Jueces 16

₁Ca 'uo' so na'xa'a, ca' so Sansón quepegue' yi na'a' Gaza. Ca' quiyi, ca iuano' aso 'aalo nanatqa lo'o', ca quepegue' yi la'a', ca lapa'ñi' queso pe. ₂Ca co'na' 'ue da la'xaỹaxac so ỹalliripi na'ñi yi Gaza ỹa'den quiyim so Sansón hueeta'ñi yijo na'a', ca nahiquinchiguiñi, ca reloqota'a ñi lasom yi na'a' quesá'ogue so na'xa'a. Ca na' pe, ca' queuo, nco'matec, ỹa'deentapega quiyim ma' richiguiñi, ca' ỹalauat. ₃Qam so Sansón qaisoota queso pe lauel lapaata'ñi' aso 'aalo. Ca co'na'le, ca' ne'laxashiguim, ca napocshiguim so lasom yi na'a', liỹaarashi'mto saua nojnaxal chaqai so lquepaxaset, ca sá'ogue nallaaquen, ỹodoshi'megue ada quemaralec ladocai naloote'oga yi Hebrón.

₄Ca co'na' shi'gom, ca' so Sansón nqo'to' aso 'aalo, leenaxat Dalila. So'maxare na'ñi so ca'megue, leenaxat Sorec. ₅Ca' so lashillipi na filisteoipi quepegue' aso Dalila, ỹahotaque quiyim retaxaỹa'pegue', 'naaco':

—Yiñi' ma'le so Sansón, chaqai nachi' quiyim negue' ca ỹachigoxota'gue dá'maq chalego lquesaxanaxa qaica 'nejem, chaqai negue' quet cá'maq shinqata'gue quiyim qodoxonec, qaiyi seconaxalec, ca' scoñirqañi. Ca no'm 'viichi' dajo, ca' quiñi 'óna coqomi' saanqairaxarom mil cien ana nam plata.

₆Ca co'na'le, ca aso'maxare 'naaco' queso Sansón:

—Qouaquiric, 'qaataxañiriua' negue' cá'maq chigoxochira'gue dá'maq chalego rquesaxanaxa'e' qaica 'nejem. ¿'Uo' ca 'neeta ca qohine'tegue ca ncoñiitaxaqui' quiyim sqai nouec qami'?

₇Ca' so Sansón 'naaco' caso'maxare:

—No'm qaycoñirari' quecaua siete lequet ana no'xoshic isecỹac loshicmaxa dalaxaicolec saqa' rashivi', ca' na'laañi ma'le da iquesaxanaxa, ca shintari' canchaqaica liỹa qom.

₈Ca' so la'gaxalateripi na filisteoipi ỹodou'a aso Dalila so siete loshicmaxa lequet ana no'xoso dalaxaiqolqa, ca' aso Dalila coñiitaxanalo queso Sansón. ₉Ca' aso'maxare ỹa'vii saua ỹale' nqañoxotesañi nqai'ne' hueesaugui so lauo'. Ca' ỹaualaxalec so Sansón, 'naaco':

—¡Sansón, 'ajñi' na filisteoipi novita qami', ỹahotaque nalauate'e' qami'!

Ca' so Sansón ỹachipiaxaterañi saua ñaqa, 'ec nqai'en ca ñic ỹavicañi. Ca' na filisteoipi se ỹa'den cá'maq ỹachigoxota'gue dá'maq lquesaxanaxa so'maxare. ₁₀Ca' aso Dalila 'naaco' queso'maxare:

—¡Qa' chi yayiñi'saco'! Qam nagui qouaquiric, choxochi' cá'maq 'neeta quiyim qaishit qarcoñichirañi.

₁₁Ca' so Sansón 'naaco':

—Quiyim qaycoñi', qarcoñiitaxana ca ñaqaipi dalaxaicolec saqa' qarcoñiitaxana, ca na'laañi da iquesaxanaxa, ca' shinta ma'le canchaqaica liỹa qom.

