Juan 10

₁Ỹaatqajam lliqueta dá'maq shinac caqamiri, quiyim cá'maq sqa taatougui ca lasom aca lahi' ana qagretaipi quiyim inoxono, ta'ta'a quiyim ỹoqa'a ca taatou'e, ca' chaqaica cá'maq cuataxai chaqai huootaxanaxai. ₂Qam cá'maq taatougui ca lasom, ca chaqaica cá'maq qagreta lo'o cá'maq reloqota'a ana qagretaipi. ₃Cá'maq lasom lo'o ỹauachigui ca lasom, qaiyi inoxono, chaqai ana qagretaipi no'uenegue da lavillaxac. Ma' roỹaxanta'gue na leenaxat ana qagretaipi, ca ỹauegue'oguiyi cañi lahi'. ₄Ca ma' ime quiyim ỹachaxanec cañi lahi' ná'ogue ana lalo qagretaipi, ca' eec, 'auetauec cana'maxare, chaqai aná'maq qagreta coỹaretaho queso'maxare, ma' ỹa'den da lavillaxac so'maxare. ₅Ma' sqai quegue cá'maq se iuanapega; lama'xa 'eetapeguem ca'maxare, ma' la'la'a cá'maq lavillaxac cá'maq se iuanapega.

₆So Jesús ỹa'uo' da laloqojnaxanaxaqui, qam saua'maxare se ỹa'deene' dá'maq reloqo'tegue dá'maq 'naac so'maxare.

₇So Jesús lotqai liỹo' 'naac queso qomyipi:

—Ỹaatqajam llic da shinac caqamiri: Ỹim ná'maq ỹim lasom lligo ana qagretaipi. ₈Ca sá'ogue só'maq na'au caỹim nodaachiguiñi cuataxaiquipi chaqai huootaxanaxairipi, qam ana qagretaipi se na'xaỹaxana so'maxare. ₉Ỹim ná'maq ỹim lasom; cá'maq inoxontougui aỹim, ca' ca'laaxaic ma'le. Ca 'nejem ma'le aca qagreta quena' inoxono chaqai quiyim nenoxonec cañi lahi', ca' ỹanata ca 'uaqapi.

₁₀Ca cuataxai chaqaidaata naga'a da locuataxac, lalauataxanaxac, chaqai da leuacqataxanaxac; qam ỹim ñanac, qaiyi 'ue da lca'laxa na'maxare, chaqai 'xoic ma'le da lca'laxa. ₁₁Ỹim ná'maq ỹim no'uen qagreta lo'o. Cá'maq no'uen qagreta lo'o ỹaanec da nachaalataxac cana qagretaipi. ₁₂Qam cá'maq chi ro'ueenataxanteguelec aca nishiuete, ca'maxare quiyim idaana'guit cá'maq toxonaxai, ca 'eet, no'ueenaqchichiguiñi ca qagretaipi, ma' ca'maxare mesqai ỹaatqajam qagreta lo'o, ma' mesqai lalamaxarete ana'maxare. Ca cá'maq toxonaxai retoxoñigui ana qagretaipi, ca neuagaxatac nqai'en. ₁₃Ca' sojo ỹale 'eet, ma' qacaata aca nishiuete ỹahinteguelec, ca' qaica ca ỹauaaque ná'maq qagretaipi.

_14-15Ỹim ná'maq ỹim no'uen qagreta lo'o. Ca' chaqaida dá'maq 'neeta quiyim iuañiua' ñi ita'a, chaqai aỹim seuana ñi'maxare, ca' chaqaida 'nejem quiyim ỹim sa'deenta ana ilo qagretaipi, chaqai ana'maxare ya'deenta. Chaqai aỹim saanougui da ñachaalataxac aná'maq qagretaipi. ₁₆Qai'neeta 'ue ana liỹa ilo qagretaipi sqai neetaugui anajo ilo lahi'. Ana'maxare qai'neeta sahotaque ño'deho. Na'maxare qai'neeta na'xaỹaxañiua' ma'le, qaiyi 'oonoqui' ca lapooqo', chaqai 'oonoqui' ca neloxoỹaq.

₁₇Ñí'maq ita'a ỹaatqajam nqo'ta ỹim, ma' ỹim saanec da ñachaalataxac, qam ma'le liỹa secoñiguit. ₁₈Qaica cá'maq rouootaxana'gue da ñachaalataxac, qam chaqaỹim ná'maq saanec. 'Ue da iquesaxanaxa quiyim saanec chaqai quiyim liỹa secoñiguit. Ca' dajo dá'maq chaqai llilnataxanaxac ñí'maq ita'a.

₁₉Ca co'na' so judioipi 'xaỹa dajo na'qaatec, ca lotqai ỹoricchi na la'deenataxanaxac. ₂₀Ca 'xoico' só'maq 'naaco' quen:

—¿Chi'negue dá'maq na'xaỹaxañitapega, ma' 'ue ñi neetagui chicqo'ot so na'ỹaapec, chaqai mashic quishiuguet?

₂₁Qam 'uo' quen na liỹa 'naac:

—Qaica ca qom quiyim neetagui ca chicqo'ot so na'ỹaapec 'nejem dajo da ỹa'xat. Ca ¿peeta'a ca chicqo'ot so na'ỹaapec ishito' quiyim nauanñi nqai'en ca qai'laq?

