaỹaxana na naqataxaquipi. 12Ca' qamiri, quiyim taxahi chaqai na'maxachita, 'ñiitari' ca quiyim qaimite' qamiri ma'le quena naqataxaquipi, ná'maq ỹo'uet quiyim qaica cá'maq quepaxate' qomi'. 13Ma' cá'maq se i'xoren ca liỹa, ca' chaqaida qohine'tegue. Ma' qaimit, ca' se qai'xoren. Qam cá'maq 'ue ca le'xorenataxanaxa, ca' qaica ca qohinegue, ma' ỹovita ca na'xa'a quiyim qaimit.
Da npi'ỹaxac chaqai da no'uen lo'ueenataxanaxac
14Qamiri ỹaqaỹa', ¿negue' queto' ca 'negue queca qom quiyim 'naac 'ue ca lpi'ỹaxac no'm qaica ca lo'ueenataxanaxac ỹa'maqachiguiñi? ¿Peeta'a ishito' nca'laxatec dajo lpi'ỹaxac? 15Ma' no'm 'ue ca qarqaỹa ỹale loqo'm 'aalo ỹouentaque ca looỹac loqo'm ca lepetaxanaxat quiyi na'xa'a, 16ca quiyim 'ue ca 'óna caqamiri ishit 'naapega: “Mo'e', qui', qaicanqaida ma'le queda qayicyaxaqui', sqo viñire'e ma'le ca qatooỹaqui' chaqai ca qanoqe'”, qam no'm sqai ỹaanem cá'maq ỹouentaque, ca ¿negue' ca 'negue dajo? 17Ca' chaqaida 'neeta ca lpi'ỹaxac ca qom. No'm qaica ca ỹa'maqachiguiñi lo'ueenataxanaxac, ca da lpi'ỹaxac 'ec ileu.
18Qam no'm 'ue ca 'naac: “Qami' 'ue da rpi'ỹaxaqui', qam ỹim 'ue da ỹo'ueenataxanaxac ỹa'maqachiguiñi.” Qam ỹim shinac: “Ñigo' chaxañitem aỹim ca rpi'ỹaxaqui', quiyim qaica ca ỹa'maqachiguiñi ro'ueenataxanaxaqui'. Ime, ca' ỹim sachaxanem qami' dá'maq ỹa'maqachiguiñi ỹo'ueenataxanaxac chicqochigui da ipi'ỹaxac.” 19Qami' ỹaatqajam 'ue da rpi'ỹaxaqui' quiyim virelec 'oonoqui' ñi qota'a. Ca' dajo ỹa'maqachiguiñi. Qam dajo qai'neeta huelec na lelaatqaipi so na'ỹaapec, qam i'loxol quena lqolonaxa. 20Qam qami' sqa 'maxariñi', ca' ỹaatqajam qaica ca 'yiiñi', ma' no'm ca npi'ỹaxac sqaica ca ỹa'maqachiguiñi lo'ueenataxanaxac, ca' cajo npi'ỹaxac 'ec leuaxaic. 21Ma' ñi qota'a 'naapega quiyim ỹaatqajam lo'yaxanec ỹale so 'auaxaic qareta'a Abraham quedá'maq ỹo'uet na' inaxalec ada ncopatoxonaxalate so llaalec Isaac ỹauaaque lachitaxanataxanaxat. 22'Ajñi' da 'neeta so Abraham dá'maq re'oq nqai'en quiyim 'ue da lpi'ỹaxac quedá'maq ỹo'uet, ca' dajo lpi'ỹaxac ỹovira'a quiyim ỹaatqajam naloochiguiñi quedá'maq ỹo'uet ỹa'maqachiguiñi. 23Ca vichiguiño' ipaquichiguilo naua nerecse' na'qaatqa, ma' 'nerac: “So Abraham 'uo' da lpi'ỹaxac quiñi qota'a, ca quedajo lpi'ỹaxac, ca' ñi qota'a ỹa'maxarenta, ca' 'naac quiyim lo'yaxanec ỹale.” Ca' so Abraham qaỹamata'gue quiyim nauochaxaua ñi qota'a.
24Ca' ñaqa 'ajñii qamiri, ma' ñi qota'a ỹa'maxarenta qai'neeta ca qom quecá'maq ỹa'maqachiguiñi lo'ueenataxanaxac, mesqaidaata da lpi'ỹaxac. 25Ca' dá, 'neeto' na'le aso nanatqa lo'o', leenaxat Rahab; ñi qota'a ỹa'maxarenta, ca' 'naapega quiyim lo'yaxana 'aalo quedá'maq ỹo'uet. Ma' so'maxare la'qarañi nqai'ne' quiyi la'a' saua qaỹauaapigui na'ajnaxanqajanqa, chaqai ỹotauane' quiyim ỹoqa'a ca nayic queetere'uegue nqai'ne'. 26Ca' chaqai 'nejem na qaroshicmaxa quena' qaica na lacat, ca ileu, ca da npi'ỹaxac qai'neeta 'ec ileu quena' qaica ca re'oq ỹa'maqachiguiñi lo'ueenataxanaxac.
