(15.1-9 Qaỹa'xateta'guit da nouaxanaxaset yi Israel.)
Chalego da le'laxa so qota'olec letaxaỹaxaqui
10¡Qami' ỹacho'ole, 'xoraicolec aỹim! ¿Chi'neco' ma' ne'qaañi nqai'ñi' aỹim?
Qaỹimetam sco'ueeta'guit chaqai ñco'uaata'pegue' ná'ogue na qomyipi quena 'laua.
Qaica ca sa'ualaxanaxan cana ỹam chaqai qaica ca ya'ualaxanaxan,
qam qaiyiita ná'ogue ỹa'xatetac na se no'uen caỹim.
11Ca' na la'qaatqaipi se no'uen imigui caỹim, qami' ỹa'gaxala',
no'm se yaqamaq quedá'maq yilachirelec,
no'm se sashiilatac aqami', sashiilaxanteguelec na ñpa'guenaxauaripi,
na' 'ue da lasauaxac chaqai da lachitachic.
(15.12-14 Qaỹa'xateta'guit da nouaxanaxaset yi Israel.)
So netaxaỹaxaqui ỹashiila ñi qara'gaxala' qota'olec
15Qami' qara'gaxala', qami' 'yiiñi' ná'ogue,
¡o'lliinchira'a aỹim, ca' yotauañi'!
¡Vite ca ỹovi' quená'maq yocantegueñi!
Totaxan queeta nqai'ñi' na'maxare, ca 'xañitegue quiyim yileu;
'anta qami' ná'maq 'em ña'ñaxateta'piguit da ñovirqataxac.
16Quena' taqaita aỹim, ca' ña'xaỹaxane'ta dá'maq ra'qaachiqui';
chaqaida dá'maq la'maxa iuel chaqai netoonaxac añi i'taxanata,
ma' ỹim ralamaxarichi',
qami' ỹa'gaxala' chaqai qota'olec qaica ca lqalanec.
17Vire'ta se llapooguit ná'maq chi ỹahotaque reualaxaitac;
shi'gue na' qami' yatoiquiñi'sac,
ca chaqa'ma' yodaatapeguec,
ma' no'xa nqai'ñi' aỹim queda ronogoxonaxaqui'.
18¿Chi'negue ma' na nqui'ic se neme caỹim?
¿Chi'negue ma' na icoñiraxa qaican nataren,
se nqo'chiguit ná'ogue na natarenaxanaxat?
Qami' 'ñiisari' caỹim ca huaxaỹaq choxonataxanaxai
'ec quena' 'ue na qachilli'.
Da la'qaatec na' retaqa ñi qara'gaxala'
19Ca na'le, ca' ñi qara'gaxala' 'naac caỹim:
No'm rapillita aỹim, ca' ỹim lotqai liỹa secoñiraxaguit,
ca lotqai ishit liỹa 'ueenataxañitot aỹim.
No'm totqai qui'salec da chi retaxaỹaxaqui'
chaqai quiyim qainaata ná'maq no'uen 'xachi'sac,
ca qami' ná'maq 'xachi' naua ỹa'qaatqa ma'le.
Ca' ná'maq qomyipi ná'maq huaguiguit quet qami',
qam sqai qami' ná'maq huaquichiguit na qomyipi.
20Ỹim so'uet ma'le quiyim quenajo qomyipi
'ñiisari' ca nquepaqataxanaxat bronce qaican que'guenalec.
Qoyiga'a qami' quiyim qanalauate'e',
qam se qarishichi',
ma' ỹim sento'ot aqami' quiyim ñca'laxachirec chaqai so'ootaxanlec qami'.
Ỹim ná'maq ỹim na'gaxala', saanec dajo ỹa'qaatec.
21So'ootaxanlec qami' queda lquesaxanaxa na hualoxonyipi,
ñca'laxachirec ma'le queda lquesaxanaxa ná'maq se ra'maqataxan.
(16.1—17.13 Mashic nepalata da nouaxanaxaset yi Israel. Dá'maq chi nqouagaxainaxac so Jeremías.)