₁₂Ca' aso Dalila ỹacona so dalaxaic ñaqaipi, ca' coñira'gue so Sansón. Ca' ỹaualaxalec, 'naaco':

—¡Sansón, 'ajñi' na filisteoipi novita qami', ỹahotaque nalauachire'e'!

Qam aso'maxare lotqai ỹa'vio' saua ỹale' nqañoxotesañi nqai'ne' quiñi lauo' lauel. Qam so Sansón ỹachipiaxaterañi saua ñaqa, 'ec nqai'en ca cocho'qui' ñicoqui'.

₁₃Ca' aso Dalila lotqai 'naaco' queso'maxare:

—¡Ca' ñaqaiyiita yayiñi'sac, ñaqai qui'salec da ra'maachiqui'! ¡Ñaqai choxochi' cá'maq qohiñisaxaric quiyim qarcoñichi'!

Ca' so Sansón 'naaco':

—Dá'maq 'ñitetegue quet quiyim paxachi' caua siete ñipaqata, paxachichiguit ca lo'o na no'xonec. Ime, ca' ỹaatqajam tocqoichiriñi caua lashil. Ime, ca' na'laañi ma'le da iquesaxanaxa.

Co'na'le, ca' aso Dalila ilaqachit so Sansón, ca' iconalo saua siete nepaqata queso laue, ca' coñira'guita so lo'o so lo'xonec laqaletenec. ₁₄Co'na' ime, ca' ỹotocqoiñi saua la'daqate quena 'laua. Ca ỹaualaxalec, 'naaco':

—¡Sansón, nacpegue' qami' na filisteoipi, ỹahotaque ralauachi'!

Qam so Sansón na' ne'laxashiguim nachipiaxaterashiguim quiyi 'laua saua notocqosañi no'xonec lashil. ₁₅Co'na'le, ca' aso Dalila 'naaco' queso'maxare:

—¡'Maatqaic! ¿Qa'chica ma' 'ñirac rqo'chiriua'? Mashic tres nagui yi'ñirari', qam qaiyiita saqa'le' 'qaataxañirim negue' cá'maq chicqa'gue dá'maq chalego rquesaxanaxa'e'.

₁₆Qam ma' ỹaatqajam 'ue da lepagaxallic aso Dalila, naua'que naua na'xata' piltalec da renataxanta'pegue, chi ỹovireta'a quiyim so Sansón ỹaatqajam nco'te'guesop aso'maxare. Ca' ỹahotaque quiyim ileu. ₁₇Ca vire'to' na' ỹa'xatem aso Dalila dá'maq 'neeta da no'ueenataxac se re'xogui, 'neetasa':

—Ỹaatqajam se ỹauanapega qanepetec na iue, ma' na' saqa' ñi'qaañi chaqa'ma' shi'gue qaỹoỹoote'oga aỹim qayayaanot quiyim ỹim lalamaxaret ñi qota'olec. Qam quiyim qanepetec na iue, ca' na'laañi da iquesaxanaxa, ca' shinta cá'maq canchaqaica liỹa qom.

₁₈Ca' aso Dalila retan quiyim nagui ca' ỹaatqajam ỹa'xateta dá'maq se re'xogui no'ueenataxac. Ca' ila' da la'qaatec queso lashillipi na filisteoipi:

—¡Nagui maxasa', ma' ñi Sansón ỹaatqajam ỹa'xateta dá'maq 'neeta da no'ueenataxac se re'xogui!

Ca' so nashillipi quepegue', ra'ỹa'a, lo'qoota'a aso lishiuetenaxanqate.

₁₉Ca' aso Dalila ilaqachit so Sansón hueetalgoto naua loteletari nqai'en so lqahic. Ca roỹaxana so ỹale quiyim nepeteguerec saua siete nepaqata so lqahic. Ime, ca' aso Dalila ỹaatqajam se ỹa'maxata'gue so'maxare. ₂₀Ca ỹaualaxalec, 'naaco':

—¡Sansón, ñaqai 'ajñi' na filisteoipi nacpegue' qami' quiyim nalauate'e'!

