Juan 12

₁Co'na' saqa'lecaua seis na'xata' quiyim ỹovire'oga so na'xa'a quena' qaỹo'leente quiyim qoyique'e yi Egipto. Ca' so Jesús quepegue' yi Betania yí'maq neeta'ñi so Lázaro só'maq Jesús liỹo' nca'laxatec na' ileu. ₂Ca' qaỹo'uet so na'ic qaique'eelec so Jesús, ca aso Marta imeentapeguec so na'ic. Ca' so Lázaro ỹalequetaho, reloqotalec so nqui'ỹaxala', lqui'ỹaxaua so Jesús. ₃Ca' aso María nodouo aso coraxat lahi' 'uo' ca medio litro quena coraxat leenaxat nardo. So'maxare 'xoic lesega'a. Ca ỹocorelgoto naua lapiaate' so Jesús. Ca na' ime, ca ỹashiviaxate' ỹahote'e so laue. Ca' sá'ogue so 'imec pilougui so lahita so coraxat. ₄Ca' so Judas Iscariote, llaalec so Simón, chaqaiso só'maq ỹalequetauguilo saua lapaxaguinatqa so Jesús, chaqai chaqaiso só'maq tai'a quiyim ỹaano ma'le so'maxare, 'naaco':

₅—¿Chi'neco' ma' se qaimeeno' sojo coraxat, trescientos denarios laseuete nqohin, ca' qaỹotauan na 'xoraiquipi?

₆Qam so Judas sqai 'naac dajo quiyim i'xorentac na 'xoraic. Ta'ta'a quiyim so'maxare cuataxai chaqai da'maxare quiyim lo'qoota'a aso nam lahi', chaqai rocachitapiguio' quen aná'maq qainaxa'ñigui aso'maxare. ₇Ca' so Jesús 'naapego' so Judas:

—'Xañirac, ma' da'maxare ỹa'maxatetac dajo, qaiyi leuoteta cá'maq na'xa'a ma' ỹovire'oga quiyim qayishinñi. ₈Ca chaqai 'neetari' ỹalequetauguilo qamiri na 'xoraic, qam aỹim sqai 'neetari' quiyim salequetauguilo qamiri.

₉Ca 'xoico' so judioipi ỹa'den quiyim so Jesús hueeta'ñi yi Betania. Ca' taiquera. Qam sqaidaata quiyim ỹahotaque iuana so Jesús, qam qai'neeta ỹahotaque iuana so Lázaro só'maq liỹo' qanca'laxatec na'le queso Jesús. ₁₀Ca' so lashillipi na netaxaỹaxanqajanqaipi quena' qaretaxaỹa'pegue' ñi qota'olec, so'maxare retaxaỹapigui quiyim qai'neeta qaỹahotaque qaỹalauat so Lázaro, ₁₁ma' sauaxat so'maxare dá'maq 'em quiyim 'xoic na judioipi noỹootec, ma' mashic huelec so Jesús.

₁₂Ca 'xoico' so qomyipi quepegue' yi Jerusalén quiyim quepegue' so nemaqachic quena' qaỹo'leente so na'xa'a quiyim qoyique'e yi Egipto. Ca' queso liỹa na'xa'a, ca qaỹa'deeno' quiyim so Jesús ỹovira'a yi na'a' lodegaxat. ₁₃Co'na'le, ca qanouaxanec ana laue ana chavic, ca qaỹaqata'guit so Jesús. Ca qaỹaualqatalec, qohintari':

—¡Semaqachinaq ñi qota'olec! ¡Ỹaatqajam no'uen da llicyaxac ná'maq naquetaugui da leenaxat ñi qara'gaxala'! ¡No'uen da llicyaxac ná'maq lashi na Israel llaalqaipi!

₁₄So Jesús iuanejlec so 'ashinoqui', ca naalec so'maxare, qam ipaquichigui dá'maq 'nerac naua naneresañi la'qaatqa ñi qota'a:

₁₆Na' ñaqai chita'gue so lapaxaguinatqaipi ỹaatqajam se ỹa'den ca 'neeta dajo. Qam na'chaqai co'na' ỹovita quiyim qaimaqachin so Jesús, ca qaỹo'leente dá'ogue da llicyaxac so'maxare. Ỹaatqajam ipaquichigui dá'ogue dá'maq naneretañi queso'maxare.

