Jeremías 38

₁Ca' so Sefatías só'maq llaalec so Matán, Gedalías, llaalec so Pasur, Jucal, llaalec so Selemías chaqai so Pasur, llaalec so Malquías, 'qaasapega so Jeremías na' retaqatapougui so qomyipi, 'naacsa':

₂—Ñi qara'gaxala' 'naac: Cá'maq no'ueenañi quena na'a' lodegaxat, ca' ileu ma'le queca lauataq loqo'm quena lqopaaxa loqo'm quena ne'ne'. Qam cá'maq nañaañiguit ma'le ca caldeoipi, ca' nca'leuec. ₃Ñi qara'gaxala' 'naac: Najo na'a' lodegaxat noxonec ma'le quena nalliripi ñi nashi quiyi Babilonia. Ñi'maxare ỹoiquentac ma'le, ca' qaica ca ishit quepaxat.

₄Co'na'le, ca' so na'gaxalateripi 'nerapega so nashi:

—'Maxaraic qaỹalauat ñijo ỹale, ma' naua la'qaatqa neualñi nqai'en na qanalliripi ná'maq ñaqai hueeta'ñi najo na'a' lodegaxat chaqai ná'ogue na qomyipi. Ñi ỹale se idaantaque ca lo'yaxanec quena qomyipi, ta'ta'a dá'maq se no'uen.

₅Ca' so nashi Sedequías 'naaco':

—Hua', ỹa'maqachiguiñi 'viiquiñitac quecá'maq sham 'ñiita'gue. Ỹim qaica quet cá'maq shinac caqamiri.

₆Ca co'na'le, ca' saua'maxare iconerelec so Jeremías, ca inaxari'ñigui aca li'ỹa so nashi llaalec Malquías, na'ñi yi nasoxoc yi neloxoỹaripi loma'. Qaỹahote'e so ñic na' qainaxañi. Qam ma' co'chiichigui aso ni'ỹa, ta'ta'a na nishaaxa, ca na' taañi so Jeremías, ca rollapi'tegue quiyi nishaaxa.

₇Ca' 'ue so Etiopía le'ec, leenaxat Ebed-melec, so'maxare ỹaatqajam npe'eet quesá'ogue so nashillipi. 'Uo' so la'xaỹaxac quiyim so Jeremías qainaxa'ñigui aso ni'ỹa. Queso na'xa'a so nashi ỹalequetau'a so netaxaỹaxac quiñi lasom qaỹamata'gue Benjamín. ₈Co'na'le, ca' so Ebed-melec inoxonec quiñi 'imec lodegaxat, ca quepegue', ca retaxaỹa'pegue' so nashi, 'naaco':

₉—Qami' ỹashi, 'anta dá'maq 'neetetegue sauajo ỹale' queso Jeremías se ỹa'maxañi. Ma' inaxari'ñigui añi ni'ỹa, ca' yí, hueeta'ñigui ileuetac quena lqopaaxa, ma' qaica ca pan quenajo na'a' lodegaxat.

₁₀Ca' so nashi chaqa'ma' ỹilen so Ebed-melec quiyim ỹa'ue ca nauegaxauaripi treinta ỹalliripi quiyim qanaqajshiguim so Jeremías, ma' saqa' ileu. ₁₁Ca' so Ebed-melec ỹauec so ỹalliripi, ca' quepegue' ñi nooỹac lahi' quiñi 'imec lodegaxat. Ca' iconalo saua noho leteraxaqa, ca' que'eendo queso ñic, ca ilari'ñalo so Jeremías cañi ni'ỹa. ₁₂Ca' 'naapega:

—Lli'ro'oto naua rishaaqatquichi', qaiyi se rcoñirqachichi' na ñic.

Ca' so Jeremías chaqaida 'ne'tegue. ₁₃Co'na'le, ca' saua ỹale' naviquishiguim so ñic, ca naqachishiguim so Jeremías cañi ni'ỹa. Ca na' ime dajo, ca' so Jeremías hueeta'ñi yi nasoxoc añi loma' na neloxoỹaripi.

₁₄So nashi Sedequías relaataxane'oga quiyim qaỹauego so Jeremías quiñaua tres lasomi' ñi 'imec lodegaxat no'ueenaxanaxaqui. Ca' quiyi, ca' so nashi 'naac queso'maxare, 'naaco':

—Sa'ue da inataxanaxac caqami', qam sahotaque quiyim qamaxachite' ca lopilaxaset nqai'ñi'.

