Jueces 9

₁So Abimelec só'maq llaalec so Jerobaal taigue da Siquem, ma' ỹahotaque retaxaỹa'pegue' so lauo' laseripi só'maq lqaỹaripi aso late'e. Ca 'naaco':

₂—Ma' chaqai qamiri iuo' laseripi, ca' nagui ñi'xoresentouguilo qamiri quiyim qamiri 'ñiỹapega ná'maq na'ñi na Siquem quiyim paguec quet la'maxa quiyim 'oonoqui' quet ca ỹale lashi quet na qomyipi, qam mesqai ná'ogue na setenta llaalqaipi so Jerobaal.

₃Ca ma' so Abimelec chi lauo' le'ec so qomyipi, ca huaqaguit, ca sá'ogue taigue da Siquem quiyim qoyiguegue so'maxare. ₄Chaqai qai'neeta qaicona qai'xat aso setenta lam plata añi nemaqajnataxanaxaqui quena' qanqouagaxainot so nashiilec nqolac leenaxat Baal-berit, ca' qoỹaanem so Abimelec. Ca' chaqaso asojo nam rishiuetenaxana quiyim ishiueten so lauataxanaxaiquipi. Ca liỹaatac so'maxare. Ca' sojo ỹalliripi quegue so'maxare, ₅ca qoyicpegue' yi Ofra, yí'maq na'ño' na'le so leta'a so Jerobaal. Ca' huaalec nqohin so 'oonoqui' qa' quiyim qaỹalauat so setenta lqaỹaripi so Abimelec. Qam 'oonoqui'o' so nqañoxojñi, ca' nca'leuec, so'maxare leenaxat Jotam só'maq na'aasa llaalec so Jerobaal. ₆Ca co'na' ime, ca sá'ogue so na'ñi yi Siquem chaqai so na'ñi yi Bet-milo lapoi'ot aso qo'paq leenaxat encina, huaqate'e' so qa' quiyí'maq qouagaxainqa' quiyi Siquem. Ca' qoỹano quiyim nashi so Abimelec.

₇Ca' so Jotam co'na' ỹa'den dajo, ca quishi'megue aso qa' ladocai, leenaxat Gerizim. Ca co'na' ỹovijshiguim, ca' retaqa, nelamaxaren, qaiyi sá'ogue qara'qaatapega, 'naaco':

—¡Ỹaatqajam 'xaichigui nagui aỹim qamiri ỹalliripi ñiỹa'ñi na Siquem! ¡Ca' ñi qota'olec qai'neeta na'xaỹaxanalo qamiri!

₈'Uo' so na'xa'a quiyim ana qo'paq ỹahotaque quiyim 'ue ca lashi, ca' qaỹahotaque quiyim nashi ana qo'paq leenaxat olivo. ₉Qam ana olivo 'naaco' 'e', ma' no'm aso'maxare nashi cana qo'paq, ca' ỹaxanñi quiyim chicqaugui na aceite ná'maq 'em quiyim qaimaqachin ca qom chaqai ñi qota'olec.

₁₀Ca' ana qo'paq rashiilaxan quiyim lashi ana 'igo lashi. ₁₁Qam ana 'igo lashi 'naaco' 'e', ma' no'm nashi cana qo'paq, ca' ỹaxanñi quiyim 'ue ana la ỹaatqajam qaica 'nejem da lo'daxa.

₁₂Ca' ana qo'paq rashiilaxan quiyim lashi ana 'uva lashi. ₁₃Qam aso 'uva lashi 'naaco' 'e', ma' no'm nashi cana qo'paq, ca' ỹaxanñi quiyim 'ue ana la chicqaugui na lataxa, ná'maq ishit quiyim ỹa'ue quiyim netoon ca qom chaqai ñi qota'olec.

₁₄Ca co'na'le, ca' ana qo'paq ỹashiila ana ta'sot quiyim lashi. ₁₅Qam aso ta'sot 'naaco' no'm ỹaatqajam llic qaỹahotaque quiyim nashi, ca' 'maxaraic quiyim qai'guenot na la'al; qam no'm sqai quelec neuel quiyim nashi aso'maxare, ca ishit chicqaugui ma'le ca norec, ca ná'ogue ỹavigaxat ana qo'paq leenaxat cedro na'ñi yi Líbano.

₁₆Ca' nagui senate' qamiri: ¿Peeta'a ỹaatqajam llicyaxac chaqai ỹa'maqachiguiñi dá'maq 'viichii quiyim ỹañiuo quiyim rashii ñi Abimelec? ¿Peeta'a denaxachichigui da 'neeta na'le so Jerobaal chaqai na llaalqaipi quiyim ỹaatqajam ỹahoteguelo qamiri? ₁₇Ma' so ita'a ỹaatqajam ỹaañiguit da lichic da nachaalataxac na'le na' nalauat, ma' ỹahotaque nca'laxaterec qamiri queso Madián llaalqaipi. ₁₈Ca' nagui ỹaatqajam npa'guiñi'e' na llaalqaipi so ita'a chaqai nalauachiñi so setenta llaalqaipi huaalec nqai'ñii ada 'oono'lli' qa'. Qam 'ec saqa' nalogoñi nqai'ñii, ca' ỹañiuo quiyim rashii ñi Abimelec ñí'maq llaalec aso chi loua liỹa so Jerobaal, ma' chi qauori le'ec ñi'maxare. ₁₉Qam ỹim nagui shinapegalo qamiri: Qam ỹaatqajam llicyaxaco' chaqai ỹa'maqachiguiño' dá'maq 'ñii'tegue queso Jerobaal chaqai quena llaalqaipi, ca 'maxaraic ca qayicyaxaguii queda Abimelec chaqai da'maxare caqamiri. ₂₀Qam no'm sqai 'neeta dajo, ca ¡dá'maq Abimelec chicqochigui ma'le ca norec, ca ỹavigaxat ma'le ná'ogue na neeta'ñi yi Siquem chaqai yi Bet-milo, chaqai quiyaua'maxare qai'neeta chicqotouguilo ca norec, ca ỹavigaxat da Abimelec!

₂₁Ca co'na' ime dajo, ca' so Jotam 'eet, quepegue' yi Beer, ca na'ñi. Ma' ỹaatqajam no'cha'a so lqaỹa Abimelec.