1Shinac dajo caqamiri, qaiyi quiitalec qaica ca huapigui qavillii. 2Qamiri qaro'yiỹauec ma'le cañi lapoxoqui na judioipi, chi ỹovireta'a quiyim canchaqaica 'ue ca ỹalauat caqamiri, ca 'neetapigui lauel quiyim 'maxaraic da ỹo'uet quiñi qota'olec. 3Dajo qohine'teguelo qamiri ma'le, ma' se qaiuanapega ñí'maq qota'a chaqai aỹim. 4Sa'xat dajo caqamiri, ca qaiyi ma' ỹovita, ca no'viñi'tegue quiyim shi'gue shinac caqamiri.
Dá'maq lo'ueenataxanaxac so Espíritu Santo
Se sa'xat dajo na' ñaqai chita'gue sapaxaguiñii, ma' ñaq salequetauguilo qamiri. 5Ma' nagui shicpegue' yí'maq neeta'ñi ñí'maq yila'; chaqai qaica cá'maq yinat caqamiri negue' cá'maq saigue. 6Ta'ta'a quiyim chigoitam, ma' shinac dajo. 7Qam llic dá'maq shinac caqamiri: ma' paguec la'maxa quiyim ỹim shic. Ma' no'm sqa shic, ca se novitalo qamiri cá'maq rotauañii chaqai ra'ñaxachii, qam no'm shic, ca ñila' ma'le. 8Qam ma' novi' ca'maxare, ca ỹa'deenaxanaxanegue na qomyipi hueetalec na 'laua quiyim sauaqhuaiquipi, chaqai quiyim 'ue ca 'maxaraic ñicyaxac, chaqai quiyim ñi qota'a ỹa'ue ca nouaxanaxaset ma'le na'maxare. 9Na'maxare sauaqhuaiquipi, ma' sqai huelec aỹim; 10ca retane' ma'le cá'maq 'neeta cá'maq 'maxaraic ñicyaxac, ma' ỹim shicpegue' yí'maq neeta'ñi ñi qota'a, ca' qamiri totqai huañiua'; 11chaqai retane' ma'le quiyim ñi qota'olec ỹa'ue ca nouaxanaxaset, ma' shi'gue qaỹa'ue da nouaxanaxaset so na'ỹaapec só'maq relaataxanac quena 'laua.
12'Xoic quet ná'maq liỹa sa'xatema qamiri, qam qamiri sqai shichii 'yiiñii nagui. 13Qam ma' novi' ca Espíritu cá'maq ichoxot dá'maq ỹaatqajam lliqueta, ca ca'maxare ỹapaxaguinguelo qamiri dá'ogue dá'maq lliqueta; ma' se nanoiquentac quiyim retaqa, ta'ta'a quiyim ỹa'xat ná'ogue ná'maq 'xaỹa, ca ra'deenaxanaxañiigue cá'maq ñaqa naataho. 14Ma' ca'maxare yimaqachin ma'le, ma' icoñiguit ma'le ná'maq ỹalamaxaret, ca ỹa'deenaxanaxaneguelo qamiri ma'le. 15Ná'ogue ná'maq lalamaxat ñi qota'a qai'neeta ỹalamaxaret. Vichiguiño' shinac ca Espíritu icoñiguit cá'maq ỹalamaxaret, ca ỹa'deenaxanaxaneguelo qamiri.
Da nachicoxo ñigui ma'le ca toonaxac
16Qaỹaloq totqai huañiua' qamiri, qam qaỹaloq lotqai huañiua', ma' ỹim shicpegue' yi neeta'ñi ñi qota'a.
17Ca 'vio' saua quesaua lapaxaguinatqa chi nenatetecta':
—¿Nega'ỹo' cá'maq reloqo'tegue dá'maq ỹa'xat? 'Neetapegalo qomi' quiyim qaỹaloq, ca tot seuanaxa, ca' ime lotqai liỹa seuanaxa, ma' 'naac quepegue' ca neeta'ñi ca qota'a. 18¿Negue' cá'maq reloqo'tegue dá'maq 'naac quiyim 'naac “tot qaỹaloq”? Se sa'deenaq cá'maq reloqo'tegue dá'maq ỹa'xatetac.
