Aso lelaata so Jeremías queso ỹoqa'a ca 'laua neeta'gue
1-2Na' ime quiyim so nashi Jeconías qai'xategue ca ỹoqa'a 'laua, liỹaatac aso late'e chaqai so la'aquipi quiñi lauo' lodegaxat, chaqai so na'gaxalateripi quiyi Judá chaqai yi Jerusalén, so no'xonaxanyipi chaqai na ỹo'ueetac ana la'gaxasete na lasom, ca' so netaxaỹaxaqui Jeremías chicqochi'ñi yi Jerusalén aso lelaata, taỹa'a so qo'xoiquipi hueeta'gue da ỹoqa'a 'laua chaqai so netaxaỹaxanqajanqaipi, so netaxaỹaxaquiripi chaqai so qomyipi i'xat na'le so Nabucodonosor quiyi Jerusalén, i'xategue da Babilonia. 3Sojo nelaata qailategue so llaalec so Safán, leenaxat Elasa, chaqai so llaalec so Hilcías, leenaxat Gemarías, sauá'maq so Sedequías, nashi quiyi Judá, ilategue da Babilonia quiyim quepegue' so nashi Nabucodonosor. Aso nelaata 'naacsa':
4Ñi qara'gaxala' sqaica ca lqalanec, ñí'maq qota'olec queso Israel, quená'ogue na qai'xat na'le quiyi Jerusalén, qai'xategue da Babilonia, 'neetasa' da la'qaatec: 5No'xoñiishiguim ca qauori chaqai na'maxachiiñi; ñiiñi ana qo'paq, ca' a'guii ana la. 6O'ñiiỹata', 'viichii ca qachaalguii chaqai aca qachaallii chaqai ca'maxare qai'neeta 'on, ca' 'ue ca llaalec. Nqo'naxachiuec ca no'ueenataxaguii, totaxan nqo'naxachiỹata'. 7'Ueenataxañii qaiyi nqo'neuec cá'maq na'a' lodegaxat cá'maq selateguelo qamiri, chaqai yashiilahi nqouagaxaiñilec ca'maxare, ma' no'm ỹa'maqachiguiñi ca'maxare, ca' qai'neeta qamiri ra'maxaichiguiñi. 8Ỹim na'gaxala' sqaica lqalanec, ỹim qota'olec queso Israel, saqatalo qamiri quedajo: Totaxan 'xañiigue quiyim rayiñitac na netaxaỹaxaquiripi chaqai na idaanau'a nanchaqaina quená'maq ỹalequetauguilo qamiri; totaxan na'xaỹaxañiỹa quena' ỹa'xat na le'guemataxac. 9Ná'maq ỹa'xatetac na'maxare caỹim la'maachic, ma' ỹim se sela'. Ỹim na'gaxala', se'taxajñi da ỹa'qaatec.
10Ñi qara'gaxala' 'naac: Ma' ỹovite' caua setenta ñaxari quena Babilonia, ca' so'ueenataxan sqoshiilgoto qamiri, ca sepacqajanchigui ma'le da ỹa'qaatec quiyim yapilaxate' qamiri quenajo. 11Ỹim sa'den cá'maq shinta'gue ma'le caqamiri quiyim ra'maxaiñi, mese sqa'viỹa'guelo qamiri, quiyim sa'ue cá'maq ỹaatqajam lodegaxat naquitaxaguii ma'le. Ỹim na'gaxala', se'taxajñi da ỹa'qaatec. 12Ca ma'le, ca' qamiri ỹaxañiỹot aỹim, ca nqouagaxaiñiỹot aỹim ma'le, ca' ỹim ña'xaỹaxanalo qamiri. 13Ca ma' daañiỹaque aỹim, chaqa'ma' nachiua', ma' ỹaatqajam machiỹauec añi re'taxanatahi quiyim daañiỹaque aỹim. 14Ajá'a, ỹim saxanegue quiyim qamiri nachiua' ma'le, ca' so'uet quiyim nadalaxachii: ñaqata'alo qamiri ma'le quená'ogue na ỹoreta'oguit qomyipi quenaua'que naua na'aate' selariigue neuagaxachitajlec. Ca' llapoonta' chaqai so'uet quiyim rapillii quenajo ná'maq hua'ñi na' qai'xate' qamiri. Ỹim na'gaxala', se'taxajñi da ỹa'qaatec.
15Qamiri 'ñiỹac: Ñi qara'gaxala' ỹo'uet so letaxaỹaxaqui coqomi' quena Babilonia.