₁₇Quesó'maq qomyipi liỹaataco' so Jesús co'na' so'maxare roỹaxañi'ña caso lahi' so Lázaro, ca' liỹa nca'laxatec queso nelauaxa, na'maxare qai'neeta ỹa'xatetac dá'maq ỹauanchigui. ₁₈Ca' na liỹa qomyipi eec qata'guit so Jesús, ma' mashic ỹa'den quiyim mashic 'ue so ỹo'uet quena netanec se qaiuanapega. ₁₉Ca' na fariseoipi retaxaỹata', ca 'naaco':

—Ñaqa 'ajñii qamiri quiyim mashic qaica ca qarishaaque, ma' mashic ná'ogue na qomyipi coỹareta'pegue' so'maxare.

₂₀Quesó'maq qomyipi quepegue' yi Jerusalén ma' ỹovire'oga so na'xa'a lapoxoqui quiyim imaqachin ñi qota'a, ca 'vio' saua ỹalequesaho griego lase'. ₂₁Saua'maxare nqo'nera'a so Felipe, so'maxare Betsaida le'ec yí'maq huaugui yi 'laua Galilea. Ca qane'xoresene'tot, qohinaco':

—Nqouaquiteguelo qomi', sahoqotaque seuanaxa ca Jesús.

₂₂Ca so Felipe eec, ca ra'qaataxano' so Andrés, ca saua'que querepegue' so Jesús, ca ra'qaataxane'. ₂₃Ca' so Jesús 'naaco' quesaua'maxare:

—Ỹovita yi laloqo' quiyim najo ỹale llaalec qaimaqachin ma'le. ₂₄Ỹaatqajam llic da shinac caqamiri, quiyim no'm 'óna ca trigo la sqai najñi, ca' taugui na 'laua, ca' se nqo'in quiyim 'oonoqui'. Qam no'm ileu, ca' ishit quiyim 'xoic ca qanaqat chicqaugui. ₂₅Cá'maq ỹauotegue da chi nachaalataxac, ca na'laxatañi ma'le; qam cá'maq ỹamaqa'gue da chi nachaalataxac quena 'laua, ca 'ue ma'le da nachaalataxac qaica ca lqodoc. ₂₆Ca no'm 'ue ca ỹahotaque quiyim ro'ueenataxanot aỹim, ca 'maxaraic quiyim queeta'pegue' aỹim, ma' cá'maq seuete'e, ca' chaqaiyi hueete'e cá'maq ro'ueenataxantacot aỹim. No'm 'ue ca ro'ueenataxanot aỹim, ca' ñi ita'a imaqachin ca'maxare.

₂₇Ca' nagui ỹaatqajam 'xoic da shinta; ca ¿nega'ỹo' ca shinac? ¿Loqo'm shinac: “Qami' ita'a, yca'laxachirec quedá'maq naatailec nagui”? Qam chaqaida dá'maq 'em ñanac. ₂₈Qami' ita'a, maqachiñi' da qadeenaxachi'.

Ca 'uo' so qara'xaỹaque na'qaatec, 'maqot na piguim, 'naaco':

—Shi'gue semaqachin, qam qaiyiita liỹa semaqachin.

₂₉Ca ná'maq qomyipi hueeta'anyi na'xaỹaxantac 'naaco' quiyim nalataxa so 'xaỹaque. Qam na liỹa 'naaco':

—Quiyim nelaatec piguim le'ec so netaxaỹa'ña.

₃₀Ca' so Jesús 'naaco' queso qomyipi:

—Mesqaỹim ná'maq 'em quiyim qara'xaỹaque so na'qaatec; ta'ta'a quiyim caqamiri. ₃₁Ca' nagui, ca ỹovita yi laloqo' quiyim ñi qota'a ỹa'ue da lasauaxaset na hueetalec na 'laua; ca' nagui, ca ñi'maxare ỹo'daauec so na'ỹaapec só'maq relaataxantac quena 'laua. ₃₂Ca ma' ỹovita quiyim qananojshiguim aỹim quena 'laua, ca' ñauego ma'le ná'ogue na qomyipi.