19Ca' so Jesús retan quiyim shim qainat, ca 'naaco':
—Ỹim shinac caqamiri quiyim qaỹaloq, ca' totqai huañiua', ca ma'le, ca lotqai liỹa huañiua'. ¿Ca' dajo dá'maq nenachitapigui qamiri? 20Ỹaatqajam llic da shinac caqamiri, quiyim qamiri noỹiñii ma'le chaqai chigoita, qam na qomyipi hueetalec na 'laua netoon ma'le. Qam 'eno'm chigoita qamiri ma'le, da rachicoxohi ñigui ma'le ca netoonaxaguii. 21Quena' ana 'aalo sham co'o, ca ỹaatqajam rachitata, ma' ỹovirelec ca laloqo' da nqui'ic. Qam quena' ime ne'qaañi ca noctoqui', ca' coua'e dá'maq nqui'ic, ma' paguec da netoonaxac quiyim ne'qaañi ca noctoqui' quena 'laua. 22Ca' qamiri qai'neeta nagui 'ue da rachitachiguii; qam ỹim liỹa seuanalo qamiri ma'le, ca ma'le, ca' no'xagui ma'le añi re'taxanatahi queca netoonaxaguii, ca' qaica ishit naqat da netoonaxaguii ma'le.
23Ca' quecajo na'xa'a, ca' tot yinachii. Ỹaatqajam llic da shinac caqamiri, quiyim ñi qota'a ỹaanema qamiri cá'ogue cá'maq shiilaxañiỹaque quiyim quiichigui nqai'ñii da ỹeenaxat. 24Vire'ta nagui saqa'leca ca shiilaxañiỹaque quiyim quiichigui nqai'ñii da ỹeenaxat; shiilaxañii, ca' coñiguit, qaiyi 'xoic ma'le ca netoonaxaguii.
So Jesucristo mashic loxonec da 'ueenataxac hueetalec na 'laua
25Ỹim sa'xat dajo caqamiri, qam sahote'e na ỹaloqojnaxanaxaqui. Qam ỹovita ma'le ca laloqo' quiyim se sahote'e ca ỹaloqojnaxanaxaqui quiyim 'ue ca sa'xat caqamiri, ta'ta'a quiyim ỹaatqajam sechoxote'tema qamiri ñi qota'a. 26Ca' quecajo na'xa'a qamiri shiilahi ñi'maxare, qam quiichigui nqai'ñii da ỹeenaxat. Ca sqai shinac quiyim ñi'xoresene'tot ñi qota'a caqamiri, 27ma' chaqaiñi ñí'maq qota'a re'xoriñii. I'xorene' qamiri, ma' qamiri yi'xoriñii, chaqai viilec quiyim sachicqo'ot ñi qota'olec. 28Chaqai ỹaatqajam sachicqo'tot ñi qota'a na' ñanacpegue' na 'laua, qam nagui shique'e na 'laua, ma' sopila ñi qota'a.
29Ca' saua lapaxaguinatqa 'neraco':
—Nagui maxasa', ca ỹaatqajam ỹaatqate'ueguelo naua ra'qaataxahi', ca' totqai vise'e ca raloqojnaxanaxagui'i'. 30Ca' nagui, ca seuanaxa quiyim ná'ogue nanchaqaina 'yiiñi', chaqai sqo viñi' quiyim qarenachi'. Ca' quedajo, ca seuaqlec quiyim chicqoiro'ot ñi qota'olec.
31Ca' so Jesús 'naaco':
—¿Ca' qainaquita nagui viilec? 32Qam ỹovita ma'le ca laloqo', ca' nagui chaqa'ma' ỹovita quiyim neuagaxata'pe taate'ogalo nqohine' qamiri, ca yalachii yodaqajñitec ma'le. Qam se yodaatec, ma' iỹaatac ñi qota'a. 33Dá'ogue dajo shinac caqamiri, qaiyi 'ue ca ra'maxahi quiyim na'yiitau'a ỹim. 'Ue da re'xoriguii ma'le quena viitalec 'laua. Qam 'neeto' reualliñi, ma' ỹim mashic shi'gue ỹoxonec da 'ueenataxac hueetalec na 'laua.
