Jueces 1
(1.1-17,20,22-26 Nalauat chaqai rauegaxan so llaalqaipi so Israel na' shi'gue ileu so Josué)
Dá'maq 'neeta so llaalqaipi so Judá chaqai so Benjamín co'na' rouootaxana'gue so 'laua
18Qam se qaishit qarouootaxana'gue yi na'a' Gaza, Ascalón chaqai yi Ecrón chaqai yá'ogue yi 'laua lauoraripi. 19Ca 'eno'm ñi qara'gaxala' liỹaatac so llaalqaipi so Judá, ca so'maxare ishit rouootaxanegue yi hua'ñi ana 'xoic ana quemaralec qa' ladocai. Qam se ishit ỹo'daauec só'maq neetalec so quemarelec, ma' 'ue ana lahoglena fierro lauataxaqui. 21Qam so llaalqaipi so Benjamín se ishito' na'le ỹo'daauec na jebuseoipi na'ñi yi Jerusalén. Ca' vichiguiño' ñaqaina na jebuseoipi chaqai na llaalqaipi so Benjamín ñaqai neetalec yi Jerusalén.
Na lqodoc na louootaxanaxat 'lauaripi so llaalqaipi so Manasés chaqai so Efraín
27Ca' queso llaalqaipi so Manasés se ishit ỹo'daauec yi na'ñi yi Bet-seán, Taanac, Dor, Ibleam chaqai yi Meguido, chaqai ná'maq neetalgoto na sqoỹoqapigui 'lauari queso na'aateripi. Ca' na cananeoipi ñaqaina neetalgoto naua'maxare. 28Ca co'na' so Israel llaalqaipi nqo'neuec da lquesaxanaxa, ca' ishit quiyim ỹaatqajam 'ec la'aquipi so cananeoipi, ỹaatqajam resalli nqai'en da lo'ueenataxanaxac, qam se ishit ỹo'daauec.
29Ca' so llaalqaipi so Efraín qai'neeta se ishit ỹo'daauec so cananeoipi neetalec yi Gezer. Vichiguiño' ñaq ỹalequetaugui na'maxare.
Dá'maq 'neeta da loxonaxanaxac so liỹa Israel llaalqaipi
30Ca' so llaalqaipi so Zabulón qai'neeta se ishit ỹo'daauec na cananeoipi neetalec yi Quitrón chaqai yi Naabal. Vichiguiño' ñaqaiyi neuoraripi, 'eno'm quesaxan nqohin na lo'ueenatec.
31-32Chaqai na llaalqaipi so Aser qai'neeta se ishit ỹo'daauec na cananeoipi neetalec yi Aco, Sidón, Ahlab, Aczib, Helba, Afec chaqai Rehob. Ca ma' se ishit ỹo'daauec quenaua la'aate', ca' chi lauoraripi na'maxare.
33Ca' so llaalqaipi so Neftalí qai'neeta se ishit ỹo'daauec na cananeoipi quiyi Bet-semes chaqai yi Bet-anat. Ca' ỹaatqajam quesaxan nqai'en na ỹaanem lo'ueenatec, ca' chi lauoraripi nqai'en.
34Ca' so amorreoipi se icoñiguit so llaalqaipi so Dan. Ỹocanac, ca' ỹoviraxata'a yi quemaralec qa' ladocai se qaỹa'maxaren quiyim renojñi quiyi 'laua quemarelec. 35Ca' chaqaida 'neeta quiyim so amorreoipi ñaqaiso neetalec yi Heres, Ajalón chaqai yi Saalbim. Qam co'na' so llaalqaipi so José nqo'neuec da lquesaxanaxa, ca' ỹaatqajam quesaxan nqohin na lo'ueenatec.
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