₃₃Ca' quedajo, ca ỹahotaque quiyim qaỹa'yiinchigui cá'maq 'neeta ma' ileu. ₃₄Ca' na qomyipi 'naaco' queso'maxare:

—Qomi' sa'xaiqatac quena' qaretaqalec ana lere ana lomalate na naqataxaquipi quiyim cajo nashi nca'laxaqui sqaica lqodoc da nachaalataxac. Qam ¿chi'neco' qami' 'ñirac quiyim cajo ỹale llaalec qananojshiguim ma'le? ¿Chi nega'ỹo' ca 'ñiisapega ỹale llaalec?

₃₅Ca' so Jesús 'naaco' queso qomyipi:

—Nagui ma' ñaqai hueetauguilo qamiri najo lcoỹeraqate na 'laua, qam sqoỹoxouec quiyim ỹalequetauguilo qamiri. Ca' quiitaugui dajo lauaq ma' ñaqa 'ue, qaiyi se i'laxate' qamiri ca napalaxa. Ma' cá'maq queetaugui ca napalaxa se ỹa'den cá'maq taigue. ₃₆Ca' viilec nagui najo ncoỹeraxanqate, ma' ñaqai hueetauguilo qamiri, qaiyi viriỹau'a quiyim qai'neeta 'ue ca lauaxai' qamiri.

Ca co'na' ime 'naac dajo, ca' so Jesús eec nqañoqtapeguema saua'maxare.

₃₇Ca 'eno'm so Jesús 'xoic na ỹo'uet quena netanec se qaiuanapega iuanchigui nqai'ne' saua'maxare, qam qaiyiita se qoyiuelec. ₃₈Ma' qaiyi ipaquichigui da la'qaataxanaxac so la'qaataxanqajnec ñi qota'a leenaxat Isaías co'na' ỹiriñi:

₄₂Qam qaiyiita 'xoico' so judioipi huelec so Jesús, vire'ta ná'maq 'ue nqai'negue. Qam se nichoxoteta quena qom, ma' no'cha'a so fariseoipi, qaiyi se qaỹo'daauec cañi lapoxoqui. ₄₃Ma' ỹapacqajnauec quiyim qaimaqachin quena qom, quiyim qaimaqachin quiñi qota'olec.

₄₄So Jesús nelamaxaren na' retaqa, 'naaco':

—Cá'maq huelec aỹim mesqaỹimeta huelec, ma' qai'neeta huelec ñi ita'a ñí'maq yila'. ₄₅Chaqai cá'maq iuañiua', iuana qai'neeta ñí'maq yila'. ₄₆Ỹim ma' ỹim lcoỹeraqate na 'laua, qaiyi quená'maq huelec aỹim se no'ueenaugui na napalaxa. ₄₇Qam no'm 'ue ca 'xaỹalo naua ỹa'qaatqa, qam se na'xaỹaxan, mesqaỹim ná'maq sa'ue ca nouaxanaxaset ca'maxare; ma' ỹim se ñovita na 'laua quiyim so'uet ca nouaxanaxaset na qomyipi; qaidaata quiyim ñovi', qam nca'leuec nqaishin na qomyipi. ₄₈Cá'maq se icoñiguit aỹim chaqai se na'xayaxanalo naua ỹa'qaatqa, chaqa'ma' shi'gue 'ue ñí'maq ỹo'uet ca nouaxanaxaset ca'maxare. Nauá'maq na'qaatqa sa'xateta'pe, chaqainaua nauá'maq ỹo'ueete' ca nouaxanaxaset ca qom queca pa'aatec na'xa'a. ₄₉Ma' ỹim se ñanoiquentac quiyim setaqa; ma' ñí'maq ita'a ñí'maq yila', chaqaiñi ñí'maq chicqo'ot cá'maq sa'xat chaqai cá'maq sapaxaguinataxanegue. ₅₀Chaqai sa'den quiyim dá'maq lelaataxanaxac ñi ita'a, da'maxare chicqaugui ca nca'laxa sqaica lqodoc. Vichiguiño' quiyim sa'xat, sa'xat, ma' ñí'maq ita'a ỹamaxailec.