(29.16-20 Da la'qaatec ñi qota'olec quesó'maq se qai'xategue da ỹoqa'a 'laua.)
21Ñi qara'gaxala' sqaica lqalanec, ñí'maq qota'olec queso Israel, 'naac quiñi Acab ñí'maq llaalec ñi Colaías, chaqai quiñi Sedequías ñí'maq llaalec ñi Maasías, yaua'maxare ỹa'xatesac na sqai llic ỹiqueseguelec ñi qara'gaxala', 'neetasa' da la'qaatec: Ỹim so'uet ma'le quiyim loxonqa ñi nashi Nabucodonosor quiyi Babilonia, ca' qamiri huañichigui ma' ñi'maxare ỹalauate'. 22Qaiyi ma' ná'maq qanauega najo quiyi Judá ná'maq neeta'ñi na Babilonia, no'm 'ue ca inaxalec ca la'qaatec se no'uen, ca' 'naac: Ñi qara'gaxala' 'ne'tegue caqami' dá'maq 'ne'tegue na'le queso Sedequías chaqai queso Acab, sauá'maq ñi nashi quiyi Babilonia ỹalateraq na'le queso norec. 23Dajo 'ue na'le quesaua'maxare sauaxat se no'uen da ỹo'ueetesac quena Israel: hueesa'piguit ana loua na lauo' le'ec chaqai 'ue da ỹa'xatesac sqai llic quiyim se selarelec. Ỹim sa'den chaqai ỹaatqajam seuanchigui. Ỹim na'gaxala', se'taxajñi da ỹa'qaatec.
Da na'qaatec taỹa'a so Semaías
24Ñi qara'gaxala' 'naapega so Jeremías quiyim 'naapega so Semaías na'ñi yi Nehelam: 25Ñi qara'gaxala' sqaica lqalanec, ñí'maq qota'olec queso Israel, 'naacsa': Qami' chaqai 'viiquiñi'sac, vite aso relaata'e', lachita yá'ogue yi qomyipi quiyi Jerusalén chaqai ñi netaxaỹaxanqajnec Sofonías, llaalec so Maasías, chaqai yá'ogue yi liỹa netaxaỹaxanqajanqaipi. Caso relaata'e' 'ñirac quiñi Sofonías: 26Ñi qara'gaxala' 'naac quiyim qami' netaxaỹaxanqajnec, vira'ñi yi loma' so Joiada, quiyim qami' ra'ireguelec ná'ogue quena no'ueenaxanaxaqui quena Jerusalén. No'm 'ue ca hualoxonaq, ca' retaqa, 'naac quiyim netaxaỹaxaqui, ca' qami' vite ca 'gaxanaxañiriguilo naua lichil chaqai coñichi'. 27¿Chi'neco' ma' sqai taqaira'a so Jeremías só'maq na'ñi yi Anatot, na' so'maxare retaqa caqamiri 'ec ca netaxaỹaxaqui? 28Vire'ta ỹo'uet aso lelaata coqomi' queda Babilonia, ca caso'maxare 'naac: Quiyim qaua' qaỹosouec yi qomyipi, no'xoñiishiguim ca qauori, na'maxachiiñi, ñiiñi ana qo'paq, ca' a'guii ana la.
29So netaxaỹaxanqajnec Sofonías retaqalec aso nelaata qaiyi 'qaatac so Jeremías. 30Co'na'le, ca' ñi qara'gaxala' 'naapega so letaxaỹaxaqui, ca 'naac: 31Lachita ca ra'qaachiqui' yá'ogue yi ncoñiitecseripi quiyim ỹim na'gaxala' shinapega: Mashic ñi Semaías na'gue da Nehelam ỹa'ue da la'qaatec, quiichigui nqai'en da ỹeenaxat, quiyim ỹim se sela', ca' ỹa'ue caqamiri da naquitaxaguii qaica ca 'negue, 32vichiguiño' ỹim na'gaxala' shinac: Souaxan ma'le ñi Semaías chaqai na llaalqaipi. Ca' qaica ma'le ca llaalec ỹalequetaugui na ỹalamaxareteripi, chaqai se ỹalega'a da na'maxa saanem ma'le na ỹalamaxareteripi, ma' quenaua la'qaatqa ỹo'uet quiyim npa'guiñi'e' aỹim. Ỹim na'gaxala' se'taxajñi da ỹa'qaatec.
(30.1—31.1 Ñi qara'gaxala' ỹa'xateta'guit da lca'laqataxanaxa ma'le chaqai dá'maq noyac ma'le quiyi qomyipi.)
