So Jesús ỹomatec so se ra'ñiigue hua'ñi yi Betesda
1Ca co'na' ime dajo, ca' na judioipi lotqai 'ue so lemaqachic, ca' so Jesús pila'a yi Jerusalén. 2Ca' quesojo na'a' lodegaxat 'uo' so lasom leenaxat nqohin nasom ana qagreta. Ca 'uo' so huaxaỹaq lahi' leenaxat nqohin quenaua hebreo la'qaatqa Betesda. Aso'maxare ỹovi' cinco naua naquiite' quenaua lahil. 3Ca quiyi'maxare hueeta'ñi saqatajlec na 'xoic ralolaxaic: 'uo' na qai'laq, ni'iraho lichil, chaqai na se ra'ñiigue, chi nauaanta'a quiyim qaidaxan na le'ec huaxaỹaq aso'maxare. 4Ma' 'uo' quen yi na'xa'a quiyim novi' so piguim le'ec lelaatec ñi qota'a quiyim novita aso lahi' na huaxaỹaq quiyim idaxan na le'ec. Ca cá'maq 'au tangui aso'maxare quena' ime qaidaxan na le'ec, ca chaqa'ma' imeuec quecanchaqaica ralolaxa. 5Ca hueeta'ño'yi so ỹale mashic ỹovi' treinta y ocho ñaxari ralolaxaic so'maxare. 6Ca co'na' so Jesús iuane'ta so'maxare nenantañi, ca retan quiyim shi'gom 'neetari' dajo, ca inato':
—¿Vi'saque remi'rec?
7Ca só'maq ralolaxaic 'naaco':
—Qami' ỹa'gaxala', qaica quet cá'maq inaxañigui aỹim añi huaxaỹaq lahi' quena' qaidaxan na huaxaỹaq. Ma' quena' sahotaque saañigui, ca 'ue quen na 'auñi caỹim.
8Ca' so Jesús 'naaco' queso'maxare:
—Ne'laxachirishiguim, coñitot na qacanqui', ca' qui'.
9Ca' chaqa'ma' imeuec so ỹale, ca iconot nallaaquen so lacanec, ca ỹouootegueri'. Qam co'mataxaqui sojo na'xa'a, 10ca' so judioipi 'naapego' só'maq ỹale imeuec:
—Najo na'xa'a co'mataxaqui, se ỹa'maxañi quiyim 'xachisegueri' na qacanqui'.
11Ca' so ỹale 'naaco':
—Só'maq yomatec 'naapiguiỹa': “Coñitot na qacanqui'; ma'le, ca' qui'.”
12Ca' qainato' so'maxare, qohinac:
—¿Nega'ỹo' cá'maq 'naapega qami': “Coñitot na qacanqui', ca' qui'”?
13Qam so ỹale se ỹa'den só'maq ỹomateco' na'le, ma' so Jesús na'laugui so 'xoic qomyipi hueeta'ñi yi'maxare. 14Co'na' ime, ca' so Jesús iuanejlec so ỹale caso no'ueenaxanaxaqui, ca 'naapego':
—'Ajñi', nagui mashic remi'rec qami', ca tot liỹa vite ca rasauaxashichi', qaiyi sqai paguec lecaic ca ralolaxa'e'.
15Ca' so ỹale eec ra'qaataxanem na judioipi quiyim chaqaiso so Jesús só'maq ỹomateco' na'le so'maxare. 16Ca vichiguiño' so judioipi ỹocantac so Jesús ỹahotaque quiyim ỹalauat, ma' ỹo'ueeto' dajo queso na'xa'a co'mataxaqui. 17Qam so Jesús 'naaco' queso qomyipi:
—Ñi ita'a ñaqai ro'ueenataxantac, ca' ỹim qai'neeta so'ueenataxan.
18Ca' quedajo, ca na judioipi paguec lama'xa ỹahotaque quiyim ỹalauat, ma' mesqaidaata quiyim se na'xaỹaxana da leloxoỹaxac yi na'xa'a co'mataxaqui, qam qai'neeta 'naac 'nejem ñi qota'olec ma' 'naac ỹaatqajam leta'a ñi'maxare.
