Juan 3

₁'Uo' so ỹale ỹalequetaugui na fariseoipi, leenaxat Nicodemo. La'gaxala' so'maxare na judioipi. ₂Sojo Nicodemo 'uo' so pe ra'pichi'oga so Jesús, ca' 'naaco':

—Qami' napaxaguinataxanaq, qomi' sa'deenqata quiyim qanela' qami' quiñi qota'olec quiyim qarapaxaguiñi', ma' qaica ca ishit ỹo'uet ná'maq 'viichisac netanqaipi quiyim re'oq da rquesaxanaxa'e', qaicaata cá'maq hueeto'ot ñi qota'olec.

₃Ca' so Jesús 'naaco' queso'maxare:

—Ỹaatqajam lliqueta dá'maq sa'xatem qami', quecá'maq sqo pilac liỹa ne'qaañi, ca' se iuana da lo'ueenataxanaxac ñi qota'a ma' ỹoiquentac ná'ogue najo.

₄Ca renataxano' so Nicodemo:

—Qam ¿negue' queto' ca la'maqa' queca qom quiyim mashic ỹi, ca lotqai liỹa ne'qaañi? ¿Qa' ishit quet quiyim liỹa pilougui na lauel aca late'e, ca lotqai liỹa ne'qaañi?

₅Ca' so Jesús 'naaco':

—Ỹaatqajam llic dá'maq sa'xatem qami', quiyim cá'maq se nañan quiyim qanachilaxan chaqai quiyim qaỹadalaxat queso Espíritu Santo, ca se inoxona'a da lo'ueenataxanaxac ñi qota'a ma' ỹoiquentac ná'ogue najo. ₆Cá'maq chaqai llaalec cá'maq chaqai qom, ca' ca'maxare qom, qam cá'maq chicqaugui da ne'xaỹoqsoxoc so Espíritu Santo, ca' ca'maxare ỹantañi da no'ueenataxac só'maq Espíritu. ₇'Neeto' re'laqaita dá'maq shinac caqami' quiyim “ná'ogue na qomyipi ỹouen quiyim liỹa ne'qaañi.” ₈Na nonot quena' npe'taxanshiguim, qam chaqai ỹoiquentac cá'maq reloxoigue; ca 'qa'isaque na lelamaxa, qam sqa 'yiiñi' cá'maq chicqochi'ñi chaqai cá'maq taigue. Ca' chaqaida 'neeta ná'ogue ná'maq ne'xaỹaugui so Espíritu Santo.

₉Ca' so Nicodemo lotqai liỹa renataxan, 'naaco':

—¿Negue' cá'maq 'neeto' ca leloxoỹaxac dajo?

₁₀Ca' so Jesús 'naaco':

—Ỹaatqajam qami' napaxaguinataxanaq quena llaalqaipi so Israel, qam ¿sqa 'yiiñi'o' dajo? ₁₁Ỹaatqajam llic dá'maq sa'xatem qami', ma' qomi' sa'xataq dá'maq sa'deenaq chaqai cá'maq sauanqachigui, qam qamiri sqai viilec dá'maq sa'xataq. ₁₂No'm sqo viilec aỹim quena' sa'xate' naua hueralec na 'laua, ¡huose'quet viilec aỹim queta' sa'xatema qamiri cá'maq hueeta'gue da piguim!

₁₃Ma' qaica ca taigue da piguim, ta'ta'a ná'maq nenojñi chicqashiguim queda piguim, ná'maq qohinac ỹale llaalec, chaqai'en neeta'gue da piguim. ₁₄Ca' chaqaida dá'maq 'ne'teco' so Moisés na' nanojshiguim so nadenqatec nanaic quiyi 'laua qaica qom, ca qai'neeta najo ỹale llaalec ỹouen quiyim qananojshiguim, ₁₅qaiyi se ileu ná'ogue ná'maq huelec so'maxare, ta'ta'a quiyim 'ue da lca'laxa sqaica lqodoc.

₁₆Ma' ñi qota'olec ỹaatqajam 'xoico' da lauochaxa quena qomyipi, ca ỹaanec na 'oonoqui' llaalec, qaiyi se ileu cá'ogue cá'maq huelec na'maxare. Ta'ta'a quiyim 'ue da lca'laxa sqaica lqodoc. ₁₇Ñi qota'olec se nelata na llaalec na 'laua quiyim ỹa'ue ca nouaxanaxaset na qomyipi. Ta'ta'a quiyim ỹahotaque nca'laxatec na'maxare.

