Joel 1

₂Ỹaatqajam na'xaỹaxañiita dajo, qamiri qo'xoiquipi,

chaqai qamiá'ogue qamiri ñiitalec najo 'laua Judá,

¿Sqai huañiỹapego' quen qamiri ca 'nejem dajo?

¿Se ỹauanapego' quen 'ue ca 'nejem dajo na' ñaqa 'vii saua qata'allii?

₃'Qaataxañiỹalo naua qachaalaxahi quedajo

chaqai caua'maxare ra'qaataxanalo caua llaalqa,

chaqai cauá'maq llaalqa ra'qaataxanalo cauá'maq dalaxaic ne'qa'iñi ma'le.

₄Sá'ogue qaiqo'queeta caso piñai,

ca só'maq no'ueenañi caso 'auaxai,

ca novi' aso liỹa, ca' qo'queeta.

₅¡Qamiri ne'taaxairipi, nelohiuec!

¡Noỹiñii, ne'taaxairipi quena lataxa,

ma' vire'ta na li'i ana 'uva qarouootaxana'gue ma'le!

₆Ma' ana piñai 'ec ca 'xoic nouaataxanaq nalauataxai,

chaqai naua la'gaxanqate 'ec na sauaxaic leta'a

chaqai naua lasoocse 'ec na sauaxai 'aalo

ỹaatqajam i'leque'tegue na ña'laua.

₇Ỹaatqajam qo'quiichi'ñiguit na qodanec 'uva loma',

qo'queeta ana laue ana 'igo lashi;

ỹaatqajam ỹoselaxate'tegue ná'ogue

mashic ỹalagre'teguelo nqai'ne' naua lasote.

₈Ca' 'nejem aca 'ue ca napiitaxaua quiyim noỹen,

ca' ỹañiñi caua noho nachicoxoqui'

quena' ileu ca napiitaxaua,

₉ca' chaqaida 'neeta noỹen na netaxaỹaxanqajanqaipi

ma' quiñi no'ueenaxanaxaqui quiyi Jerusalén tot qaica ca nanecsec ala chaqai ca lataxa

quiyim nachitaxanataxanaxat quiñi qara'gaxala'.

₁₀Qanichiquichiriñi naua no'ueenaxari,

ca na 'laua 'xoic da lachicoxo.

Na'laañi cá'ogue ca trigo,

na 'uva lomaateripi ỹaso,

chaqai na oliva loma' neualñi ana laue.

₁₁Ca' qamiri nauá'maq 'ueenataxañitac quena no'ueenaxa chaqai quena 'uva loma',

noỹiñii queda rachicoxohi,

ma' na'laañi ná'ogue na nanecseripi,

se qanaqat na trigo chaqai ana cebada.

₁₂Mashic nasogoñi na 'uva lomaateripi

chaqai na'laañi na 'igo loma'.

Qai'neeta ỹaso ana lashi ana granada,

ana chaavic, ana manzana lashi,

chaqai ná'ogue ana qo'paq quena no'ueenaxa.

Ca ¡chaqaida 'neeta, ca na'laañi da laỹaac ná'ogue na qomyipi!

₁₃Qamiri netaxaỹaxanqajanqaipi daañiteguelec ada ncopatoxonaxalate,

ñiiñi caua noho nachicoxoqui', chaqai noỹiñii queda nqui'ic,

ma' ñi no'ueenaxanaxaqui quiñi qota'olec

tot qaica ca nanecsec ala chaqai ca lataxa quiyim nachitaxanataxanaxat.

₁₄Taxaiỹougui na qomyipi chaqai 'ñiỹapega quiyim nqopaaqachit;

lapooñiỹata' quiñi lo'ueenaxanaxaqui ñi qara'gaxala' ñí'maq qota'olec caqamiri

ná'maq qo'xoiquipi chaqai ná'ogue na qomyipi neetalec na 'laua Judá,

chaqai raualaxaiỹot shiilahi ñi qara'gaxala'.

₁₅¡'Agai, tot qoỹoxoguit ca na'xa'a loviraxaqui ñi qara'gaxala'!

¡Chalego lichic ma' nodoota quiyim qanopoxoỹaxachiñi qomi',

chicqo'ot ñí'maq sqaica lqalanec!

₁₆Ỹaatqajam seuanqachigui quiyim qarouootaxana'gue so qonoq,

ca' imeuo da naỹaac quiñi no'ueenaxanaxaqui quiñi qota'olec.

₁₇Ana la rocalañi quena nayic,

ca na'laañi ná'ogue na trigo,

ca' naua la lahiri co'chiichiguilo.

₁₈¡Chalego ỹaualqatagui na huacallipi!

Ana huaca idaantaque na 'uaqapi, qam qaica;

chaqai na qagretaipi neleueta'ñiguit.

₁₉¡Yaualqot qami', qami' ỹa'gaxala',

ma' so norec ỹavigaxat na 'uaqapi quiyi 'laua qaica qom

chaqai naua qo'pa' quiyi no'ueenaxa!

₂₀¡Vire'ta na iseripi neuec ỹaualqatacot qami',

ma' mashic rashiviguilo naua ñaachi,

chaqai na norec ỹavigaxat na 'uaqapi laqalachi!