₁₅Ca' so Jeremías 'naaco':

—No'm sa'ue ca lopilaxaset ca renataxanaxaqui', ca' qami' ỹashi laataxañirelec aỹim quiyim qayalauat; chaqai no'm sa'ue ca ỹaqataxac, ca' se na'xaỹaxañiriua'.

₁₆Qam so nashi Sedequías nemoote'tot so Jeremías quiyim ỹaanec da la'qaatec nallitalta', 'naaco':

—Saanec da ỹa'qaatec quiñi qara'gaxala' ñí'maq ỹa'ue da qarca'laxa, quiyim sqai salaxanegue qami' quiyim qaralauachi' chaqai sqai saanec aqami' quená'maq ỹahotaque ralauachi'.

₁₇Ca' so Jeremías 'naaco' na'le queso Sedequías:

—Ñi qara'gaxala' qaica lqalanec, ñí'maq qota'olec queso Israel, 'naac: No'm nañaañi' quena lashillipi na nalliripi ñi nashi quiyi Babilonia, qami' chaqai na qachaalaxai'ipi, ca' rca'llirec, ca' najo na'a' lodegaxat se qaicopata'a. ₁₈Qam no'm se nañaañi', ca' na caldeoipi ỹoiquentac ma'le najo na'a' lodegaxat, ca' copata'a ma'le, ca' qami' qaica ca nañitqachi'.

₁₉Ca' so Sedequías 'naaco':

—'Ue na iqolonaxa queso judioipi taugui na caldeoipi; no'm yaqajñi, ca' qa'viỹahic.

₂₀Ca' so Jeremías 'naaco':

—Qam qami' ỹashi se qaraqachiriñi ma'le. Na'xaỹaxañi' qouaquiric, qami' ỹashi, queda la'qaatec ñi qara'gaxala' dá'maq sa'xatem qami', ca' qaicanqaida caqami' ma'le chaqai rca'llirec. ₂₁Ñi qara'gaxala' ya'deenaxanaxanegue dá'maq 'neeta ma'le, no'm qami' ỹashi qui'salec quiyim se nañaañi': ₂₂Ca yá'ogue yi 'aallipi hueetaugui ñi 'imec lodegaxat lauo' so nashi quiyi Judá, ca qanaqata'a ma'le, ca' qoỹaanougui ma'le so lashillipi so nalliripi ñi nashi quiyi Babilonia. Ca' chaqaiyi yi 'aallipi 'naac ma'le:

₂₃Ca' so Jeremías ñaqai queetalec dá'maq ỹa'xatetac queso nashi:

—Ná'ogue na 'aallipi chaqai na qachaalaxai'ipi qami' ỹashi qoỹaanougui ma'le na caldeoipi, chaqai qami' ỹashi se qarayichi' quena'maxare, ta'ta'a quiyim qoỹaanot qami' ma'le ñi nashi quiyi Babilonia. Ca' najo na'a' lodegaxat qaicopata'a ma'le.

₂₄Co'na'le, ca' so Sedequías 'naaco' queso Jeremías:

—No'm rauochitegue da nachaalataxaqui', ca' sqaico' 'xachitem dajo. ₂₅Ma' no'm na ỹotauaripi ỹa'den quiyim setaqata'pegue' qami', ca nanacpegue' qami' ma'le, ca' renachi' negue' cá'maq 'ñirac caỹim, chaqai negue' cá'maq shinac caqami'. Ca' ỹaanec da la'qaatec nallitalta' quiyim qaica ca 'ne'tegue qami', ca' rashiila'e' quiyim 'xachi' dá'ogue. ₂₆Qam qami' 'ñiraco' quiyim chi yashiila'isac tot selachira'a yi la'a' so Jonatán quiyim rillivira'ñi.

₂₇Ca' ỹaatqajam chaqaida 'neeto' na'le so lotauaripi so nashi quepegue' so Jeremías, ca' inatetac, qam so'maxare 'naaco' dá'maq qohinapego' na'le queso nashi. Co'na'le, ca' qoỹaxantac, ma' qaica ca 'qaachigui so letaxaỹaxague'. ₂₈Ca' so Jeremías chaqai neeta'ñi yi nasoxoc yi la'a' so neloxoỹaripi, chi ỹovireta'a so na'xa'a na' noxonec yi Jerusalén.