Jeremías 25

₁₅Ñi qara'gaxala' ñí'maq qota'olec queso Israel 'naac caỹim: 'Ajñi' añi 'taxaqui no'qajlec quena lataxa queda ỹonogoxonaxac. Coñita, ca' ni'chigui nqai'ñi' ná'ogue na qomyipi ná'maq selata qami'. ₁₆Ca ma' ni'chigui, ca chaqa'ma' nesal ma'le, ca 'ec hualoxonyipi, sauaxat na lauataq selata na'maxare.

₁₇Secoñiguit aso 'taxaqui cada napoquena ñi qara'gaxala', ca ñi'taxañigui ná'ogue ná'maq ỹoreta'oguit qomyipi yilata ñi qara'gaxala'. ₁₈Ni'chigui nqaishin yi Jerusalén chaqai naua na'aate' leta'al quiyi 'laua Judá, chaqai na lashillipi chaqai na la'gaxalateripi, ma' sahotaque ñopoxoỹaxajñi, na'laañi nqaishin, ca ñiichigui ca nqolonaxa chaqai qoteetapeguem, ca qaraloqojnaxañigui quiyim 'ue ca qaishiuen, vire'ta nagui ñaqai queeta dajo. ₁₉Vire'ta ñi'taxañigui ñi Faraón, nashi quiyi Egipto, chaqai na lotauaripi, na na'gaxalateripi, chaqai yá'ogue yí'maq chi lauo' laseripi, ₂₀chaqai na ỹoreta'oguit qomyipi neeta'ñi yi'maxare; chaqai ná'ogue na nashillipi quiyi 'laua Uz; chaqai na lashillipi na filisteoipi quiyi Ascalón, Gaza, Ecrón chaqai na no'ueenauec quiyi Asdod; ₂₁chaqai yi 'laua Edom, Moab chaqai yi Amón; ₂₂chaqai ná'ogue na nashillipi quiyi Tiro chaqai yi Sidón; chaqai ná'ogue na nashillipi cana delec hueetañigui ana huaaxai leenaxat huaaxai hueetegueñiguilo naua 'lauari; ₂₃chaqai so ni'ic lauo' so Dedán, Tema chaqai so Buz, chaqai so qomyipi ỹoselaxate' naua lqahic lahil; ₂₄chaqai ná'ogue na nashillipi quiyi Arabia; chaqai ná'ogue na lashillipi na ỹoreta'oguit qomyipi neetalec yi 'laua 'xoic na nashiviaxa; ₂₅chaqai ná'ogue na nashillipi quiyi Zimri, Elam chaqai yi Media: ₂₆chaqai ná'ogue na nashillipi queda rapiguim sqoỹoqaque loqo'm qoỹoqo'ta queca liỹa. Ñi'taxan ná'ogue na nashillipi quena 'laua. Ca' co'uaataxanta ne'et ma'le ñi nashi quiyi Babilonia.

₂₇Ca na' ime, ca' ñi qara'gaxala' 'naac caỹim: 'Ñirac quiyim ỹim na'gaxala' sqaica lqalanec, ỹim qota'olec queso Israel, shinapega quiyim ne'et, chi ỹovireto'o' ma' ỹaatqajam quiñiuguet chaqai nesal chaqai huaañi quena 'laua, ca' tot ne'laxashiguim, sauaxat na lauataq selata ma'le. ₂₈Ca no'm se icoñiguit caqami' quiyim ni'chigui ana 'taxaqui, ca 'ñirapega: Ñi qara'gaxala' qaica lqalanec 'naac: Coñichiguit loqo'm sqai coñichiguit, qam qaiyiita ni'chirigui ma'le. ₂₉Ma' nagui, ca' ñila' da nouaxanaxaset ná'maq na'a' lodegaxat soỹootec sauaaque ỹalamaxaret. Ca' ¿'ñiitapego' quiyim qaica nouaxanaxashichii? Qam qaica ma' qaica quet ca nouaxanaxashichii, ma' ñilata ma'le ca lauataq ná'ogue na qomyipi quena 'laua. Ỹim na'gaxala' qaica lqalanec, se'taxajñi da ỹa'qaatec.