Job 8

¿Chi' laquio' machi' quiyim qui'salec 'ñi'sa'gue dajo da retaxaỹaxaqui'?

Taqai'sac, 'ec qami' ca nonot huaquiaxaic.

₃Ñi qota'olec ñí'maq qaica ca lqalanec

se ỹauanapega quiyim ỹo'uet quet ca se no'uen, loqo'm ca se leloxoỹaxac.

₄Ỹaatqajam 'uo' ca lasauaxaset ca qachaalaxai'ipi quiñi qota'olec,

vichiguiño' ñi'maxare ỹa'ue so nouaxanaxaset.

₅Daañiraque ñi qota'olec ñí'maq qaica ca lqalanec,

ca shiila'e' quiyim nqouaguegue qami'.

₆No'm 'viichi' cá'maq ỹa'maqachiguiñi chaqai lamaxachite' ca qayicyaxaqui',

ca ñi'maxare reloqota'a qami', ca' ỹa'ue

ca ra'aachi' cá'maq 'iichichiguit quiyim ñiisa'ñi.

₇Só'maq resallaxa'e' na'le 'ec qaica ma'le,

mesqai 'nejem cá'maq resallaxa'e' naata ma'le.

₈Nataxañi' queso 'auaxaic ỹalliripi,

napaxaguiñita dá'maq ỹa'den ỹovirau'a so 'auaxaic qomyipi.

₉Ma' qomi' 'ec chita'gue scavit, ca' qaica ca sa'deenaq;

naua qana'xata' quenajo 'laua chita'gue, ca' pala'pe 'ec ca la'al.

₁₀Qam ná'maq ñaauapec ỹalliripi quiyim ra'qaataxanem qami',

ca' 'xoic na lapaxaguinataxanaxac caqami'.

₁₁Ana na'uaate chaqai ana rapiagaxan,

naua'maxare ñaxate' quena hua'ñi na 'xoic huaxaỹaq;

₁₂ca 'eno'm ñaq ladala chaqai saqa' qaichaq,

qam 'au ỹaso cana liỹa peue.

₁₃Ca' chaqaida da 'neeta na hualoxonyipi

quená'maq coua'e ñi qota'olec;

ca' da naquitaxac qaica ca 'negue.