Da lquesaxanaxa so llaalec ñi qota'olec
19Ca' so Jesús 'naapego' so qomyipi:
—Ỹaatqajam lliqueta shinapegalo qamiri quiyim najo llaalec ñi qota'olec qaica ca ishit ỹo'uet no'm chi nanoiquenta'pegue', ta'ta'a ná'maq iuana ỹo'uet ñí'maq leta'a. Ca ná'ogue ná'maq ỹo'uet ñí'maq leta'a, qai'neeta ná'maq llaalec ỹo'uet. 20Ma' ñí'maq leta'a nqo'ta ná'maq llaalec, ca' ỹachaxanem ná'ogue ná'maq ỹo'uet ñi'maxare; chaqai paguec lecaic ma'le ná'maq ỹachaxana, quená'maq ỹo'uet ca re'laxahi qamiri ma'le. 21Ma' quiyim ñí'maq leta'a ishit quiyim liỹa nca'leuec nqai'en cá'maq mashic ileu ỹaanem da lca'laxa, ca qai'neeta ná'maq llaalec ỹaanem da lca'laxa cá'maq nqo'ta. 22Chaqai ñí'maq ita'a se ỹa'ue ca nouaxanaxaset ca qom, ta'ta'a quiyim ỹaanem na llaalec dá'ogue da lquesaxanaxa quiyim ỹa'ue ca nouaxanaxaset ca qom, 23qaiyi ná'ogue na qomyipi imaqachin na llaalec, 'nejem nqai'en da lemaqajnataxanaxa quiñí'maq leta'a. Cá'maq se imaqachin ná'maq llaalec, ca se imaqachin ñí'maq leta'a ñí'maq nela'.
24Ca' ỹaatqajam lliqueta dá'maq sa'xat caqamiri: Cá'maq ỹa'maxachichiguiñi ca na'xaỹaxanaxac quedá'maq sa'xat, chaqai huelec ñí'maq yila', ca 'ue ca lca'laxa sqaica lqodoc; chaqai sqaica ca nouaxanaxaset, ma' mashic shi'gue napaguelec da nelauaxa, ca inoxona'a da nca'laxa. 25Ỹaatqajam lliqueta dá'maq shinac caqamiri, quiyim 'ue ca laloqo', ca' chaqaina ná'maq nagui ỹovita quiyim ma' ná'maq leuaxaiquipi 'xaỹaque da lavillaxac na llaalec ñi qota'a; ca ná'maq na'xaỹaxanta, ca nca'leuec. 26Ma' ñí'maq leta'a 'ue da lquesaxanaxa quiyim chaqaiñi ỹaanec da nca'laxa. Ca' qai'neeta ỹaanem na llaalec da lquesaxanaxa quiyim ỹaanec da nca'laxa; 27chaqai ỹaanem da lquesaxanaxa quiyim ỹa'ue ca nouaxanaxaset ca qom, ma' chaqaina najo ná'maq ỹale llaalec. 28'Neeto' re'laxaiỹa dajo, ma' ỹovita ma'le ca laloqo' quiyim ná'ogue na leuaxaiquipi 'xaỹaque ma'le da lavillaxac, 29ca nenoxonshiguim ma'le quena leuaxaic lahiripi. Ca ná'maq ỹa'maqachiguiñi ná'maq ỹo'uet, ca icoñiguit da lca'laxa; qam ná'maq se no'uen dá'maq ỹo'uet, liỹa nenoxonshiguim, qam icoñiguit da nouaxanaxaset.
