Da la'qaatec ñi qara'gaxala' queso judioipi 'eet taigue da Egipto
1Da na'qaatec icoñiguit so Jeremías taỹaugui so judioipi neeta'ñi naua na'aate' quiyi Egipto yaua Migdol, Tafnes chaqai yi Menfis chaqai yi 'laua pa'a'gue da 'guiñi, 'naac:
2—Ñi qara'gaxala' sqaica lqalanec, ñí'maq qota'olec quena Israel, 'naac: Qamiri huañiỹalo saua'que saua ne'xoyaxaco taarelec nqaishin yi Jerusalén chaqai yaua liỹa' na'aate' quiyi 'laua Judá. Ca' nagui ropoqote', ca' qaica cá'maq na'ñi yi'maxare, 3sauaxat dá'maq se no'uen ỹo'ueetetac. Ma' yo'ooqochit na' ỹa'deetacoto naua le'cootal na 'naac qota'olqaipi chaqai ỹaantacot na lichiinaxanaxat. Na'maxare nashiilqaipi, qam sqa taỹapegueu'a so qomyipi chaqai qamiri chaqai so 'auaxaic qataa'illipi. 4Mashic ỹoto'o' sopilalec sela' na ilaatqaipi quiyim 'naapegalo qamiri quiyim totqai 'viichii dá'maq yaqaica'a, tot yalo'guit dá'maq 'ñiitari'. 5Qam qamiri se na'xaỹaxañiua'. Lama'xa quiitalec 'viichitac na richiinaxanaxachii quená'maq 'ñiỹac qota'olqaipi. 6Ca na'le, ca' nachipishiguim da iuel chaqai da ỹonogoxonaxac, ca ỹavigougui 'ec ca norec quiyi na'aateripi quiyi 'laua Judá chaqai quena nayiquipi yi Jerusalén. Ca' qanopoxoỹaxachiñi, ca' qaica ca naalec yi'maxare, chi ỹovireta'a nagui.
7Ca' chaqaida 'neeta ỹim na'gaxala' sqaica lqalanec, ỹim qota'olec queso Israel, shinac: ¿Chi'negue ma' 'viichii quiyim taalgoto qamiri sojo chalego lecaic la'aaxa? ¿Chi'negue ma' 'viichii quiyim ileu ná'ogue na qom quiyi Judá, ỹale, 'aalo, chaqai na noctoqui' chaqai vire'ta na chita'gue ne'qaañi, ca vire'ta qaica ca no'ueenañi? 8¿Chi'negue ma' yo'ooqochichii quedá'maq ro'ueenataxanaxaguii chaqai 'viichii na richiinaxanaxachii quena ỹoqa'a qota'olqaipi quena Egipto ná'maq naguipegue' quiyim ñiỹa'ñi? Ca' quedajo, ca' viitaque cá'maq chi relauaxahi, ca' ñigui quiyim qamiri naloqojnaxanaxaqui' quiyim 'ue ca qaỹa'xat se no'uen queca qom chaqai qamiri ne'naqa quená'ogue na ỹoreta'oguit qomyipi quena 'laua. 9¿Mashic shi'co' couahi'e dá'ogue dá'maq se no'uen ỹo'ueetetac na'le so 'auaxaic qataa'illipi chaqai ná'maq ỹo'uet na'le so nashillipi quiyi Judá, chaqai so louaaripi, chaqai qamiri, chaqai caná'maq rouahi ỹo'uet quiyi 'laua Judá chaqai quenaua nayico yi Jerusalén? 10Ca vire'ta nagui chaqaidaata dá'maq 'ñiitari', chaqai qaica ca rqolonaxahi, chaqai sqai quiilgoto naua ỹapaxaguinataxanaxaco chaqai naua ỹaqataxaco saanema na'le qamiri chaqai so 'auaxaic qataa'illipi.
