Jeremías 42

₁Sá'ogue so lashillipi so nouaataxanaq chaqai ỹalequeto so Johanán, llaalec so Carea, chaqai so Azarías, llaalec so Osaías, chaqai sá'ogue so qomyipi, noctoqui' chaqai qo'xoic, nqo'neu'a ₂so Jeremías, ca' qohinapego':

—'Ue da sashiilaxanqaque caqami'; 'neeto' se na'xaỹaxañi': Nqouagaxaiñitot ñi ra'gaxalachi' ñí'maq qota'olec caqami' coqomi' sqo vito'olqai' qaro'ueenañi. Quesom qomi' 'xoic, qam nagui ñaqai 'ajñi' qomi' sqo vito'olqai'. ₃Nqouagaxaiñitot ñi ra'gaxalachi' ñí'maq qota'olec caqami' quiyim qarachaxañi'ñigui cá'maq nayic qolaxa'ñigui chaqai negue' cá'maq so'ueetaq.

₄Ca' so Jeremías 'naaco':

—Ajá'a ỹa'maqachiguiñi, sashiilo' ñi qara'gaxala' ñí'maq qota'olec caqamiri, ma' chaqaida dá'maq shiilaxañitaque, ca' sa'xatema qamiri ma'le cá'ogue cá'maq 'naapiguiỹa', qaica ca soxojñi.

₅Ca co'na'le, ca saua'maxare 'neraco' queso Jeremías:

—Ñi ra'gaxalachi' ñí'maq qota'olec caqami', chaqaiñi ñí'maq ỹaatqajam ỹauanchiguilo qomi' nagui, no'm se so'ueetaq cá'maq 'naac ñi'maxare nagui caqami'. ₆Sa'maxarenqata loqo'm se sa'maxarenaq cá'maq 'ñirac, qam qomi' ña'xaỹaxanaxa cá'maq 'naac ñi qara'gaxala', ñí'maq qota'olec coqomi', ñí'maq qomi' shinqac quiyim shiila'e', qaiyi no'uen ca qoyicyaxac.

₇Ca co'na' mashic diez na'xata' saua ỹoxe'ueque, ca' ñi qara'gaxala' 'ue da ỹa'xat queso Jeremías, ₈ca so'maxare roỹaxana so Johanán, só'maq llaalec so Carea, chaqai so nouaataxanaq lashillipi liỹaatac chaqai sá'ogue so qomyipi, chicqochi'ñi ná'maq paguec cocho'qui', chi ỹovireta'a na paguec lodegaxat. ₉Ca 'naaco' queso qomyipi:

—Ñi qara'gaxala' ñí'maq qota'olec quena Israel, ñí'maq qamiri 'ñiỹac saanot da rashiilaxanaxaguii, 'naac: ₁₀No'm qamiri viitaque sqai dahi quenajo 'laua, ca' ỹim so'uet quiyim 'ue nqaiyi caqamiri; se ñopoxoỹaxajñi qamiri, ta'ta'a quiyim sañiñi qamiri, ca se ñapogue' qamiri, ma' 'ue da ñitogotaxa quiyim ñila' da re'xoriguii. ₁₁Totaxan ro'chiỹa ñi nashi quiyi Babilonia ñí'maq chalego da rqolonaxahi quiñi'maxare. Totaxan ro'chiỹa, ma' ỹim seuetauguilo qamiri quiyim ñca'laxachiuec, ca' se ỹovitalo qamiri da lquesaxanaxa. Ỹim na'gaxala', se'taxajñi da ỹa'qaatec. ₁₂'Ue da iqouagaxa ma'le caqamiri, chaqai so'uet quiyim ñi'maxare qai'neeta nqouagueguelo qamiri, ca rapilaxate' qamiri quena na'lauahi.

₁₃Qam no'm qamiri sqai 'maxariñii ñiitalec najo 'laua, ta'ta'a quiyim se na'xaỹaxañiỹa ñi qara'gaxala' qota'olec, ₁₄ca no'm 'ñiỹac: Sahoqotaque saxague da Egipto ma' queda'maxare qaica ca lauataq chaqai se sa'xaiqaque ca lelamaxa aca npe'te lauataq lo'o chaqai se qaralauat ca qarqopaaxa, ₁₅ca na'xaỹaxañiñi qamiri ná'maq ro'viiñiỹalec na Judá dá'maq ỹa'xat nagui ñi qara'gaxala' qaica lqalanec ñí'maq qota'olec quena Israel, 'naac: No'm qamiri viitaque 'iigue da Egipto, ₁₆ca' ca lauataq chaqai ca nqopaaxa ro'chiitaque qaiyiita ỹovitalo qamiri ma'le, ca' rillivii. ₁₇Ná'ogue ná'maq ỹahotaque taigue da Egipto, ca ma' ỹovi', ca' ileu ma'le queca lauataq, da nqopaaxa chaqai da ne'ne'. Ca' qaica ca nca'leetauec; qaica ca qohit ma'le queda ne'xoric selatalo qamiri ma'le.

₁₈Ñí'maq qara'gaxala' sqaica lqalanec, ñí'maq qota'olec queso Israel, 'naac: Ca' 'nejem dá'maq ỹonogoxonaxac chaqai da iuel 'ec nachipishiguim quená'maq na'ñi na Jerusalén, ca' chaqaida 'neeta nachipishiguim caqamiri ma'le, no'm 'iigue da Egipto. Ca no'm 'ue ca se no'uen ca ỹa'xat queca liỹa, ca' raloqojnaxañiguilo qamiri, quená'maq ỹa'ue ca nqolonaxa, chaqai tot rapilliỹa najo 'laua. ₁₉Ca' qamiri ná'maq ñaq ro'viiñiỹalec na 'laua Judá, ñi qara'gaxala' ỹilene' qamiri quiyim sqai 'iigue da Egipto. Ca' 'yiiñita quiyim ỹim saqatalo qamiri nagui. ₂₀Ca' qamiri nauá'maq ỹaatqajam 'ue da ro'maxaguii lodegaxat, ma' qamiri nauá'maq 'ñiỹac quiyim sashiilaxanlgoto quiñi qara'gaxala' ñí'maq qota'olec caqamiri na' 'ñiỹac shiilaxañirelgoto qomi' quiñi qara'gaxala' ñí'maq qota'olec coqomi', ca' qara'deenaxanaxañitegue cá'ogue cá'maq 'naac ñi'maxare, ca' qomi' so'ueetaq ma'le. ₂₁Ca' ỹim sa'deenaxanaxaneguelo qamiri nagui dá'maq 'naac ñi qara'gaxala' qota'olec, qam qamiri se na'xaỹaxañii. ₂₂Ca vichiguiño' 'yiiñita qamiri nagui quiyim sauaxat ma'le ca lauataq, ca nqopaaxa chaqai ca ne'ne', ca' qamiri rillivii ma'le viỹalec yí'maq 'laua viitaque quiipegue'.