Dá'maq re'oq nqai'en da lquesaxanaxa so Jesús
30Aỹim qaica ca shinegue, no'm chaqaỹim 'ue ca so'uet. Ma' ỹim so'uet ca lasauaxaset ca qom, qam quiyim qaỹamaxailec, ca' se ỹo'maac cá'maq so'uet. Ma' ỹim se so'uet cá'maq chaqai sahotaque shine'tegue, ta'ta'a cá'maq ỹahotaque ñi ita'a, ma' ñi'maxare yila'. 31No'm chaqaỹim ña'xateteguelta', ca cá'maq ỹa'qaataxanaxac se re'oq nqai'en quiyim ỹaatqajam llic cá'maq sa'xat. 32Qam ma' 'ue ñí'maq liỹa quiyim i'taxajñi dá'maq sa'xatetac, chaqai ỹim sa'den quiyim ñi'maxare quedá'maq 'naac caỹim ỹaatqajam lliqueta. 33Qamiri 'viichii ca relaachiguii na'le quiyim renataxana so Juan, ca dá'maq 'naac so'maxare ỹaatqajam lliqueta. 34Qam aỹim mesqaida quiyim 'ue quet ca qom 'ue ca ỹa'xatetac ỹa'maqachiguiñi caỹim, qaidaata shinac dajo quiyim qamiri rca'lliiuec. 35So Juan na'le 'neetari' aca ncoỹeraxanaxaqui quena' ỹaviquetaugui ca coỹeraxan, ca' qamiri netooñita'gue da lauaq, qam sqoỹoxouec da netoonaxaguii. 36Qam caỹim 'ue dá'maq paguec i'taxajñi quedá'maq 'naac so Juan. Ma' quena' 'ue yí'maq so'uet, qam chaqainaua nauá'maq ỹamaxailgoto ñí'maq ita'a quiyim so'ueete'. Ca' chaqainaua nauá'maq re'xoi' nqai'ne' quiyim llic chaqaiñi ñí'maq ita'a yila'. 37Qai'neeta ñí'maq yila' ita'a i'taxajñi dajo caỹim, 'eno'm se ỹauanapega 'xaiỹa da lavillaxac chaqai sqai huañiỹapega. 38Qam da la'qaatec ñi'maxare sqa tauguilo qamiri, ma' sqai viilec ná'maq nela' ñi'maxare. 39Qamiri ỹaatqajam 'ue da reuogoxohi quena' napaxaguiñitapegalo naua naneresañi la'qaatqa ñi qota'a, ma' 'ue da naquitaxaguii quiyim chigoqchiỹaugui quiyim nachiỹa ca nca'laxa sqaica lqodoc. Qam chaqainaua naua naneresañi na'qaatqa nauá'maq ỹa'xatesa'guit aỹim. 40Qam qamiri sqa 'maxariñii naguipegue' aỹim, qaiyi coñiguit dajo nca'laxa.
41Aỹim se sacoñiguit ca nemaqajnataxanaxa chicqotougui na qomyipi caỹim. 42Chaqai aỹim sa'deente' qamiri, chaqai sa'den quiyim sqai 'xoriñii ñi qota'olec. 43Ma' ỹim ñanac, qam yila' ñí'maq ita'a, qam qamiri sqai coñiguit aỹim; qam queta' 'ue ca chi nanoiquentac nanac, ca' coñiguit queta'le. 44¿Negue' cá'maq 'neeto' quiyim 'ue ca viilec qamiri quiyim coñi'chiguit ca lemaqajnataxanaxa quiñi 'óna 'nejemalam, qam sqai michiỹaque cá'maq nemaqajnataxanaxa chicqo'ot ñí'maq qaiñiita qota'olec? 45Sqai 'ñiitapega quiyim aỹim sa'xatem ñi ita'a ca rasauaxashichii. Ma' chaqaiso so Moisés só'maq ỹa'xat ca ro'maxaguii só'maq lliito'ot da naquitaxaguii qamiri. 46Ma' quetqai viilec dá'maq ỹa'xat so Moisés, ca viilec quet aỹim qai'neeta, ma' so Moisés chaqaỹim ná'maq 'em deraxan na'le. 47Qam no'm sqai viilec ná'maq ỹiriñi na'le so'maxare, ca ¿huose'quet viilec dá'maq sa'xat caqamiri?
