Job 38

₂¿Nega'ỹo' qami' quiyim sqai 'taxachiriñi da ỹo'ueenataxanaxac,

ca choxochite' quenaua ra'qaataxahi' quiyim sqaica ca 'yiiñi'?

₃Chaxañirim nagui ca la'ñaxac qavilli',

ca' vite ca lopilaxaset naua inataxanaxaco:

₄¿Nega'ỹo' ca vi'sa'gue na' so'ueetetac na 'laua?

¡Choxochi' no'm llic 'ue ca 'yiiñi'!

₅No'm 'yiiñi', ¿nega'ỹo' cá'maq ỹo'uet da lecaachiguiñi?

chaqai ¿nega'ỹo' cá'maq no'viishiguim na'le?

₆¿Nega'ỹo' cauá'maq qaỹo'xonlgoto na'le?

¿Nega'ỹo' cá'maq ỹa'auaxanñi ca qa' nolliitañi na'maxare,

₇na' ñaq ro'ueenaxantagui na huaqajñipi na' sham richiguiñi,

ỹalequetaugui da laỹaac na ilaatqaipi piguim laseripi?

₈Chaqai ana huaaxai na' ne'paxanec, chicqotougui na 'laua,

¿Nega'ỹo' ca ỹo'ueete' na'le naua lquepaxasete' na huaxaỹaq?

₉Ỹim so'uet quiyim ana huaaxai no'viichigui na naueguelec,

chaqai lepataxaqui nqaishin na neue'.

₁₀Ca' ỹim ná'maq so'ueete' naua lqodoco ana huaaxai,

sa'ue ana lo'o na' sapo'guit quenaua lquepaxasete'.

₁₁Ca' shinapega: Qainaata najo novichira'ñi,

ca' quenajo, ca' se napaquiralec;

'ena lqodoc da lquesaxanaxa na ro'paxa'e'ipi.

₁₂Qami' Job, ¿'uo' quen ca quiyim laataxañi' quiyim richiguiñi,

ca' novi' ca lauaq ca na'xa'a?

₁₃¿Chaqai lachi' da lauaq quiyim coỹarelec na 'laua,

qaiyi na hualoxonyipi 'eet nañoxojñi?

₁₄Ca' re'oq da no'ueenataxac na 'laua

ca' re'oq na lashic 'ec ca loxoquiric.

₁₅Ca' se qaỹasenem dajo lauaq na hualoxonyipi,

ca' lqodoc nqohin na la'xalenataxanaxaquipi.

₁₆Ca ¿peeta'a mashic vichira'ña yí'maq se qaỹauanapega pa'ỹaañi,

yí'maq chicqotapi'ñi na huaxaỹaq caso huaaxai?

₁₇¿Peeta'a mashic huañita yi nera'ñi ñaua lasomi' yí'maq ỹaatqajam lapalqa' loiquenatec da nelauaxa?

₁₈¿Peeta'a 'yiiñi' ca lecaachiguiñi na 'laua?

¡'Xachirim, no'm llic 'yiiñi' ná'ogue!

₁₉¿Negue' ca hueesa'gue quiyim qaỹa'maxate'

na richiguiñi chaqai na napalaxa?

₂₀¿'Yiiñi'o' quiyim ỹovira'a nqai'ñi' ca lqodoc na 'laua,

ime, ca' lotqai rapila nqai'ñi' cá'maq chicqochi'ñi?

₂₁¡Peeta'a 'yiiñi', ma' mashic 'xoic na niñaxari'ipi,

ma' shi'co' ne'qa'iriñi na'le!

₂₂¿Mashic shi'co' vichitera'a yi ỹa'maqataxanqa'

quena' sa'maxat ana loñi nacañi chaqai ana qalachi,

₂₃ca sela' quena' ỹovitalo naua la'aaqa' naua na'xata'

quecaua na'xata' lauataxaqui'?

₂₄¿Nega'ỹo' cá'maq ỹaatqajam llicyaxac na richiguiñi quena' neuagaxajlecna?

¿Negue' cá'maq 'neeto' quen na nonot lqodoiguesec quena' neuagaxajlec na 'laua?

₂₅¿Negue' ca ỹauatec ca llic qaiyi nac na ỹaxat lodegaxat,

chaqai ỹachaxan ca que'tegue nqai'en ca nonot lodegaxat,

₂₆qaiyi ỹaxat quena 'laua qaica qom,

quená'maq qaica ca qom naalec,

₂₇qaiyi ilejlec na 'laua qaica ca naalec,

qaiyi ñaxat ana peue?

₂₈¿Negue' cá'maq leta'a na ỹaxat chaqai ana 'ỹa'?

₂₉¿Negue' acá'maq late'e ana loñi viñigui na huaxaỹaq chaqai aná'maq chaqai loñi?

₃₀¿Negue' cá'maq ỹa'ñaxajta' na huaxaỹaq 'ec nqai'en na qa',

qaiyi ra'ñi'ijta' ná'maq hueetalec aso huaaxai late'ogue'?

₃₁Ca' ¿qami'o' ná'maq lapoota'ta' nqai'ñi' ná'maq ỹaviqueta'a huaqajñipi queso rapiraxalaxachi',

chaqai ỹoxe'oga nqai'ñi' na huaqajñipi queso leenaxat Orión?

₃₂¿Peeta'a chaqaqami'o' ná'maq nenoxonshiguim nqai'ñi' aso nete'ese quena' ỹovita yi laloqo'?

Ca' ¿chaqaqami'o' ná'maq shaxañisac queca que'tegue so huaqajñipi leenaxat Osa Mayor chaqai aso Osa Menor?

₃₃¿Peeta'a 'yiiñi' ca leloxoỹaxac ná'maq queetac nqai'en na hueeto'ot na piguim?

Ca' ¿chaqaqami'o' ná'maq vite naua leloxoỹaxaco na 'laua?

₃₄¿Peeta'a shichi' quiyim lachi' na naueguelec quiyim i'paxanlec nqai'en qami' quena huaxaỹaq?

₃₅Chaqai lachi' aca soxonaxa nouaxanaxanñi quecá'maq shim lachitegue,

ca' ¿peeta'a saachiguit qami', ca 'naac: Cá'maq 'ñirac, ca so'uet?

₃₆¿Negue' cá'maq ỹo'uet da lco'ỹaxaric na ỹo,

ná'maq malagaxa loqo'm na huaqa'e?

₃₇¿Negue' cá'maq ỹaatqajam 'deenaxanqachaqaic, ca' ỹa'den ca ỹorete' na naueguelec?

¿Negue' cá'maq ishit quiyim co'taxachigui, ca' ỹo'uet ca ỹaxat,

₃₈qaiyi na namoxoỹaxa ñigui nishaaxa,

ca' ronaỹata', ca 'ue ana 'laua lolo?

₃₉¿Peeta'a chaqaiqami' ná'maq vite ca loxonec aca sauaxaic leta'a 'aalo,

qaiyi qui'ỹaxan ca llaalqaipi, chi ỹovireta'a quiyim quema',

₄₀quena' nqañoxojñi queca chaqai'en loma',

loqo'm quena' rauaanaxantac hueetaugui ca lo'oochaxa?

₄₁¿Negue' ca ỹa'ue ca loq ca rateguesan,

quena' idaantaque ca loq na llaalqaipi

chaqai quena' ỹaualqatagui na llaalqaipi yashiilatac?