1Ca co'na' ỹovire'oga so na'xa'a quiyim liỹa qaỹovira'a ñi qota'olec quená'ogue na lelaatqaipi piguim laseripi, ca' so na'ỹaapec qai'neeta ỹoviro. 2Ca' qainato' quiñi qara'gaxala', qohinaco':
—¿Negue' ca chicqoira'gue?
Ca' só'maq viraqataxanaxai 'naaco':
—Chi souoxonta'pe naua lahil na 'laua.
3Co'na'le, ca' ñi qara'gaxala' 'naaco' queso'maxare:
—¿Mashic huañita ñi ilaatec leenaxat Job? Qaica ca 'nejem ñi'maxare quena 'laua, ỹaatqajam qamaxaraic ñi'maxare caỹim, chaqai da nachaalataxac ỹaatqajam 'maxaraic, chaqai qaca aca lete, netelañi quiyim ỹo'uet ca se no'uen queca liỹa. 'Eno'm shiilaxañitegue caỹim quiyim 'viichi' ca se no'uen quiñi'maxare, qaica quet cá'maq ỹasauaxat, qam ñi'maxare se neme quiyim queetalec aỹim, sqai ỹaxanec dá'maq no'uen chaalataxac.
4Qam so na'ỹaapec 'naaco' quiñi qara'gaxala':
—No'm ca 'óna saqa' qaiqueuocau'a na loshicmaxa, ca' ỹaqamqata quená'ogue. Ca qom qaica ca itena'a quená'ogue, ma' ỹahotaque nca'laxatec da chi nachaalataxac. 5Qam quiyim qaiqueuocau'a na loshicmaxa, ca huañita ma'le quiyim loqoisa'guit, qam se no'uen ca ỹa'xat caqami'.
6Ca' ñi qara'gaxala' 'naaco' queso na'ỹaapec:
—Hua', ỹa'maqachiguiñi. Nagui 'viiquiñi'sac ñi'maxare quecá'maq 'ñi'sa'gue, qam sqai huooquirau'a da nachaalataxac.
7Ca' só'maq viraqataxanaxai ca'e ñi qara'gaxala', ca ilata so Job so nalolaxa chalego la'aaxa, quelec na loshicmaxa, chicqochi'ñiguilo naua lapiaate', ỹoviragui na lqahic. 8Ca co'na'le, ca' so Job quepegue' ca lete loma', ca' nqa'xanñi, ca' icona so 'ueena lahi, ca niviigaxat. 9Qam aso loua 'naaco' queso'maxare:
—¿Qaiyiita qui'salec da reuagaxariqui'? ¡Shiviñi' chaqai se no'uen ca 'xachi' quiñi qota'olec, qaiyi rillivi'!
10Ca' so Job 'naaco' caso'maxare:
—¡'Aalo'e', se ỹa'maxañi quiyim se no'uen ca 'xachi'! Ma' qomi' seconaxaguit ná'maq lo'yaxanec nelatalo qomi' ñi qota'olec, ca ¿negue' quet cá'maq 'neeta quiyim se seconaxaguit ca se no'uen?
Ca' quedá'ogue dajo so Job qaica ca lasauaxaset, chaqai vire'ta qaica ca ỹo'maauec la'qaatec.
Qara'piicha so Job quesaua nauochaxaua'
11Ca' so Job 'vio' saua tres nauochaxaua': so 'óna leenaxat Elifaz, so'maxare naalec yi 'laua Temán, chaqai so Bildad naalec yi 'laua Súa, chaqai so Zofar naalec yi 'laua Naamat. Co'na' ỹa'deene' dá'maq le'xoric so Job queda hueetalec, ca' querepegue' ỹahosaque lo'daxachirigui lauel chaqai quiyim reloqora'a queda nqui'ic. 12Ca co'na' tot qoỹoxouo, ca iuanteta so Job. Qam ma' sham tot no'uentegue, ca chaqa'ma' ỹaualaxe', chaqai noỹene', chaqai nasectaqta'ahi saua loho queda nqui'ic. Chaqai nimiishiguim na 'laua lamoxoỹaxa, chaqai nemeetere'e naua lqahigo'. 13Ime, ca' nqa'xanyi'ñi' quena 'laua, ca neesa'anyi quesaua siete na'xata' chaqai saua siete piri qaica ca la'qaategue', ma' iuanta da nqui'ic chalego lecaic queso Job.