₁₈Cá'maq huelec na llaalec ñi qota'olec, ca' qaica ca nouaxanaxaset. Qam cá'maq sqai huelec, chaqa'ma' shi'gue 'ue da nouaxanaxaset nqohin, ma' sqai huelec na 'oonoqui' llaalec ñi qota'olec. ₁₉Ná'maq sqai huelec, ca' 'ue ca nouaxanaxaset, ma' na' novita na 'laua so ncoỹeraxanaxat, ỹapacqajnauec da lqo'iichi quena napalaxa, ma' se no'uen ná'maq ỹo'ueetetac. ₂₀Ma' ná'ogue ná'maq ỹo'ueetetac na se no'uen ỹaatqajam loquiiaxat so ncoỹeraxanaxat, chaqai se nqo'neu'a so'maxare, qaiyi se re'xoi' naua se no'viiñi ỹo'ueeteta'pe. ₂₁Qam ná'maq natenta dá'maq ỹaatqajam lliqueta leloxoỹaxac, ca' nqo'neu'a so ncoỹeraxanaxat, qaiyi re'oq quiyim chicqo'ot ñi qota'olec ná'ogue ná'maq ỹo'ueetetac.

₂₂Ca co'na' ime dajo, ca' so Jesús eec, liỹareta'pe saua lapaxaguinatqa, querepegue' yi 'laua Judea. Ca' 'vii saua na'xata' hueeta'anyi chaqai rachilaxanataxantac. ₂₃So Juan qai'neeta rachilaxanataxantac hueeta'ñi yi Enón, yi'maxare sqoỹoqaque quiyi Salim, ma' 'xoic na huaxaỹaq quiyi'maxare. Ca' anac na qomyipi, ca' qanachilaxan. ₂₄Ca' dajo 'neeto' na'le, na' saqa' qaicoñi' so Juan.

₂₅Ca 'vio' saua lapaxaguinatqa so Juan nco'uaata'to saua judío lase' na' retaqasapigui da no'ueenataxac ca qom nco'taxateta. ₂₆Querepegue' so Juan, ca' 'nerec:

—Qami' napaxaguinataxanaq, 'ajñi' dá'maq ỹovireta'a qami' na'le queda pa'ỹa'gue da lqodoigue caso lachiugue Jordán, dá'maq 'xachisac na'le coqomi', da'maxare nagui rachilaxanataxantac chaqai ná'ogue na qomyipi queeta'pegue'.

₂₇Ca' so Juan 'naapegalo':

—Qaica ca qom quiyim chi nanoiquentac 'ue ca ỹo'uet, no'm sqo ỹaanem quiñi qota'olec cá'maq ỹo'uet. ₂₈Qamiri nauá'maq ỹaatqajam 'xaichigui aỹim na' shinac mesqaỹim cajo nashi nca'laxaqui, ta'ta'a quiyim qayila' sa'aueta'gue cá'maq taata'gue ca'maxare. ₂₉Quiyim 'ue ca shilaq, ca cá'maq ỹaatqajam shilliguit acá'maq nequetegaxai, ca' chaqaica cá'maq nauonaxaua. Qam cá'maq nauochaxaua cá'maq shilo hueetau'e na lahi, ca 'qaatapega. Ca 'xoic da netoonaxac quiyim 'qaatapega só'maq 'on. Ca' chaqaida dá'maq 'neeta caỹim quiyim 'xoic da ñitoonaxac. ₃₀Ca'maxare cá'maq nqo'neetauec ma'le da lichoxoric, ca' ỹim nqo'neeta'ta' ma'le da ichoxoric.

₃₁Cá'maq chicqa'gue da piguim, ca'maxare napacalec ná'ogue nanchaqaina; qam cá'maq hueetalec ana 'laua, ca'maxare 'lauasec, chaqai quena' retaqa, ca' ỹa'xatetac ná'maq huelec ana 'laua. Qam cá'maq chicqa'gue da piguim napacalec ná'ogue nanchaqaina, ₃₂chaqai ỹa'xat ná'maq iuanchigui chaqai ná'maq 'xaỹa. Qam qaica cá'maq huelec dá'maq ỹa'xat. ₃₃Qam no'm 'ue ca huelec da'maxare, ca' quedajo, ca' i'taxajñi quiyim ỹaatqajam llic da la'qaatec ñi qota'olec. ₃₄Ma' cá'maq qaila' quiñi qota'olec, ca ỹa'xat da la'qaatec ñi'maxare, ma' ñi qota'olec se naloqojnañi quiyim ỹaanec so ne'Espíritu. ₃₅Ma' ñi qota'olec ỹaatqajam ỹauotegue so llaalec, vichiguiño' ỹomato'ot ná'ogue ná'maq lalamqateripi. ₃₆Cá'maq huelec so llaalec ñi qota'olec, ca' 'ue da lca'laxa sqaica lqodoc; qam cá'maq sqai huelec so llaalec, ca' sqaica da lca'laxa. Ta'ta'a quiyim hueetalec dá'maq chalego lecaic nouaxanaxaset quiñi qota'olec.