11Vichiguiño' ỹim na'gaxala' qaica lqalanec, ỹim qota'olec queso Israel, shinac caqamiri: Ỹim sahotaque sa'ue ca senaxalec se no'uen qamiri, ca' ñalauajñi ná'ogue na llaalqaipi so Judá. 12Ca' ỹim so'uet quiyim ná'maq no'ueenañi quiyi Judá, ca' ỹahotaque taigue da Egipto, ca cá'ogue qanalauajñi: na noctoqui', vire'ta ná'maq lodegaxat ileu ma'le queca lauataq loqo'm queca lqopaaxa. Ca ma'le, ca' ñigui quiyim naloqojnaxanaxaqui' quiyim 'ue ca qaỹa'xat se no'uen queca qom chaqai da ne'naxaguii quena qom ỹo'uet ca nqolonaxa. 13Sa'ue ca nouaxanaxaset ná'maq neeta'ñi yi Egipto, 'nejem nqaishin da nouaxanaxaset yi Jerusalén, sahote'e ca lauataq, ca nqopaaxa chaqai ca ne'ne'. 14Qaica quet cá'maq nañit quiyim nca'leuec quesá'ogue só'maq chicqa'ñi yi Judá taigue da Egipto, 'eno'm ỹahotaque rapila quiyim na'ñi yi Judá, se rapila, ta'ta'a ná'maq nemootauec pil.
15Co'na'le, ca só'maq ỹa'den quiyim so louaaripi ỹo'ueetetac na lichiinaxanaxat quena liỹa qota'olqaipi chaqai só'maq 'aallipi hueete'e yi'maxare quiyim sá'ogue ca' 'xoic, chaqai so judioipi pa'aata'gue da 'guiñi quiyi Egipto, sá'ogue 'naac queso Jeremías:
16—Qomi' se ña'xaỹaxanaxa da nodo'e' qara'xaỹaxac chicqo'ot ñi qara'gaxala'. 17Ta'ta'a quiyim qolqatalec dá'maq so'ueetqatac, qolqatalec quiyim sahoqotaque na qarichiinaxanaxat chaqai ana qarachitaxanataxanqate quena lataxa cañi qarashiila lashi na piguim, dá'maq chaqai'en shinqatari', dá'maq chaqai 'neesari' saua 'auaxaqa qareta'al chaqai so qarashillipi chaqai so qara'gaxalateripi quiyi na'aateripi quiyi Judá chaqai quenaua nayico quiyi Jerusalén. Ma' queso 'xoic na qonoq, qara'maqachiguiñi, chaqai qaica ca qare'xoric. 18Qam na' saxanaxañi quiyim sahoqe na qarichiinaxanaxat chaqai na qarachitaxanataxanaxat lataxa cañi qarashiila lashi na piguim, ca' qaica ná'ogue coqomi', chaqai na qouo' ỹalauat na lqopaaxa loqo'm ileu quena lauataq.
19Ca' so 'aallipi 'naac:
—Qomi' so'ueetaq quen ana qaraqaulata 'nejem añi qarashiila lashi na piguim chaqai so'ueetaq na lichiinaxanaxat chaqai na qarachitaxanataxanaxat lataxa, qam dá'ogue dajo ỹaatqajam ỹa'yiinchigui na qarouaaripi. Ca' qomi' qolqatalec so'ueetqatac.
