Jeremías 19

₁Ñi qara'gaxala' qota'olec 'naac caỹim: Mo'e', shiujnaxañiraque aca nehoma 'laua, ca' vite caua ỹaxañitalo qo'xoiqa quena na'a' lodegaxat chaqai caua ñaaua'pe netaxaỹaxanqajanqa. ₂Ime, ca' quirepegue' yi ca'megue leenaxat Ben-hinom, naloote'oga ñi lasom qaỹamata'gue loma' ana no'xona lahillipi. Ca 'xachi' ma'le dá'maq ỹa'qaatec shiñirapegaxaua'. ₃Ca 'ñirac ma'le: Qamiri nashillipi quena 'laua Judá chaqai na na'ñi na Jerusalén, na'xaỹaxañiỹa da la'qaatec ñi qara'gaxala' qaica lqalanec, ñí'maq qota'olec queso Israel: Chalego lecaic ca ne'xoric taalec nqaishin najo 'laua, ca ná'ogue ná'maq 'ue ca la'xaỹaxac 'ec ratohichiguilo naua lque'laa lauaco. ₄Ma' na llaalqaipi so Israel ca'e aỹim, ca' ñigui quiyim 'ec ỹoqa'a najo 'laua; quenajo, ca ỹo'uet ca lichiinaxanaxat quena ỹoqa'a 'naac qota'olqaipi, qam se iuanapega, vire'ta so 'auaxaic leta'allipi chaqai na nashillipi quena Judá, ca no'xataxajlec quena leuoripi na qomyipi qaica ca lasauaxaset. ₅Chaqai qai'neeta no'xonshiguim ana lcopatoxonaxalate, ca' copata'a na llaalec, ca' ỹaanot ñi lashiilec Baal, ca da'maxare sqai selarelec, chaqai sqai shinapega, chaqai qa'uequeto' hueetapigui iuel dajo. ₆Vichiguiño' ỹovita ma'le ca na'xa'a quiyim najo tot qohinac Tofet loqo'm nca'megue so Ben-hinom, ta'ta'a quiyim ca'megue nalauataxanqa'. Ỹim na'gaxala' se'taxajñi dajo ỹa'qaatec. ₇Quenajo hua'ñi ma'le, ca seuagaxatac na na'deenaxaquipi na Judá chaqai na Jerusalén. So'uet quiyim na npa'guenaxauaripi lauataxanaxaiquipi loxonec chaqai qanalauajñi, chaqai na la'at qaỹa'ic quena ỹoripi chaqai na iseripi. ₈Najo na'a' lodegaxat ñigui nqaishin ca 'laua qaica qom, ca' 'ue ma'le ca nqolonaxa ná'ogue ná'maq que'tegue yi'maxare. 'Ue ma'le da lqolonaxa chaqai da le'laxa, ma' iuana quiyim yá'ogue ropoqotam. ₉So'uet ma'le quiyim na qomyipi ỹa'ic ná'maq chaqai llaalqaipi chaqai na llaallipi, chaqai chi na'gata' ma'le, sauaxat dá'maq qohinta'gue ma'le quena npa'guenaxauaripi lauataxanaxaiquipi quecaua'que caua na'xata' quiyim qanahiquinchiguiñi yi na'a' lodegaxat.

₁₀Ca ma' ime 'xachi' dajo, ca' poxoỹaxachirigui ma'le ana nehoma ma' ñaq reloqotaho ca qomyipi riỹa'isac. ₁₁Ca 'ñirac ma'le: Ñi qara'gaxala' ñí'maq sqaica lqalanec 'naac: Ỹim lahiletajlec nqaishin ma'le najo qomyipi chaqai najo na'a' lodegaxat, 'ec nqaishin quiyim qaỹopoxoỹaxachigui aca nehoma 'laua, ca tot qaishit qaỹa'maxajñi. Na qomyipi chi ishinñi ma'le na leuaxaiquipi quiyi Tofet, ma' tot qaica ca loma' quiyim qaishinñi. ₁₂Ca' chaqaida shine'tegue ma'le quena na'a' lodegaxat chaqai ná'maq qomyipi neetaugui na'maxare. Shine'tegue dá'maq 'neeta na'le queso Tofet. Ỹim na'gaxala', se'taxajñi da ỹa'qaatec. ₁₃Na 'imqaipi quena Jerusalén chaqai na lauo' lodegaxat na lashillipi yi Judá yí'maq hua'ñi quena' qaỹo'uet na nichiinaxanaxat, qoỹaanot na neeto'ot na piguim chaqai ỹocoraxatetac na lachitaxanataxanaxat lataxa quena liỹa 'neetapega qota'olec, ca' ná'ogue qohinta'gue ca napio'o, 'nejem yi Tofet.

₁₄Ca na' ime dajo, ca' so Jeremías pil ca'e yi Tofet yí'maq hua'ño' na' qaila' quiñi qara'gaxala' quiyim ỹa'xat da la'qaatec. Ca na'le, ca' nachajñi quiyi nasoxoc ñi no'ueenaxanaxaqui quiyi Jerusalén, ca 'naac quesá'ogue so qomyipi: ₁₅Ñi qara'gaxala' qaica lqalanec, ñi qota'olec queso Israel 'naac: Ná'ogue ná'maq sa'xateta'guit nouaxanaxaset na'le, ná'ogue ñilata ma'le najo na'a' lodegaxat, chaqai ná'ogue na sqoỹoqaque qomyipi quena la'a', ma' na'maxare ỹaatqajam ỹoqa'a dá'maq 'neetari' se na'xaỹaxanalo naua ỹa'qaatqa.