Ca' nelouec so Sansón, ca 'neetapego' quiyim qohit 'neete'm saua 'auaxaqa na'xata', ma' se ỹa'den quiyim ñi qara'gaxala' shi'gue ca'e so'maxare. ₂₁Ca' so filisteoipi ỹaconlec so'maxare, ca naqate' saua nqote', ca' qaỹauega'a yi Gaza. Ca' qaicoñira'gue so caréno chicqaugui na bronce. Ca ro'ueenataxan nqohin caso nopoxoiqataxanaxaqui qa' caso ncoñiitaxanaxaqui. ₂₂Qam qaiyiita liỹa ñaxat so laue so'maxare.

₂₃Ca' so lashillipi so filisteoipi lapoỹata', ca' netoonegue da loxonaxanaxac, ca' ỹo'uet aso lachitaxanataxanqate ỹavigaxat, ca' ỹaanot so lashiilec lqolac Dagón. Ca ỹo'ueentac da lo'ueenec, 'neetasa':

₂₄Ca' na qomyipi na' ỹauanchigui dajo, ca' qai'neeta ro'ueenaxan chaqai imaqachintac so nqolac:

₂₅Ca' ỹaatqajam 'xoic da netoonaxac so qomyipi, ca rashiilaxanegue quiyim qanaueguec so Sansón, ma' ỹahotaque iualaxain. Ca' qanaqata'a cañi ncoñiitaxanaxaqui, ca qaỹaueguec, ca' qaiualaxaintac. Ime, ca nachajñi viichiguiñiguilo nqohine' saua dos nojnaxal sauá'maq nolliirañi so no'ueenaxanaxaqui. ₂₆Co'na'le, ca' so Sansón 'naaco' quesó'maq ne'nec ỹaueguec ỹaconta'guit:

—Yilli'ra'ño' cá'maq nera'ñi caua nojnaxal nolliirañi na no'ueenaxanaxaqui, ma' ỹim sahotaque sauaqatau'alo caua'maxare.

₂₇Sá'ogue so lashillipi na filisteoipi hueete'e ca no'ueenaxanaxaqui, ca sá'ogue no'qaachigui quena ỹale chaqai ana 'aalo. 'Uo' ca tres mil so qomyipi pa'aatashiguim ỹa'ajantac da neualaxainataxac so Sansón. ₂₈Co'na'le, ca' so Sansón ỹaualqot ñi qara'gaxala', ca 'naaco':

—Ñi'xoresene'tot, qami' ỹa'gaxala', quiyim 'eno'chaqai 'oonoqui' liỹa o'lliinchira'a aỹim, ca' nañaañi' ca iquesaxanaxa, qaiyi sa'ue ca ỹovi' quena filisteoipi quesaua ñqote' naqate'.

₂₉Ime, ca' ipootapigui saua dos nojnaxal sauá'maq nolliisañi sá'ogue so no'ueenaxanaxaqui, ca ỹacontau'alo saua'maxare. ₃₀Ca' ỹaualaq, 'naaco':

—¡Ỹileuaxaua shiqueta'ñi' na filisteoipi!

Ca' ỹamaxañi ỹomatalec da lquesaxanaxa, ca' 'guiñi so no'ueenaxanaxaqui, tajlec so filisteo lashillipi, chaqai taalec sá'ogue so hueeta'anyi. Ca paguec só'maq ỹalauat so Sansón na' ileu quecá'maq ỹalauat na' ñaq nca'leetauec.

₃₁Ca co'na' ime dajo, ca' anac so lqaỹaripi so Sansón chaqai sá'ogue so lauo' laseripi, ca' qaiconeu'a so loshicmaxa so'maxare, ca' qaishinñi quena lavinñi yi Zora chaqai yi Estaol, cañi lahi' so Manoa só'maq leta'a. Ca' ỹovi' veinte saua ñaxari quiyim so Sansón la'gaxala' na Israel llaalqaipi.