20Ca' so Jeremías 'naaco' quesá'ogue so ỹalliripi chaqai so 'aallipi 'ue dá'maq 'naac queso'maxare:
21—¿'Neetapiguio' qavillii quiyim ñi qara'gaxala' se ỹa'den dajo loqo'm quiyim coua'e quiyim qamiri loqo'm so 'auaxaic qataa'illipi, so nashillipi, so na'gaxalateripi, chaqai ná'ogue na qomyipi viitaque na richiinaxanaxachii chaqai 'ỹaañitacot na rachitaxanataxanaxachii na liỹa 'ñiitapega qota'olqaipi quenaua na'aateripi quiyi Judá chaqai quenaua nayico quiyi Jerusalén? 22Qam ñi qara'gaxala' tot nalo'guit ná'maq se no'uen 'viichitac, ná'maq se nqo'ta ñi'maxare. Vichiguiño' na na'lauahi nagui qanopoxoỹaxajñi chaqai tot qaica ca naalec. Ca ñigui quiyim naloqojnaxanaxaqui' quiyim 'ue ca se no'uen qainaxalec ca qom, quecá'maq ỹa'ue ca nqolonaxa. 23Dajo re'xoriguii viriỹa'guit nagui chicqochigui dá'maq quiyim qamiri viitaque na richiinaxanaxachii, 'ỹaañitacot na ỹoqa'a 'ñiitapega qota'olqaipi, ca' hueeto'ot da rasauaxashichii ñi qara'gaxala', chaqai ma' se na'xaỹaxañiỹalo naua lapaxaguinataxanaxaco, naua laqataxaco chaqai sqai machiguilo naua lelaataxanaxaco.
24Ca' so Jeremías 'naaco' quesá'ogue so qomyipi, qam ỹapaquetec quena 'aallipi:
—Na'xaỹaxañiỹa da la'qaatec ñi qara'gaxala', qamiá'ogue qomyipi Judá laseripi ñiita'ñi na Egipto. 25Ñi na'gaxala' sqaica lqalanec, ñí'maq qota'olec queso Israel, 'naac: Qamiri 'aallipi ma' 'viichii dá'maq 'xachitac. 'Ñiỹac quiyim mashic 'ỹaañiuec ca ra'qaachiguii quiyim 'viichii ca lichiinaxanaxat chaqai rachitaxanataxanaxachii lataxa cañi rashiilahi lashi na piguim, chaqai pacqajñichigui dá'maq mashic 'ỹaañiuec ra'qaachiguii. ¡Hua', ỹa'maqachiguiñi, pacqajñichigui chaqai 'viichii cá'maq 'ñiỹaco' na'le! 26Qam ñaq na'xaỹaxañiñi qamiri qomyipi ñiỹa'ñi na'le yi Judá, quená'maq mashic neeta'ñi na Egipto quedá'maq ỹim na'gaxala' shinac caqamiri: Saanec da ỹa'qaatec ñallitalta' queda qaica ca 'nejem ỹeenaxat, quiyim qaica quet cá'maq no'maqajnauec da ỹeenaxat quená'maq na'ñi yi Judá quena Egipto quiyim 'naac: Ñallitalta' queda nachaalataxac ñi qara'gaxala'. 27Ma' ỹim seloqota'a ma'le quiyim sa'ue ca le'xoric ná'ogue na Judá laseripi neeta'ñi na Egipto, mesqai ca iqouagaxa. Ná'ogue qaỹalauat ma'le queca lauataq loqo'm quena lqopaaxa. 28Ỹaatqajam sqo vito'olqai' caua qohite' ma'le queca lauataq, ca' quiyi Egipto pila yi Judá, qaiyi ná'ogue ná'maq no'ueenañi quiyi Judá, ca ná'ogue naigue na Egipto, ỹa'den ma'le negue' cá'maq paguec ipaquichigui ca la'qaatec, ỹim loqo'm naua'maxare. 29Ỹim, ỹim na'gaxala' sa'ue da itanec re'oq nqaishin ma'le da ỹa'xalenataxanaxac quiyim ipaquichigui chaqai quiyim sa'ue ca nouaxanaxashichii quenajo 'laua: 30Ỹim saanec ma'le ñi faraón Hofra, nashi quena Egipto quena npa'guenaxauaripi ỹahotaque ỹalauat, 'nejem na' saanec so Sedequías nashi quiyi Judá queso Nabucodonosor nashi quiyi Babilonia, so npa'guenaxaua ỹahotaque ỹalauat.
