Job 9

Ỹim ỹaatqajam sa'deenta quiyim chaqaida 'neeta dajo,

quiyim qaica ca qom ishit na'majnot ñi qota'olec quiyim 'naac qaica ca ỹasauaxat.

₃Loqo'm ỹahotaque retaxaỹa'guit ñi'maxare,

ma' quiyim mil ca lenataxanaxac ñi'maxare,

ca' qaica quet cá'maq 'oonoqui' ỹa'ue ca lopilaxaset.

₄Ma' ñi qota'olec ỹaatqajam chalego lecaic queda lquesaxanaxa chaqai queda la'deenaxanaxa,

¿negue' quet cá'maq ishit reloqoguit, ca' se qanaqajñi?

₁₁Ma' no'm ñi qota'olec que'tot aỹim, qam se seuanegue;

que'tot aỹim, qam se ñauategue.

₁₂No'm 'ue ca icona, ¿negue' quet cá'maq ishit ro'laxana'pegue'?

¿Negue' quet cá'maq ishit inat quecá'maq 'neeta'pegue?

₁₃No'm ro'o ñi qota'olec, mesqai chaqa'ma' taauec ca lauel;

ca' naua lichil hueeto'oto ná'maq ỹotauan aso isecỹac late'ogue' huaxaỹaqse, leenaxat Rahab.

₁₄¿Nega'ỹo' ca shinta'gue ca ỹa'qaatec,

quiyim setaxaỹa'guit ñi qota'olec?

₁₅Quiyim qaica ca sasauaxat, qam qaica ca sa'xat;

ñi'maxare ñí'maq yimit, qaidaata quiyim sashiila quiyim nqouaguic.

₁₆Loqo'm quiyim soỹaxana quiyim noviriua',

qam sqa seuelec quiyim na'xaỹaxana quet ca ỹa'qaatec.

₁₇Ca ñi'maxare ishit quiyim youaxan, ỹodootaỹa' ca nonot lodegaxat,

ca' noquiigaxatec na icoñiraxaripi, 'eno'm qaica ca sasauaxat.

₁₈Ca' ỹaatqajam nqo'naxatec da nqui'ic,

ca' se ỹa'ue ca idaaqa' quiyim ñauec ca ỹacat.

₁₉¿Quiyim sahote'e dá'maq chi iquesaxanaxa? Ñi'maxare paguec lquesaxanaxa.

¿Chaqai quiyim soỹaxane'oga quiyim qaimit? ¿Negue' quet cá'maq ishit noviro nqai'en?

₂₀'Eno'm ỹaatqajam ña'maxateta, ca' qaica ca sasauaxat,

qam ñi'maxare qaiyiita 'naac ỹim sauaqhuaic chaqai nocqaic.

₂₁Ỹaatqajam qaica ca ỹasauaxaset, qam ¿negue' quet cá'maq 'negue da'maxare?

Ỹim mashic yisot quiyim yca'leetauec.

₂₂Dá'ogue qaidaata dá'maq 'neetari'. Ca' chaqaida dá'maq sa'deentapega:

ñi'maxare ileu nqai'en ná'maq qaica ca lasauaxaset, 'nejem nqai'en na sauaqhuaic.

₂₃No'm 'ue ca la'aaxa, ca' ileuaugui ca qaica ca lasauaxaset,

qam ñi qota'olec chi i'neetac queca leuogoxo.

₂₄Ca ñi'maxare ỹaanec ná'maq hueetalec na 'laua, qaiyi ỹoiquentac na hualoxonyipi,

ca' na loico lo'o', ca ỹaxachiguilo naua nqote'.

Ca no'm sqai 'ne'tegue dajo ñi qota'olec,

ca ¿negue' quet cá'maq liỹa ỹo'uet dajo?