₂₂Mashic no'oomoxo' na'le, ca' quiyi Jerusalén 'uo' so nemaqachic quiyim qaỹo'leentetaque so na'xa'a co'na' qoỹaanot ñi qota'a añi no'ueenaxanaxaqui. ₂₃Ca' so Jesús ỹouoxontaco' añi no'ueenaxanaxaqui, quiyí'maq qohinac nasoxoc so Salomón. ₂₄Ca' so judioipi lapoỹaho' na'le, ca qohinaco' queso'maxare:

—¿Chi' laquio' quiyim ỹaatqajam nachaxañitalo qomi'? No'm chaqaqami' ná'maq qami' nashi nca'laxaqui, ca 'maxaraic quiyim 'qaataxañitalo qomi', ca' yí.

₂₅Ca' so Jesús 'naaco' queso judioipi:

—Mashic shi'gue sa'qaataxanalo qamiri, qam qamiri sqai viilec aỹim. Ná'maq ỹo'ueenatqaipi chaqaina ná'maq ỹamaxailec ñi ita'a, ca' chaqainaua nauá'maq 'ec ra'qaataxantapegalo qamiri. ₂₆Qam qamiri sqai viilec, ma' mesqai qamiri nauá'maq iloxoiqateguese qagretaipi. Ca' chaqaida dá'maq shi'gue shinac caqamiri. ₂₇Ma' aná'maq iloxoiqateguese qagretaipi ỹa'den da ivillaxac, chaqai ỹim sa'den, chaqai ana'maxare coỹareta'pegue' aỹim. ₂₈Ca' ỹim saanem da lca'laxa sqaica lqodoc. Ca tot ileu, chaqai qaica quet cá'maq ishit rouootaxana'gue cana ñapoquena. ₂₉Ma' nañaañim ñi ita'a. Ñi'maxare ỹapacauec quená'ogue, chaqai qaica ca ishit rouootaxana'gue cada napoquena ñi'maxare. ₃₀Ỹim chaqai ñi ita'a qomi' 'oonoqui'.

₃₁Co'na'le, ca so judioipi lotqai iconapega na qa' quiyim ỹahotaque inaq so'maxare. ₃₂Ca' so Jesús 'naaco':

—Ỹim ỹaatqajam 'xoic ná'maq so'uet ỹa'maqachiguiñi, huañichigui qamiri, sachigoxochichigui da lquesaxanaxa ñi ita'a. Ca ¿negue' cá'maq sasoualec quena'maxare quiyim viitaque yinaxahi quena qa'?

₃₃Ca' so judioipi 'naaco':

—Qaica quet cá'maq 'em senaqsoq qami' quena qa' quená'ogue ná'maq ỹa'maqachiguiñi 'viichi', ta'ta'a quiyim qami' napaquiralec ñi qota'olec quenaua ra'qaataxahi'. Ma' qami' chaqaiqami' qom, qam chi no'viichiseguelta' quiyim qami' qota'olec.

₃₄Ca' so Jesús 'naaco' queso qomyipi:

—Queda naqataxac caqamiri naneretañi quiyim ñi qota'olec 'naac: “Qamiri, qamiri qota'olqa.” ₃₅Qam qomi' sa'deenqata quiyim naua naneresañi la'qaatqa ñi qota'a naua'maxare sqaica ỹoqolliguite', ma' quiyim ñi qota'olec ỹamata'gue qota'olqaipi só'maq icoñiguit da la'qaatec. ₃₆Chaqai no'm ñi qota'olec ỹoỹoote'oga ỹim, ca yilata na 'laua, ca ¿negue' quet cá'maq 'neeta quiyim 'ñiỹac ñapacalec ñi'maxare quiyim shinac ỹim llaalec ñi qota'olec? ₃₇No'm se so'ueete' nauá'maq ỹo'ueeteta'pe ñi ita'a, ca sqai viilec aỹim. ₃₈Qam no'm so'ueeteta'pe, 'eno'm sqai viilec aỹim, qam viilgoto nauá'maq so'ueeteta'pe, qaiyi ỹaatqajam 'yiiñita quiyim ñi ita'a hueetagui aỹim, chaqai ỹim seuetagui ñi'maxare.

₃₉Ca lotqai liỹa qaỹahotaque qaicoñi' so Jesús, qam qohitauec.

₄₀Co'na'le, ca so Jesús pilegue da lahi aso lachiugue Jordán ca pa'aata'gue da lqodoigue, yí'maq hua'ño' na'le na' rachilaxanataxantac so Juan. Ca' neeta'anyi. ₄₁Ca 'xoico' so qom quepegue' yí'maq hueeta'ñi so'maxare. Ca 'naaco' quen:

—Ỹaatqajam llic quiyim so Juan, 'eno'm qaica ca ỹo'uet quena netanqaipi se qaiuanapega, qam dá'ogue dá'maq 'naac na'le quedajo ỹale ỹaatqajam lliqueta.

₄₂Ca 'xoico' na huelec so Jesús na'le quiyi'maxare.